തിരുവനന്തപുരം: ഭരണപരമായ തീരുമാനങ്ങളില്‍ പാര്‍ട്ടിതല കൂടിയാലോചനകള്‍ പൂര്‍ണ്ണമായും ഉറപ്പുവരുത്താന്‍ എ.ഐ.സി.സിയുടെ നിര്‍ണായക ഇടപെടല്‍. സര്‍ക്കാര്‍ തീരുമാനങ്ങള്‍ തങ്ങള്‍ അറിയുന്നില്ലെന്ന യു.ഡി.എഫ് കണ്‍വീനര്‍ അടൂര്‍ പ്രകാശിന്റെ പരാതിയില്‍ കഴമ്പുണ്ടെന്ന് വിലയിരുത്തിയ ഹൈക്കമാന്‍ഡ്, പാര്‍ട്ടി-സര്‍ക്കാര്‍ ഏകോപനത്തിനായി 12 അംഗ സമിതി ഉടന്‍ രൂപവത്കരിക്കാന്‍ ആവശ്യപ്പെട്ടു.
ഉമ്മന്‍ചാണ്ടി സര്‍ക്കാരിന്റെ കാലത്തുണ്ടായിരുന്ന വിജയകരമായ ഏകോപനസമിതിയുടെ മാതൃകയിലാകും പുതിയ സമിതിയും പ്രവര്‍ത്തിക്കുക. കോണ്‍ഗ്രസ് പ്രവര്‍ത്തകസമിതി അംഗങ്ങളായ മന്ത്രി രമേശ് ചെന്നിത്തല, കൊടിക്കുന്നില്‍ സുരേഷ്, കേരളത്തിന്റെ ചുമതലയുള്ള എ.ഐ.സി.സി. ജനറല്‍ സെക്രട്ടറി ദീപാ ദാസ്മുന്‍ഷി, മുന്‍ കെ.പി.സി.സി പ്രസിഡന്റുമാര്‍ എന്നിവര്‍ സമിതിയുടെ ഭാഗമാകും. അതേസമയം എ.ഐ.സി.സി ജനറല്‍ സെക്രട്ടറി കെ.സി വേണുഗോപാല്‍ സമിതിയിലുണ്ടാകില്ലെന്നാണ് സൂചന. അടൂര്‍ പ്രകാശ് ഉന്നയിച്ച പരാതി വിഷയപരമായി ന്യായമാണെന്ന് അംഗീകരിക്കുമ്പോഴും, അത് പരസ്യമായി ഉന്നയിക്കാന്‍ തിരഞ്ഞെടുത്ത സമയവും വേദിയും ശരിയായില്ലെന്ന വിമര്‍ശനം മുതിര്‍ന്ന നേതാക്കള്‍ പങ്കുവെക്കുന്നുണ്ട്.
പാര്‍ട്ടിക്കുള്ളില്‍ അഭിപ്രായ ഭിന്നതകളും ആഭ്യന്തര പ്രശ്‌നങ്ങളും രൂക്ഷമാകുന്ന സാഹചര്യത്തില്‍ സംഘടനാ സംവിധാനം ശക്തമാക്കാന്‍ ഈ മാസം 13 ന് കെ.പി.സി.സി ഭാരവാഹികളുടെയും ഡി.സി.സി പ്രസിഡന്റുമാരുടെയും അടിയന്തര യോഗം വിളിച്ചുചേര്‍ത്തിട്ടുണ്ട്. വരും ദിവസങ്ങളില്‍ ഭരണപക്ഷത്തിനെതിരെ പ്രതിപക്ഷം ശക്തമായ പ്രക്ഷോഭങ്ങളുമായി രംഗത്തിറങ്ങാന്‍ സാധ്യതയുള്ളതിനാല്‍ ഇതിനെ രാഷ്ട്രീയമായി പ്രതിരോധിക്കാനുള്ള തന്ത്രങ്ങള്‍ കെ.പി.സി.സി യോഗത്തില്‍ ആസൂത്രണം ചെയ്യും. ഭരണപരമായ നയരൂപീകരണവും പാര്‍ട്ടി തലത്തിലുള്ള രാഷ്ട്രീയ ഇടപെടലുകളും തടസ്സമില്ലാതെ മുന്നോട്ടുകൊണ്ടുപോകാന്‍ പുതിയ ഏകോപനസമിതി മുഖ്യപങ്ക് വഹിക്കുമെന്നാണ് വിലയിരുത്തല്‍.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20260119112532.webp)
-20260119112532.webp)
-20201113034035.jpg)
