എന്‍ജിനില്‍ തീപിടിച്ചെന്ന മുന്നറിയിപ്പ്: ബംഗളൂരു-ഡല്‍ഹി എയര്‍ ഇന്ത്യ വിമാനത്തിന് അടിയന്തര ലാന്‍ഡിങ്

MAY 21, 2026, 7:59 PM

ന്യൂഡല്‍ഹി: ബംഗളൂരുവില്‍ നിന്നും ഡല്‍ഹിയിലേക്ക് വന്ന എയര്‍ ഇന്ത്യ വിമാനത്തിന്റെ എന്‍ജിനില്‍ തീപിടിച്ചതായി കോക്ക്പിറ്റില്‍ മുന്നറിയിപ്പ് ലഭിച്ചതിനെ തുടര്‍ന്ന് ഡല്‍ഹി ഇന്ദിരാഗാന്ധി അന്താരാഷ്ട്ര വിമാനത്താവളത്തില്‍ വിമാനം ഇറക്കി. വ്യാഴാഴ്ച രാത്രി 9.30 ഓടെയായിരുന്നു സംഭവം. എയര്‍ബസ് എ320 ശ്രണിയില്‍പ്പെട്ട എI 2802 വിമാനമാണ് അടിയന്തര ലാന്‍ഡിങ് നടത്തിയത്.

വിമാനത്തിലുണ്ടായിരുന്ന 160-ലധികം യാത്രക്കാരും ക്രൂ അംഗങ്ങളും പൂര്‍ണ്ണ സുരക്ഷിതരാണ്. റണ്‍വേ 29ആര്‍-ല്‍ ലാന്‍ഡ് ചെയ്ത വിമാനത്തില്‍ നിന്നും മുഴുവന്‍ യാത്രക്കാരെയും സുരക്ഷിതമായി പുറത്തിറക്കിയ ശേഷം വിമാനം റണ്‍വേയില്‍ നിന്നും മാറ്റി. തുടര്‍ന്ന് രാത്രി 10.18 ഓടെയാണ് റണ്‍വേയിലെ ഗതാഗതം സാധാരണ നിലയിലായത്.

ഡല്‍ഹി വിമാനത്താവളത്തില്‍ ലാന്‍ഡിങ്ങിനായി ഒരുങ്ങുന്നതിനിടെ വിമാനത്തിന്റെ ഒരു എന്‍ജിനില്‍ തീപിടിച്ചതായി കോക്ക്പിറ്റിലെ ഫയര്‍ ഇന്‍ഡിക്കേഷന്‍ പാനലില്‍ മുന്നറിയിപ്പ് ലഭിക്കുകയായിരുന്നു എന്ന് എയര്‍ ഇന്ത്യ പ്രസ്താവനയിലൂടെ അറിയിച്ചു. ഈ മുന്നറിയിപ്പ് കൃത്യമായിരുന്നുവെന്ന് പ്രാഥമിക പരിശോധനയില്‍ വ്യക്തമായിട്ടുണ്ടെന്നും എയര്‍ ഇന്ത്യ വ്യക്തമാക്കി. എന്നാല്‍ എന്‍ജിനില്‍ യഥാര്‍ത്ഥത്തില്‍ തീപിടിത്തം ഉണ്ടായിട്ടുണ്ടോ അതോ സാങ്കേതിക തകരാറാണോ എന്ന് സ്ഥിരീകരിക്കാന്‍ വിശദമായ പരിശോധനകള്‍ ആവശ്യമാണെന്ന് വ്യോമയാന വൃത്തങ്ങള്‍ സൂചിപ്പിച്ചു.

സ്റ്റാന്‍ഡേര്‍ഡ് ഓപ്പറേറ്റിങ് നടപടിക്രമങ്ങളെല്ലാം പാലിച്ച് ജീവനക്കാര്‍ വിമാനം സുരക്ഷിതമായി ലാന്‍ഡ് ചെയ്യിക്കുകയായിരുന്നു. സംഭവത്തെക്കുറിച്ച് ഏവിയേഷന്‍ റെഗുലേറ്ററി അതോറിറ്റികളുമായി ചേര്‍ന്ന് വിശദമായ അന്വേഷണം ആരംഭിച്ചതായി എയര്‍ ഇന്ത്യ വക്താവ് അറിയിച്ചു.

ഇതേ ദിവസം തന്നെ ഡല്‍ഹിയില്‍ നിന്നും ബംഗളൂരുവിലേക്ക് പറന്ന മറ്റൊരു എയര്‍ ഇന്ത്യ വിമാനവും (AI 2651) അപകടത്തില്‍പ്പെട്ടിരുന്നു. ബംഗളൂരു വിമാനത്താവളത്തില്‍ ലാന്‍ഡ് ചെയ്യുന്നതിനിടെ വിമാനത്തിന്റെ പിന്‍ഭാഗം റണ്‍വേയില്‍ തട്ടുകയായിരുന്നു. വിമാനത്താവളത്തിന് സമീപം മറ്റൊരു വലിയ വിമാനം ലാന്‍ഡ് ചെയ്തതു മൂലമുണ്ടായ വായുസഞ്ചാര വ്യതിയാനമാണ് ഈ അപകടത്തിന് കാരണമായത്. ഈ വിമാനത്തിലുണ്ടായിരുന്ന 181 യാത്രക്കാരും സുരക്ഷിതരാണ്. നിലവില്‍ ഈ വിമാനം വിശദമായ പരിശോധനകള്‍ക്കായി ഗ്രൗണ്ട് ചെയ്തിരിക്കുകയാണ്.