2026 ജൂലൈ 9 മുതൽ 12 വരെ ഷിക്കാഗോയിലെ ചരിത്രപ്രശസ്തമായ മക്കോർമിക് പ്ലേസിൽ നടക്കുന്ന സീറോ മലബാർ കൺവെൻഷന്റെ രജിസ്‌ട്രേഷൻ കിക്കോഫ് ഡാളസിലെ സെന്റ് തോമസ് പള്ളിയിൽ ഒക്ടോബർ 26ന് നടത്തുകയുണ്ടായി. കൺവെൻഷൻ കൺവീനർ ഫാ: തോമസ് കടുകപ്പിള്ളിയുടെ നേതൃത്വത്തിൽ ജോസഫ് ചാമക്കാല, ബിജി സി. മാണി, സജി വർഗീസ് എന്നീ കൺവെൻഷൻ ടീം എക്‌സിക്യൂട്ടീവ് അംഗങ്ങൾ രജിസ്‌ട്രേഷൻ കിക്കോഫിനായി എത്തിയിരുന്നു.

ഇടവക വികാരി ഫാ. സിബി സെബാസ്റ്റ്യൻ ടീം അംഗങ്ങളെ ഹാർദ്ദവമായി സ്വീകരിച്ചു. രൂപതയുടെ പ്രഥമ ഇടയൻ മാർ ജേക്കബ് അങ്ങാടിയത്ത് കിക്കോഫ് നിർവഹിക്കുകയും കൺവെൻഷന് എല്ലാ ആശംസകളും നേരുകയും ചെയ്തു. ഇടവക ഒന്നാകെ ഈ കൺവെൻഷനിൽ പങ്കു ചേരണമെന്ന് താൻ ആഗ്രഹിക്കുന്നതായി പിതാവ് പറഞ്ഞു.

ഒക്ടോബർ 26ന് 80-ാം പിറന്നാൾ ആഘോഷിച്ച പിതാവിന് കത്തീഡ്രലിന്റെ പേരിലും കൺവെൻഷൻ കമ്മിറ്റിയുടെ പേരിലും ടീം അംഗങ്ങൾ ആശംസയും പ്രാർത്ഥനയും അറിയിച്ചു. വളരെ ചെറിയ തുടക്കത്തിൽ നിന്ന് അമേരിക്കയിൽ അനേകം ഇടവകകളും, മിഷനുകളും ആയി വളർന്നു പന്തലിച്ച് സീറോ മലബാർ രൂപത ഈ രജത ജൂബിലി വർഷത്തിൽ നിൽക്കുമ്പോൾ അതിന്റെ പിന്നിൽ ദീർഘവീക്ഷകനും എളിമയുടെ തന്നെ മാതൃകയുമായ മാർ ജേക്കബ് അങ്ങാടിയത്ത് പിതാവിന്റെ പ്രാർത്ഥനകളും പരിശ്രമങ്ങളും ആയിരുന്നു. പിതാവിന് ആയുരാരോഗ്യങ്ങൾ ഏവരും ആശംസിച്ചു.

അമേരിക്കയിലെ സീറോ മലബാർ വിശ്വാസികളെ ഒരു കുടക്കീഴിൽ ഒന്നിച്ച് ചേർക്കുന്ന ഈ മഹാസമ്മേളനം കടലുകൾക്കിപ്പുറവും വിശ്വാസവും സംസ്‌കാരവും ഹൃദയത്തിൽ ചേർത്തുനിർത്തുന്ന ഏവർക്കും ഒന്നിച്ചു ചേരാനും, പരസ്പര സ്‌നേഹം പങ്കുവയ്ക്കുവാനും, വിശ്വാസപ്രഘോഷണം നടത്തുവാനും ഉള്ള ഒരു അവസരം ആയിരിക്കും. നാല് ദിവസങ്ങളിലായി നടത്തുന്ന ഈ കൺവെൻഷനിൽ ദിവസേനയുള്ള വിശുദ്ധ കുർബാന, ആരാധന എന്നിവയോടൊപ്പം വിദഗ്ധർ നയിക്കുന്ന ക്ലാസുകളും, ബിസിനസ് മീറ്റുകളും വിവിധ സംഘടനകളുടെ കൂട്ടായ്മകളും. നാളിതുവരെ ഇടവകയെ നയിച്ചവർക്കുള്ള ആദരവും, വൈവിധ്യമാർന്ന കലാപരിപാടികളും യുവജനങ്ങൾക്കുള്ള പ്രത്യേക പരിപാടികളും ഒരുക്കിയിരിക്കുന്നു. രൂപതാ അധ്യക്ഷൻ മാർ ജോയ് ആലപ്പാട്ട് എല്ലാ വിശ്വാസികളെയും ഈ കൂട്ടായ്മയിലേക്ക് ക്ഷണിക്കുന്നു.

രൂപതയിലെ എല്ലാ പള്ളികളിലെയും കൺവെൻഷൻ പ്രതിനിധികളോട് ചേർന്ന് രജിസ്‌ട്രേഷൻ പ്രവർത്തനങ്ങൾ നടത്തുവാനുള്ള സംവിധാനത്തിന്റെ ഭാഗമായി എല്ലാ ഇടവകകളും സന്ദർശിക്കുവാൻ ശ്രമിക്കുന്നതായി കൺവെൻഷൻ ടീം അറിയിച്ചു. വിവരങ്ങൾ പങ്കുവയ്ക്കുക വഴി കൺവെൻഷൻ രജിസ്‌ട്രേഷൻ എളുപ്പമാവുകയും കൂടുതൽ വിശ്വാസികളെ ഈ മഹാ കൂട്ടായ്മയിൽ പങ്കു ചേർക്കാൻ കഴിയുകയും ചെയ്യുമെന്ന് ടീം വിശ്വസിക്കുന്നു.

ഗാർലൻഡ് ഇടവകയിലെ വികാരിയച്ചന്റെയും ട്രസ്റ്റുമാരുടെയും പാരിഷ് പ്രതിനിധികളുടെയും ഇടവകാംഗങ്ങളുടെയും വളരെ ഹൃദ്യമായ സ്വീകരണത്തിനും സഹകരണത്തിനും കൺവെൻഷൻ ടീം പ്രത്യേകം നന്ദി അറിയിച്ചു. ഇടവകയിലെ യുവജനങ്ങളുടെ പങ്കാളിത്തം പ്രത്യേകം ശ്രദ്ധേയമായിരുന്നു. അമ്പതിൽപരം രജിസ്‌ട്രേഷനുകൾ ഇടവകാംഗങ്ങൾ കൺവെൻഷൻ ടീമിന് കൈമാറി.

കൺവെൻഷന്റെ കൂടുതൽ വിവരങ്ങൾ അറിയുവാനും, രജിസ്‌ട്രേഷൻ നടത്തുവാനും www.syroconvention.org എന്ന വെബ്‌സൈറ്റ് സന്ദർശിക്കാവുന്നതാണ്.

ബീനാ വള്ളിക്കളം

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്