പശ്ചിമേഷ്യ സംഘർഷം: ടിക്കറ്റ് നിരക്കിൽ ഇന്ധന സർചാർജ് ഏർപ്പെടുത്തി ആകാശ എയർ

MARCH 14, 2026, 6:12 AM

ഡൽഹി: ഇറാൻ – അമേരിക്ക, ഇസ്രയേൽ സംഘർഷം ശക്തമായ പശ്ചാത്തലത്തിൽ ടിക്കറ്റ് നിരക്കിൽ ഇന്ധന സർചാർജ് ഉൾപ്പെടുത്താനൊരുങ്ങി ആകാശ എയർ. നാളെ മുതൽക്കുള്ള ടിക്കറ്റ് നിരക്കുകളിൽ ഇന്ധന സർചാർജ് ഉൾപ്പെടുത്തുമെന്ന് കമ്പനി അറിയിച്ചു. 199 രൂപ മുതൽ 1300 രൂപ വരെയാണ് അധികമായി ഈടാക്കുക.

ഇന്ന് അർധരാത്രി മുതൽ പുതിയ നിരക്കുകൾ പ്രാബല്യത്തിൽ വരും. പശ്ചിമേഷ്യയിലെ സംഘർഷത്തെ തുടർന്ന് വിമാന ഇന്ധനവില ഉയർന്നതാണ് സർചാർജ് ഏർപ്പെടുത്താനുള്ള കാരണമെന്ന് കമ്പനി വിശദീകരിച്ചു. ഇതോടെ ആകാശ എയറിന്റെ ആഭ്യന്തരവും അന്താരാഷ്ട്രവുമായ യാത്രകളുടെ ചെലവ് കൂടാനാണ് സാധ്യത.

ഇതിനിടെ നിരവധി വിമാനക്കമ്പനികളും സമാനമായി ടിക്കറ്റ് നിരക്കിൽ ഇന്ധന സർചാർജ് ഉൾപ്പെടുത്തിയിട്ടുണ്ട്. കഴിഞ്ഞ ദിവസം ഇൻഡിഗോയും പുതിയ സർചാർജ് പ്രഖ്യാപിച്ചിരുന്നു.