വാഷിംഗ്ടൺ: പുതിയ ഐഫോണുകളിൽ ഗൂഗിളിൻ്റെ ജെമിനി എഐ സാങ്കേതികവിദ്യ ഉൾപ്പെടുത്തുന്നതിനായി ഈ വർഷം ആപ്പിളുമായി ഒരു കരാറിലെത്താൻ പ്രതീക്ഷിക്കുന്നതായി ഗൂഗിൾ സിഇഒ സുന്ദർ പിചൈ. വാഷിംഗ്ടണിൽ നടക്കുന്ന ഗൂഗിളിനെതിരായ ആന്റിട്രസ്റ്റ് കേസിൻ്റെ വിചാരണയ്ക്കിടെയാണ് പിചൈ ഇക്കാര്യം വെളിപ്പെടുത്തിയത്.

യുഎസ് നീതിന്യായ വകുപ്പിനെതിരെ (Department of Justice) ആൽഫബെറ്റ് കമ്പനി നിയമപരമായി പ്രതിരോധം നടത്തുന്നതിനിടെയാണ് പിചൈയുടെ ഈ പ്രസ്താവന. മൊബൈൽ ഉപകരണങ്ങളിൽ ഗൂഗിളിനെ ഡിഫോൾട്ട് സെർച്ച് എഞ്ചിൻ ആക്കുന്നതിനായി ആപ്പിൾ, സാംസങ്, എ.ടി.&ടി, വെരിസോൺ തുടങ്ങിയ കമ്പനികളുമായി ഗൂഗിൾ ഒപ്പുവെച്ച കരാറുകൾ അവസാനിപ്പിക്കണമെന്ന് നീതിന്യായ വകുപ്പ് ആവശ്യപ്പെടുന്നുണ്ട്.

നിലവിൽ ആപ്പിളുമായി ജെമിനി സംബന്ധിച്ച് ഗൂഗിളിന് കരാറുകളൊന്നുമില്ലെന്ന് പിചൈ സ്ഥിരീകരിച്ചു. എന്നാൽ, ആപ്പിളിന്റെ ഇൻ്റലിജൻസിൻ്റെ ഭാഗമായി ജെമിനി എഐ ഉൾപ്പെടുത്തുന്നതിനുള്ള സാധ്യതയുണ്ടെന്ന് അദ്ദേഹം സൂചിപ്പിച്ചു. കഴിഞ്ഞ വർഷം ആപ്പിൾ സിഇഒ ടിം കുക്കുമായി ഈ സാധ്യതയെക്കുറിച്ച് താൻ സംസാരിച്ചിരുന്നതായും പിചൈ വെളിപ്പെടുത്തി. ഈ വർഷം ഒരു കരാർ യാഥാർത്ഥ്യമാവുകയാണെങ്കിൽ, ആപ്പിൾ ഇൻ്റലിജൻസിൻ്റെ ഭാഗമായാണ് ഗൂഗിൾ ജെമിനി എഐ ഐഫോണുകളിൽ ലഭ്യമാക്കുക. ഗൂഗിൾ ജെമിനി ആപ്പിൽ പരസ്യങ്ങൾ ചേർക്കുന്നതിനെക്കുറിച്ചുള്ള പരീക്ഷണങ്ങൾ നടത്തുമെന്നും അദ്ദേഹം സൂചിപ്പിച്ചു.

ഓൺലൈൻ സെർച്ച് രംഗത്തെ തങ്ങളുടെ ആധിപത്യം ആർട്ടിഫിഷ്യൽ ഇൻ്റലിജൻസ് രംഗത്തേക്കും വ്യാപിപ്പിക്കാനുള്ള ഗൂഗിളിന്റെ ശ്രമങ്ങൾ പ്രതിരോധിക്കപ്പെടുകയാണ്. സ്മാർട്ട്ഫോൺ നിർമ്മാതാക്കൾക്കും നെറ്റ്‌വർക്ക് ഓപ്പറേറ്റർമാർക്കും നെറ്റ്‌വർക്ക് സേവന ദാതാക്കൾക്കും (carriers) കോടിക്കണക്കിന് ഡോളർ നൽകിയാണ് ഗൂഗിൾ തങ്ങളുടെ കുത്തക നിലനിർത്തിയതെന്ന് ജഡ്ജ് അമിത് മേത്ത കഴിഞ്ഞ വർഷം ഒരു വിധിയിൽ പറഞ്ഞിരുന്നു. ഡാറ്റ പങ്കുവെക്കുന്നതിനുള്ള വ്യവസ്ഥകൾ തങ്ങളുടെ ഗവേഷണത്തിനും വികസനത്തിനും (research and development) തടസമാവുന്നുണ്ടെന്നും പിചൈ വിചാരണയ്ക്കിടെ പറഞ്ഞു

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്