ഇന്ന് വിദ്യാരംഭം! അറിവിന്റെ ആദ്യാക്ഷരം കുറിച്ച് കുരുന്നുകൾ

OCTOBER 13, 2024, 6:54 AM

കൊച്ചി: നവരാത്രി ആഘോഷങ്ങൾക്ക് പിന്നാലെ വിജയദശമി ദിനത്തിൽ അറിവിന്റെ ആദ്യാക്ഷരം കുറിച്ച് കുരുന്നുകൾ.

തുഞ്ചൻ പറമ്പിലും കൊല്ലൂർ മൂകാംബികാ ക്ഷേത്രത്തിലുമടക്കം ആയിരക്കണക്കിന് പേരാണ് വിദ്യാരംഭം കുറിക്കാൻ കുട്ടികളുമായെത്തിയിരിക്കുന്നത്.

ദക്ഷിണ മൂകാംബിക എന്നറിയപ്പെടുന്ന പനച്ചിക്കാട് ദേവീ ക്ഷേത്രത്തിലും വിദ്യാരംഭം കുറിക്കാൻ നിരവധി പേർ എത്തി. പുലർച്ചെ നാല് മണിയോടെയാണ് പനച്ചിക്കാട് വിദ്യാരംഭച്ചടങ്ങുകൾ ആരംഭിച്ചത്.

നവരാത്രി ആഘോഷങ്ങളുടെ പത്താം ദിവസമാണ് വിജയദശമി എന്നറിയപ്പെടുന്ന ദസറ ആഘോഷിക്കുന്നത്. ദസറ എന്നത് രാക്ഷസ രാജാവായ രാവണനുമേല്‍ ശ്രീരാമന്‍ നേടിയ വിജയം ആഘോഷിക്കുന്ന ഉത്സവമാണ്.

വടക്കു കിഴക്കന്‍ സംസ്ഥാനങ്ങളില്‍ അസുര രാജാവായ മഹിഷാസുരനെ ദുര്‍ഗാ ദേവി വധിച്ചതിന്റെ ആഘോഷമാണ്. ദുര്‍ഗ പൂജ ആഘോഷങ്ങളുടെ അവസാനം കൂടിയാണ് ഈ ദിവസം. ആദിപരാശക്തി, സരസ്വതിദേവിയായി മാറുന്നത് വിജയദശമി നാളിലാണ്.