ഷിക്കാഗോ മലയാളി അസോസിയേഷന്റെ നേതൃത്വത്തിൽ എൻ.കെ. ലൂക്കോസ് മെമ്മോറിയൽ നാഷണൽ വോളിബോൾ ടൂർണമെന്റ് സെപ്തംബർ 5ന്

JULY 18, 2026, 11:19 PM

ഷിക്കാഗോ: ഷിക്കാഗോ മലയാളി അസോസിയേഷന്റെ ആഭിമുഖ്യത്തിൽ 19-ാമത് എൻ.കെ. ലൂക്കോസ് മെമ്മോറിയൽ വോളിബോൾ ടൂർണമെന്റ് സെപ്തംബർ 5-ാം തീയതി ഇല്ലിനോയിസിലെ ബെൻസൺ വില്ലയിലുള്ള എനർജി സ്‌പോർട്‌സ് കോംപ്ലക്‌സിൽ വച്ച് രാവിലെ 9 മണിക്ക് തുടക്കം കുറിക്കുന്നു.

ഈ നാഷണൽ ടൂർണമെന്റിന്റെ ചെയർമാനായി ജിനു പുന്നശ്ശേരി, ജനറൽ കൺവീനറായി മാത്യു തട്ടാമറ്റത്തിനെയും, കൺവീനറായി ജോഷി പുത്തൂരാനെയും തെരഞ്ഞെടുത്തു.

ഷിക്കാഗോ മലയാളി സമൂഹം ഒന്നടങ്കം കാത്തിരിക്കുന്ന ഈ കായികമാമാങ്കത്തിനെ നയിക്കാൻ ഏറ്റവും കഴിവുറ്റ നേതൃത്വനിരയിലുള്ളവരെയാണ് ഷിക്കാഗോ മലയാളി അസോസിയേഷൻ തെരഞ്ഞെടുത്തിരിക്കുന്നത്.

നോർത്ത് അമേരിക്കൻ മലയാളി സമൂഹത്തിലെ വളർന്നുവരുന്ന വോളിബോൾ കായികതാരങ്ങളെ പ്രോത്സാഹിപ്പിക്കുന്നതിനാണ് ഷിക്കാഗോ മലയാളി അസോസിയേഷൻ ഈ ടൂർണമെന്റിന് നേതൃത്വം നൽകുന്നത്.

ഇതിനോടകം വലിയൊരു ജനപിന്തുണയാണ് ഈ സംഘാടകസമിതിക്ക് കിട്ടിയിരിക്കുന്നത്. ടൂർണമെന്റിന്റെ വിജയത്തിനായി നിങ്ങളോരോരുത്തരുടെയും സഹായ സഹകരണങ്ങൾ അഭ്യർത്ഥിച്ചുകൊള്ളുന്നു.