ചാരവൃത്തിക്ക് ഇനി ആർട്ടിഫിഷ്യൽ ഇന്റലിജൻസും; 'എഐ സഹപ്രവർത്തകരെ' നിയോഗിക്കാൻ സി.ഐ.എ

APRIL 9, 2026, 10:23 PM

വാഷിംഗ്ടൺ: വിദേശ രാജ്യങ്ങളുടെ രഹസ്യ നീക്കങ്ങളും പദ്ധതികളും വിശകലനം ചെയ്യാൻ ആർട്ടിഫിഷ്യൽ ഇന്റലിജൻസ് സാങ്കേതികവിദ്യ വ്യാപകമായി ഉപയോഗിക്കാൻ അമേരിക്കൻ ചാരസംഘടനയായ സി.ഐ.എ ഒരുങ്ങുന്നു. അടുത്ത ഏതാനും വർഷങ്ങൾക്കുള്ളിൽ ഏജൻസിയുടെ എല്ലാ വിശകലന പ്ലാറ്റ്‌ഫോമുകളിലും എഐ 'സഹപ്രവർത്തകരെ' ഉൾപ്പെടുത്തുമെന്ന് സി.ഐ.എ ഡെപ്യൂട്ടി ഡയറക്ടർ മൈക്കൽ എലിസ് അറിയിച്ചു.

മനുഷ്യരായ ചാരന്മാർ ശേഖരിക്കുന്ന വിവരങ്ങൾ വിശകലനം ചെയ്ത് സ്വയം പ്രവർത്തിക്കുന്ന ആദ്യത്തെ ഇന്റലിജൻസ് റിപ്പോർട്ട് സി.ഐ.എ അടുത്തിടെ തയ്യാറാക്കി.

വിവരങ്ങളിലെ ട്രെൻഡുകൾ കണ്ടെത്താനും നിഗമനങ്ങളിൽ എത്താനും എഐ സഹായിക്കും. ഇത് ചാരസംഘടനയുടെ പ്രവർത്തനങ്ങൾ കൂടുതൽ വേഗത്തിലാക്കും.

ജനറേറ്റീവ് എഐ യുടെ അതീവ രഹസ്യ സ്വഭാവമുള്ള (Classified) പതിപ്പാണ് ഇതിനായി ഉപയോഗിക്കുന്നത്. എങ്കിലും അന്തിമ തീരുമാനങ്ങൾ എടുക്കുന്നത് മനുഷ്യർ തന്നെയായിരിക്കുമെന്ന് മൈക്കൽ എലിസ് വ്യക്തമാക്കി.

സാങ്കേതിക വിദ്യയിൽ ചൈന അമേരിക്കയ്ക്ക് വലിയ വെല്ലുവിളി ഉയർത്തുന്ന സാഹചര്യത്തിലാണ് സി.ഐ.എയുടെ ഈ നിർണ്ണായക നീക്കം. കഴിഞ്ഞ വർഷം മാത്രം ഡാറ്റാ പ്രോസസ്സിംഗ്, വിവർത്തനം എന്നിവയുമായി ബന്ധപ്പെട്ട 300ഓളം എഐ പ്രോജക്ടുകൾ സി.ഐ.എ പരീക്ഷിച്ചിരുന്നു. ആധുനിക യുദ്ധതന്ത്രങ്ങളിലും രഹസ്യാന്വേഷണത്തിലും സാങ്കേതിക മുൻതൂക്കം നിലനിർത്തുകയാണ് ഇതിലൂടെ ലക്ഷ്യമിടുന്നത്.

പി.പി. ചെറിയാൻ