പ്രസവ ചികിത്സയ്‌ക്ക് എത്തിയ യുവതിയുടെ നഗ്നദൃശ്യങ്ങള്‍ കാമുകനുമായി പങ്കുവച്ചു; ചികിത്സാ കേന്ദ്രത്തിലെ ജീവനക്കാരി അറസ്റ്റില്‍

NOVEMBER 15, 2024, 7:46 AM

മലപ്പുറം: പ്രസവ പരിചരണ കേന്ദ്രത്തില്‍ കഴിഞ്ഞിരുന്ന യുവതിയുടെ നഗ്ന ദൃശ്യങ്ങള്‍ കാമുകന് കൈമാറിയ ജീവനക്കാരി അറസ്റ്റില്‍.

വീഡിയോ കോള്‍ വഴിയാണ് ഇവർ കാമുകന് യുവതിയുടെ നഗ്ന ദൃശ്യങ്ങള്‍ നല്‍കിയത്. സംഭവത്തിൽ മാറഞ്ചേരി പുറങ്ങ് സ്വദേശിനി ഉഷയെ (24) പൊന്നാനി പൊലീസ് അറസ്റ്റ് ചെയ്തു.

വെളിയങ്കോടുള്ള പ്രസവ പരിചരണ കേന്ദ്രത്തിലാണ് സംഭവം. പരിചരണത്തിന്റെ ഭാഗമായി യുവതി കുഴമ്പ് തേച്ച്‌ കിടക്കുന്നതിനിടെ ജീവനക്കാരി കാമുകന് വീഡിയോ കോള്‍ ചെയ്യുകയായിരുന്നു. ഇത് ശ്രദ്ധയില്‍പെട്ട പരിചരണകേന്ദ്രത്തിലെ മറ്റൊരു സ്ത്രീയാണ് വിവരം ചികിത്സയിലുള്ള യുവതിയെ അറിയിച്ചത്

യുവതി ഉടൻ തന്നെ ബന്ധുക്കളെ വിവരമറിയിക്കുകയും ഇവർ ജീവനക്കാരിയുടെ ഫോണ്‍ പരിശോധിക്കുകയുമായിരുന്നു. ഫോണില്‍ വീഡിയോ കോള്‍ ചെയ്തതായി കണ്ടെത്തിയതോടെ ബന്ധുക്കള്‍ പൊന്നാനി പൊലീസിന് പരാതി നല്‍കുകയായിരുന്നു.

തുടർന്ന് പരിചരണ കേന്ദ്രത്തിലെത്തിയ പൊലീസ് പ്രതിയെ അറസ്റ്റ് ചെയ്തു. ഇവരുടെ ആണ്‍ സുഹൃത്തിനെതിരെയും കേസെടുത്തിട്ടുണ്ട്.