റോഡിന്റെ വശങ്ങളിൽ വൈദ്യുതാലങ്കാര പണിയിൽ ഏർപ്പെട്ടിരുന്ന ആളെ ഇടിച്ചു തെറിപ്പിച്ചു കാർ; യുവാവിന് ദാരുണാന്ത്യം

FEBRUARY 6, 2025, 9:53 PM

തിരുവനന്തപുരം: വെള്ളനാടിനു സമീപം കൂവക്കുടിയിൽ നിയന്ത്രണംവിട്ട കാറിടിച്ച് പരുക്കേറ്റയാൾ മരിച്ചതായി റിപ്പോർട്ട്. കണ്ണമ്പള്ളി ലളിത ഭവനിൽ ബിജു(42) ആണ് മരിച്ചത്. ഞായറാഴ്ച വൈകീട്ട് നാലുമണിയോടെ കൂവക്കുടി പാലത്തിന് സമീപമായിരുന്നു അപകടം ഉണ്ടായത്.

സമീപത്തെ ക്ഷേത്രത്തിലെ ഉത്സവവുമായി ബന്ധപ്പെട്ട് റോഡിന്റെ വശങ്ങളിൽ വൈദ്യുതാലങ്കാര പണിയിൽ ഏർപ്പെട്ടിരുന്ന ബിജുവിനെ അമിത വേഗത്തിൽ പോവുകയായിരുന്ന കാർ ഇടിച്ചു തെറിപ്പിക്കുകയായിരുന്നു. വെള്ളനാട്ട് നിന്ന് നെടുമങ്ങാട്ടേക്ക് പോകുന്ന കാർ ആണ് ഇടിച്ചു തെറിപ്പിച്ചത് എന്നാണ് ലഭിക്കുന്ന വിവരം.

അപകടത്തിൽ ഗുരുതരമായി പരുക്കേറ്റ ബിജു മെഡിക്കൽ കോളേജ് ആശുപത്രിയിൽ ചികിത്സയിലിരിക്കെയാണ് പുലർച്ചെ മരിച്ചത്.