ഷിക്കാഗോ, നവംബർ 6, 2026: ലോകപ്രമുഖ സാങ്കേതിക കമ്പനിയായ ഐ.ബി.എംന്റെ ഏറ്റവും ആധുനിക ക്വാണ്ടം കമ്പ്യൂട്ടിംഗ് സംവിധാനമായ IBM Quantum System Two ഷിക്കാഗോയിലെ ഹൈഡ് പാർക്കിൽ പ്രവർത്തനമാരംഭിച്ചു. ഇല്ലിനോയി ഗവർണർ ജെ.ബി. പ്രിറ്റ്‌സ്‌കർ, ഐ.ബി.എം പ്രതിനിധികൾ, യൂണിവേഴ്‌സിറ്റി ഓഫ് ഷിക്കാഗോ അധികൃതർ എന്നിവർ പങ്കെടുത്ത ചടങ്ങിലാണ് പുതിയ സംവിധാനം ഔദ്യോഗികമായി അനാച്ഛാദനം ചെയ്തത്.

ഇല്ലിനോയിയിൽ ഐ.ബി.എം സ്ഥാപിക്കുന്ന ആദ്യത്തെ ക്വാണ്ടം കമ്പ്യൂട്ടറാണിത്. യൂണിവേഴ്‌സിറ്റി ഓഫ് ഷിക്കാഗോയുടെ നേതൃത്വത്തിൽ 5207 സൗത്ത് ഹാർപ്പർ അവന്യൂവിലുള്ള Hyde Park Lab ലാണ് സംവിധാനം സ്ഥാപിച്ചിരിക്കുന്നത്.

പരമ്പരാഗത കമ്പ്യൂട്ടറുകൾക്ക് ഏറെ സമയമെടുക്കുന്ന ചില സങ്കീർണമായ ശാസ്ത്രീയ പ്രശ്‌നങ്ങൾ പരിഹരിക്കുന്നതിനുള്ള പുതിയ സാധ്യതകളാണ് ക്വാണ്ടം കമ്പ്യൂട്ടിംഗ് തുറന്നുകൊടുക്കുന്നത്. ഔഷധ ഗവേഷണം, പുതിയ മരുന്നുകളുടെ കണ്ടെത്തൽ, ഊർജവിതരണ ശൃംഖലകളുടെ കാര്യക്ഷമത, രാസതന്മാത്രകളുടെ പഠനം തുടങ്ങിയ മേഖലകളിൽ ഈ സാങ്കേതികവിദ്യ പ്രയോജനപ്പെടുത്താനാണ് ഗവേഷകർ ലക്ഷ്യമിടുന്നത്.

ഐ.ബി.എം വികസിപ്പിച്ച Quantum Nighthawk പ്രോസസറാണ് പുതിയ സംവിധാനത്തിന്റെ പ്രധാന ഘടകം. 120 ക്വിബിറ്റുകളുള്ള ഈ പ്രോസസർ ഉപയോഗിച്ച് കൂടുതൽ സങ്കീർണമായ ക്വാണ്ടം കണക്കുകൂട്ടലുകൾ നടത്താൻ സാധിക്കും.

അനാച്ഛാദന ചടങ്ങിൽ സംസാരിച്ച ഗവർണർ പ്രിറ്റ്‌സ്‌കർ, അടുത്ത തലമുറയിലെ സാങ്കേതിക കണ്ടുപിടുത്തങ്ങൾ ഇല്ലിനോയിയിൽ നടക്കണമെന്നും അതുവഴി സൃഷ്ടിക്കപ്പെടുന്ന തൊഴിലവസരങ്ങളുടെയും സാമ്പത്തിക വളർച്ചയുടെയും പ്രയോജനം സംസ്ഥാനത്തെ ജനങ്ങൾക്ക് ലഭിക്കണമെന്നും വ്യക്തമാക്കി.

സംസ്ഥാന സർക്കാരിന്റെ 25 മില്യൺ ഡോളർ ഗ്രാന്റിന്റെ പിന്തുണയോടെയാണ് പുതിയ ക്വാണ്ടം കമ്പ്യൂട്ടർ സ്ഥാപിക്കുന്നതിനുള്ള സാങ്കേതിക തയ്യാറെടുപ്പുകളും ഉപകരണങ്ങൾ വാങ്ങുന്നതും നടപ്പാക്കിയത്.

നിലവിൽ ഹൈഡ് പാർക്കിൽ പ്രവർത്തിക്കുന്ന കമ്പ്യൂട്ടർ, ഷിക്കാഗോയുടെ തെക്കുകിഴക്കൻ മേഖലയിൽ വികസിപ്പിച്ചുവരുന്ന Illinois Quantum and Microeletcronics Park പൂർത്തിയാകുതോടെ അവിടേക്ക് മാറ്റിസ്ഥാപിക്കും. പുതിയ ഗവേഷണ കേന്ദ്രത്തിന്റെ പ്രധാന സാങ്കേതിക സംവിധാനങ്ങളിലൊന്നായി ഇത് പ്രവർത്തിക്കും.

അതേസമയം, ആർട്ടിഫിഷ്യൽ ഇന്റലിജൻസ്, സൈബർ സുരക്ഷ, ഡാറ്റാ സയൻസ്, ക്വാണ്ടം കമ്പ്യൂട്ടിംഗ് തുടങ്ങിയ മേഖലകൾ ഉൾപ്പെടുത്തി ഷിക്കാഗോയിൽ 750 തൊഴിലവസരങ്ങൾ സൃഷ്ടിക്കുന്ന FutureNow Chicago പദ്ധതി ഐ.ബി.എം നേരത്തെ പ്രഖ്യാപിച്ചിരുന്നു. പുതിയ ക്വാണ്ടം കമ്പ്യൂട്ടറിന്റെ വരവ് സംസ്ഥാനത്തെ ഗവേഷണ സ്ഥാപനങ്ങൾക്കും സ്റ്റാർട്ടപ്പുകൾക്കും സാങ്കേതിക വിദ്യാഭ്യാസ സ്ഥാപനങ്ങൾക്കും കൂടുതൽ അവസരങ്ങൾ നൽകുമെന്നാണ് അധികൃതരുടെ പ്രതീക്ഷ.

Argonne National Laboratory, Fermilab, Universtiy of Chicago, Universtiy of Illinois തുടങ്ങിയ പ്രമുഖ ഗവേഷണ സ്ഥാപനങ്ങളുടെ സാന്നിധ്യവും ഐ.ബി.എംന്റെ പുതിയ നിക്ഷേപവും ക്വാണ്ടം സാങ്കേതികവിദ്യയുടെ അന്താരാഷ്ട്ര കേന്ദ്രമായി ഷിക്കാഗോയെ വളർത്താനുള്ള ഇല്ലിനോയിയുടെ ശ്രമങ്ങൾക്ക് കൂടുതൽ കരുത്തേകുന്നു.

അനിൽ മറ്റത്തിക്കുന്നേൽ

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്