ഓഹരി വിപണി കൂപ്പുകുത്തുമ്പോള്‍ ഇന്ത്യന്‍ നിക്ഷേപകര്‍ ചെയ്യേണ്ടതെന്ത്?

APRIL 9, 2025, 3:13 AM

ഓഹരി വിപണികള്‍ ആഗോളതലത്തില്‍ തന്നെ വലിയ അസ്ഥിരതയാണ് നേരിടുന്നത്. യു.എസ് പ്രസിഡന്റ് ഡൊണാള്‍ഡ് ട്രംപ് ഏര്‍പ്പെടുത്തിയ താരിഫുകള്‍ എങ്ങനെ പ്രതിഫലിക്കുമെന്ന് ഈ ഘട്ടത്തില്‍ ആര്‍ക്കും ഒരു സൂചനയും ഇല്ലാത്ത അവസ്ഥയാണ്. വിപണിയുടെ ഈ പ്രക്ഷുബ്ധ ഘട്ടത്തില്‍ എന്താണ് സംഭവിക്കുകയെന്ന് കാത്തിരുന്ന് കാണുക എന്നതാണ് ഏറ്റവും നല്ല തന്ത്രം.

ദിനംപ്രതി വര്‍ധിച്ചുവരുന്ന വ്യാപാര താരിഫ് അനിശ്ചിതത്വങ്ങള്‍ക്കിടയില്‍ വിപണിയിലെ ചാഞ്ചാട്ടം സമീപ ഭാവിയിലും നിലനില്‍ക്കുമെന്നാണ് പ്രതീക്ഷിക്കുന്നത്. എങ്കിലും ദീര്‍ഘകാല നിക്ഷേപ അവസരങ്ങള്‍ ഇപ്പോഴും നിലനില്‍ക്കുന്നുണ്ട്. മാന്ദ്യത്തെക്കുറിച്ചുള്ള ആശങ്കകള്‍ നിലനില്‍ക്കുന്നതിനെതിരെ ഇന്ത്യയിലെ നിക്ഷേപകര്‍ ജാഗ്രത പാലിക്കണമെന്നും എന്നാല്‍ പരിഭ്രാന്തരാകേണ്ടതില്ല. നിലവിലെ വിപണി സാഹചര്യത്തില്‍ സന്തുലിതമായ ഒരു സമീപനമാണ് നിലനിര്‍ത്തേണ്ടത്.

പ്രധാനപ്പെട്ട മൂന്ന് കാര്യങ്ങള്‍

1. ട്രംപ് താരിഫുകള്‍ അധികകാലം തുടരില്ല.

2. യുഎസിലേക്കുള്ള ഇന്ത്യയുടെ കയറ്റുമതി ഏകദേശം രണ്ട് ശതമാനം മാത്രമായതിനാല്‍ ഇന്ത്യയുടെ വളര്‍ച്ചയില്‍ കാര്യമായ സ്വാധീനമുണ്ടാകില്ല. അതിനാല്‍ ഇന്ത്യ താരതമ്യേന മെച്ചപ്പെട്ട നിലയിലാണ്.

3. ഇന്ത്യ യുഎസുമായി ഉഭയകക്ഷി വ്യാപാര കരാറിനുള്ള ചര്‍ച്ചകള്‍ നടത്തി വരികയാണ്. ഇത് വിജയകരമാകാനും അതിന്റെ ഫലമായി ഇന്ത്യക്ക് കുറഞ്ഞ താരിഫുകള്‍ ലഭിക്കാനും സാധ്യതയുണ്ട്.

ശ്രദ്ധിക്കേണ്ട മേഖലകള്‍

സാമ്പത്തിക, വ്യോമയാനം, ഹോട്ടലുകള്‍, തിരഞ്ഞെടുത്ത വാഹനമേഖലകള്‍, സിമന്റ്, പ്രതിരോധം, ഡിജിറ്റല്‍ പ്ലാറ്റ്ഫോമം കമ്പനികള്‍ തുടങ്ങിയ മേഖലകള്‍ നിലവിലുള്ള പ്രതിന്ധിയില്‍ നിന്ന് താരതമ്യേന സുരക്ഷിതമായി പുറത്തുവരാനുള്ള സാധ്യതയുണ്ട്. ഫാര്‍മസ്യൂട്ടിക്കല്‍സ് മേഖലയില്‍ ട്രംപ് നിലവില്‍ താരിഫ് ചുമത്താന്‍ സാധ്യതയില്ല. അതിനാല്‍, ഇവയെല്ലാം ചെറുത്തുനില്‍ക്കാന്‍ സാധ്യതയുണ്ട്.

ധനകാര്യം, എണ്ണ, വാതകം, ഉപഭോഗം, എഫ്എംസിജി തുടങ്ങിയ മേഖലകളില്‍ ദീര്‍ഘകാല നിക്ഷേപകര്‍ക്ക് ആപേക്ഷിക സ്ഥിരത വാഗ്ദാനം ചെയ്യുന്നു.

നിലവില്‍ ആപേക്ഷിക ശക്തിയും ചെറുത്തുനില്‍പ്പും കാണിക്കുന്ന എഫ്എംസിജി, ഫാര്‍മ, ഫിനാന്‍സ് തുടങ്ങിയ മേഖലകളിലേക്ക് ശ്രദ്ധ കേന്ദ്രീകരിക്കണം.

മ്യൂച്വല്‍ ഫണ്ട് എസ്ഐപിക്ക് അനുയോജ്യമായ മാര്‍ക്കറ്റ് പരിസ്ഥിതി

ദീര്‍ഘകാല നേട്ടത്തിന് നിഫ്റ്റി ജൂനിയര്‍(നിഫ്റ്റി നെക്സ്റ്റ് 50), നിഫ്റ്റി ഇടിഎഫുകള്‍ എന്നിവ നല്ല ഓപ്ഷനുകളാണ്. എങ്കിലും അവയ്ക്ക് ചില ഹ്രസ്വകാല ചാഞ്ചാട്ടങ്ങള്‍ ദൃശ്യമായേക്കും. മ്യൂച്വല്‍ ഫണ്ടുകളില്‍ എസ്ഐപികള്‍ വഴി നിക്ഷേപം ആരംഭിക്കുന്നതിന് ഈ മാര്‍ക്കറ്റ് അന്തരീക്ഷം അനുയോജ്യമാണ്. ഇത് വിപണിയിലെ ചാഞ്ചാട്ടം പ്രതിരോധിക്കാനും കാലക്രമേണ സ്ഥിരമായി സമ്പത്ത് കെട്ടിപ്പടുക്കാനും സഹായിക്കും.

ഇന്ത്യ ദീര്‍ഘകാലമായി കേടുകൂടാതെയിരിക്കുകയാണെന്നും ഇത് ശുഭാപ്തിവിശ്വാസം പ്രകടിപ്പിക്കുന്നുതാണെന്നുമാണ് വിദഗ്ധരുടെ അഭിപ്രായം. നടപ്പ് സാമ്പത്തിക വര്‍ഷത്തില്‍ ഇന്ത്യയുടെ ജിഡിപി വളര്‍ച്ച 6.5 ശതമാനമായി കണക്കാക്കപ്പെടുന്നു. 2024-25 മുതല്‍ 2030-31 വരെ കടം ജിഡിപി അനുപാതം കുറഞ്ഞത് 5.1 ശതമാനം പോയി പോയിന്റുകളെങ്കിലും കുറയുമെന്നാണ് പ്രതീഷിക്കുന്നത്. ഇന്ത്യന്‍ ഓഹരി വിപണി മികച്ച പ്രകടനം കാഴ്ചവെക്കുന്നു.

വ്യാപാര യുദ്ധ ഭയം കുറയുന്നു:

മറ്റ് രാജ്യങ്ങള്‍ തത്തുല്യ ഇറക്കുമതി ചുങ്കം സംബന്ധിച്ച് ചര്‍ച്ചകള്‍ക്ക് തയ്യാറാണെന്നും ഇത് വ്യാപാര യുദ്ധ സംഘര്‍ഷങ്ങള്‍ക്ക് പരിഹാരമാകുമെന്നും യു.എസ് പ്രസിഡന്റ് ഡൊണാള്‍ഡ് ട്രംപ് പറഞ്ഞു. ട്രംപിന്റെ ഈ പ്രസ്താവന നിക്ഷേപകര്‍ പോസറ്റീവ് ആയി കണ്ടത് വിപണിക്ക് ഊര്‍ജം നല്‍കി.

ആഗോള വിപണികള്‍ ശക്തമായത്:

ഏഷ്യന്‍ വിപണികള്‍ ശക്തമായ നിലയിലാണ് ബുധനാഴ്ച വ്യാപാരം ആരംഭിച്ചത്. ജാപ്പനീസ് നിക്കി സൂചിക രാവിലത്തെ സെഷനില്‍ 5 ശതമാനത്തിലധികം നേട്ടമുണ്ടാക്കി. ഹോങ്കോങ്ങിന്റെ ഹാംഗ് സെങ് സൂചിക ഏകദേശം 1.50 ശതമാനം ഉയര്‍ന്നു. മറ്റ് ഏഷ്യന്‍ വിപണികളും ശക്തമായ വാങ്ങല്‍ താല്‍പ്പര്യം പ്രകടിപ്പിക്കുന്നതാണ് കണ്ടത്.

ഷോര്‍ട്ട് കവറിംഗ്:

കറുത്ത തിങ്കളാഴ്ചയ്ക്ക് ശേഷം നിക്ഷേപകര്‍ക്ക് വലിയ അളവില്‍ ഷോര്‍ട്ട് പൊസിഷനുകള്‍ ഉണ്ടായിരുന്നു. ശക്തമായ വില്‍പ്പനയ്ക്ക് ശേഷമുളള ഷോര്‍ട്ട് കവറിംഗ് ആയി ഇതിനെ കാണാവുന്നതാണ്. നിക്ഷേപകരുടെ ഈ ഷോര്‍ട്ട് കവറിംഗ് വിപണിയില്‍ ഒരു ആശ്വാസ റാലിക്ക് കാരണമായതായി വിലയിരുത്താം.

എം.പി.സി മീറ്റിംഗ്:

ആര്‍ബിഐയുടെ പണനയ അവലോകന യോഗം പുരോഗമിക്കുകയാണ്. പലിശ നിരക്ക് കാല്‍ ശതമാനം കുറയ്ക്കുമെന്ന് വിപണി പ്രതീക്ഷിക്കുന്നുണ്ട്. ഇത് നിക്ഷേപകരുടെ വാങ്ങല്‍ പ്രവണതയ്ക്ക് ആക്കം കൂട്ടി.

2025 ലെ മികച്ച നാലാം പാദ ഫലങ്ങള്‍:

കമ്പനികളുടെ മികച്ച നാലാം പാദ ഫലങ്ങളും വിപണിക്ക് ശക്തി പകര്‍ന്നു. വ്യവസായങ്ങള്‍ക്ക് ശക്തമായി മുന്നോട്ടു പോകാനാകുന്ന അവസ്ഥ നിക്ഷേപകര്‍ക്ക് കരുത്ത് പകരുന്നതാണ്.