അമ്പത് വർഷത്തെ ഇടവേളയ്ക്ക് ശേഷം മനുഷ്യനെ വീണ്ടും ചന്ദ്രനിലേക്ക് അയക്കാനുള്ള നാസയുടെ ആർട്ടെമിസ് 2 ദൗത്യം വീണ്ടും പ്രതിസന്ധിയിൽ. നേരത്തെ മാർച്ച് ആദ്യവാരം നടത്താൻ നിശ്ചയിച്ചിരുന്ന വിക്ഷേപണം ഏപ്രിലിലേക്ക് മാറ്റിയതായി നാസ ഔദ്യോഗികമായി അറിയിച്ചു. റോക്കറ്റിലെ ഹീലിയം വിതരണ സംവിധാനത്തിൽ കണ്ടെത്തിയ സാങ്കേതിക തകരാറാണ് ദൗത്യം നീളാൻ കാരണമായത്. ഇതോടെ ലോഞ്ച് പാഡിലുണ്ടായിരുന്ന എസ്.എൽ.എസ് റോക്കറ്റും ഓറിയോൺ പേടകവും അറ്റകുറ്റപ്പണികൾക്കായി തിരികെ മാറ്റേണ്ടി വന്നു.

കെെന്നഡി സ്പേസ് സെന്ററിലെ വെഹിക്കിൾ അസംബ്ലി ബിൽഡിംഗിലേക്കാണ് റോക്കറ്റ് തിരികെ കൊണ്ടുപോയത്. വിക്ഷേപണത്തിന് മുന്നോടിയായി നടത്തിയ ഇന്ധനം നിറയ്ക്കൽ പരീക്ഷണത്തിന് ശേഷമാണ് ഹീലിയം ചോർച്ച കണ്ടെത്തിയത്. ഈ തകരാർ പരിഹരിക്കാൻ റോക്കറ്റിന്റെ പ്രധാന ഭാഗങ്ങളിൽ പരിശോധന നടത്തേണ്ടതുണ്ട്. സുരക്ഷാ മാനദണ്ഡങ്ങൾ മുൻനിർത്തിയാണ് വിക്ഷേപണം നീട്ടിവെക്കാൻ തീരുമാനിച്ചതെന്ന് നാസ അഡ്മിനിസ്ട്രേറ്റർ ജാരെഡ് ഐസക്മാൻ വ്യക്തമാക്കി.

റീഡ് വൈസ്മാൻ, വിക്ടർ ഗ്ലോവർ, ക്രിസ്റ്റീന കോച്ച് എന്നീ അമേരിക്കൻ ബഹിരാകാശ സഞ്ചാരികളും കനേഡിയൻ സഞ്ചാരി ജെറമി ഹാൻസനുമാണ് ഈ ദൗത്യത്തിൽ പങ്കെടുക്കുന്നത്. വിക്ഷേപണം വൈകിയതോടെ ഇവർക്കുള്ള ക്വാറന്റൈൻ താൽക്കാലികമായി അവസാനിപ്പിച്ചു. ഏപ്രിലിലെ വിക്ഷേപണ തീയതിക്ക് രണ്ടാഴ്ച മുൻപ് ഇവർ വീണ്ടും നിരീക്ഷണത്തിൽ പ്രവേശിക്കും. പത്ത് ദിവസം നീളുന്ന ദൗത്യത്തിൽ ഇവർ ചന്ദ്രനെ വലംവെച്ച് ഭൂമിയിലേക്ക് മടങ്ങും.

ചന്ദ്രോപരിതലത്തിൽ മനുഷ്യനെ ഇറക്കുന്ന ആർട്ടെമിസ് 3 ദൗത്യത്തിന് മുന്നോടിയായുള്ള സുപ്രധാന പരീക്ഷണമാണിത്. ആർട്ടെമിസ് 2 വിജയകരമായി പൂർത്തിയാക്കിയാൽ മാത്രമേ അടുത്ത ദൗത്യത്തിന്റെ തീയതി ഉറപ്പിക്കാൻ സാധിക്കൂ. നിലവിലെ സാഹചര്യത്തിൽ ആർട്ടെമിസ് 3 ദൗത്യം 2027-ലോ 2028-ലോ മാത്രമേ നടക്കാൻ സാധ്യതയുള്ളൂ. സാങ്കേതിക തടസ്സങ്ങൾ ഓരോന്നായി പരിഹരിച്ച് മുന്നേറാനാണ് ശാസ്ത്രജ്ഞരുടെ ശ്രമം.

ഫെബ്രുവരി ആദ്യം ഹൈഡ്രജൻ ചോർച്ചയെ തുടർന്ന് പരീക്ഷണം നിർത്തിവെക്കേണ്ടി വന്നിരുന്നു. അത് പരിഹരിച്ചതിന് പിന്നാലെയാണ് പുതിയ ഹീലിയം പ്രശ്നം നാസയെ വലയ്ക്കുന്നത്. ഏപ്രിൽ ഒന്ന്, മൂന്ന്, നാല് തീയതികൾ വിക്ഷേപണത്തിന് അനുയോജ്യമാണെന്ന് നാസ അറിയിച്ചു. എന്നാൽ അറ്റകുറ്റപ്പണികൾ എത്ര വേഗത്തിൽ പൂർത്തിയാകും എന്നതിനെ ആശ്രയിച്ചിരിക്കും അന്തിമ തീരുമാനം.

അമേരിക്കൻ ബഹിരാകാശ ഏജൻസിക്ക് ഈ ദൗത്യം ഏറെ നിർണ്ണായകമാണ്. ചൈനയും ചന്ദ്ര ദൗത്യങ്ങൾക്കായി തയ്യാറെടുക്കുന്ന പശ്ചാത്തലത്തിൽ ആർട്ടെമിസിന്റെ വിജയം അമേരിക്കയ്ക്ക് അഭിമാനപ്രശ്നമാണ്. ബഹിരാകാശ രംഗത്തെ പുതിയ സുവർണ്ണ കാലഘട്ടത്തിലേക്കുള്ള വാതിലായിട്ടാണ് ഈ ദൗത്യത്തെ ലോകം നോക്കിക്കാണുന്നത്. ദൗത്യം വൈകുന്നത് ചെലവ് വർദ്ധിപ്പിക്കുന്നുണ്ടെങ്കിലും സുരക്ഷയ്ക്കാണ് മുൻഗണനയെന്ന് നാസ ആവർത്തിച്ചു.

English Summary: NASA has delayed the historic Artemis 2 moon mission launch from March to April due to a helium system issue. The SLS rocket and Orion spacecraft were rolled back to the Vehicle Assembly Building for repairs. This mission which aims to send four astronauts around the moon is a critical step for future lunar landings.

Tags: Malayalam News, News Malayalam, Latest Malayalam News, Vachakam News, USA News, USA News Malayalam, NASA Artemis 2 Delay, Moon Mission 2026, Space Launch System