ഇന്റർനെറ്റ് ഉപയോഗിക്കാറില്ല,സ്മാർട്ട്‌ഫോൺ ആവശ്യത്തിന് മാത്രമെന്ന് അജിത് ഡോവൽ

JANUARY 12, 2026, 2:19 AM

മനുഷ്യന്റെ സന്തത സഹചാരിയായി സ്മാർട്ട്‌ഫോണുകൾ മാറിയ ഈ കാലത്ത് ഇന്ത്യയുടെ ദേശീയ സുരക്ഷാ ഉപദേഷ്ടാവ് അജിത് ഡോവൽ ജീവിക്കുന്നത് ഇന്റർനെറ്റ് ഉപയോഗിക്കാതെ.

ഭാരത് മണ്ഡപത്തിൽ നടന്ന വീക്ഷിത് ഭാരത് യംഗ് ലീഡേഴ്‌സ് ഡയലോഗ് 2026 ന്റെ ഉദ്ഘാടന സെഷനിൽ സംസാരിക്കവേയാണ് ദൈനംദിന ജീവിതത്തിൽ മൊബൈൽ ഉപയോഗം കുറവാണെന്നത് കേട്ടത് ശരിയാണോ എന്ന് ഡോവലിനോട് ചോദ്യമുയർന്നത്. ഇതിന് മറുപടിയായി ഡോവൽ പറഞ്ഞതിങ്ങനെ

"ഞാൻ ഇന്റർനെറ്റ് ഉപയോഗിക്കുന്നില്ല എന്നത് ശരിയാണ്, കുടുംബകാര്യങ്ങൾക്കോ മറ്റ് രാജ്യങ്ങളിലെ ആളുകളോട് സംസാരിക്കാനോ ഒഴികെ ഞാൻ ഫോൺ ഉപയോഗിക്കാറില്ല, അത് അത്യാവശ്യമാണ്."- ഡോവൽ പറഞ്ഞു.

സ്മാർട്ട്‌ഫോണുകൾ ഒഴിവാക്കുക എന്നതിനർത്ഥം ആശയവിനിമയം ഒഴിവാക്കുക എന്നല്ലെന്നും ഡോവൽ വിശദീകരിച്ചു. "ഞാൻ എന്റെ ജോലി ആ രീതിയിലാണ് കൈകാര്യം ചെയ്യുന്നത്. ആശയവിനിമയത്തിന് മറ്റ് നിരവധി മാർഗങ്ങളുണ്ട്, കൂടാതെ ആളുകൾക്ക് അറിയാത്ത ചില അധിക രീതികൾ ക്രമീകരിക്കേണ്ടതുണ്ട്," അദ്ദേഹം പറഞ്ഞു.

ഡോവലിന്റെ പ്രതികരണം ഉടനടി ശ്രദ്ധ ആകർഷിച്ചു, കാരണം ഇന്ത്യയുടെ ദേശീയ സുരക്ഷ സംരക്ഷിക്കാൻ ഉത്തരവാദിത്തമുള്ള ഒരാൾ എങ്ങനെ ഇന്റർനെറ്റ് ഉപയോഗിക്കാതെ ജീവിക്കുന്നുവെന്നത് ആളുകളിൽ ആകാംഷ സൃഷ്ടിച്ചു.

ഇന്ത്യയുടെ ദേശീയ സുരക്ഷാ ഉപദേഷ്ടാവാകുന്ന അഞ്ചാമത്തെ വ്യക്തിയാണ് അജിത് ഡോവൽ. 1968 ബാച്ച് കേരള കേഡർ ഐപിഎസ് ഉദ്യോഗസ്ഥനാണ്. 1945-ൽ ഉത്തരാഖണ്ഡിൽ ജനിച്ച ഡോവൽ 1968-ൽ ഐപിഎസിൽ ചേർന്നു. ധീരതയ്ക്ക് കീർത്തിചക്ര ലഭിച്ച ഏറ്റവും പ്രായം കുറഞ്ഞ പൊലീസ് ഉദ്യോഗസ്ഥനായിരുന്നു. 1999ലെ കാണ്ഡഹാർ രക്ഷാദൗത്യം, 2016ൽ പാക്കിസ്ഥാനു നേരെ നടത്തിയ സർജിക്കൽ സ്ട്രൈക്ക്, 2019ലെ ബാലാകോട്ട് ആക്രമണം എന്നീ ദൗത്യങ്ങളിലെല്ലാം അജിത് ഡോവൽ നിർണായക പങ്കാണ് വഹിച്ചത്.