ലണ്ടന്: ഇംഗ്ലണ്ടില് യു.എസ് വ്യോമസേനയുടെ ദീര്ഘദൂര ബോംബര് വിമാനങ്ങള് താവളമടിച്ചിരിക്കുന്ന പ്രധാന വ്യോമസേനാ കേന്ദ്രത്തിന് സമീപം വന് ഭീകരാക്രമണ പദ്ധതി. സംഭവവുമായി ബന്ധപ്പെട്ട് അഞ്ച് പേരെ യുകെ പോലീസ് അറസ്റ്റ് ചെയ്തു. ഭീകരവിരുദ്ധ നിയമപ്രകാരവും സ്ഫോടകവസ്തുക്കള് കൈവശം വെച്ചതിനുമാണ് കേസ്. പ്രദേശവാസികള് നല്കിയ വിവരത്തിന്റെ അടിസ്ഥാനത്തില് അര്ദ്ധരാത്രിക്ക് ശേഷമാണ് പോലീസ് മിന്നല് പരിശോധന നടത്തി ഇവരെ പിടികൂടിയത്.
അറസ്റ്റിലായവരുടെ വിവരങ്ങളോ ഇവരുടെ യഥാര്ത്ഥ ലക്ഷ്യമോ പോലീസ് ഇതുവരെ പുറത്തുവിട്ടിട്ടില്ല. അതേസമയം, ഇവര് വന് സ്ഫോടനത്തിനും ഭീകരാക്രമണത്തിനുമുള്ള തയ്യാറെടുപ്പുകള് നടത്തിയിരുന്നതായി കൗണ്ടര് ടെററിസം പോലീസ് സ്ഥിരീകരിച്ചു. സംഭവത്തെ തുടര്ന്ന് യു.കെ സൈന്യത്തിന്റെ ബോംബ് നിര്വീര്യകരണ വിഭാഗം ഉടന് തന്നെ സ്ഥലത്തെത്തി പരിശോധന ആരംഭിച്ചു. സുരക്ഷാ മുന്കരുതലിന്റെ ഭാഗമായി പരിസരത്തെ ഡസന് കണക്കിന് വീടുകളില് നിന്ന് ആളുകളെ പൂര്ണമായി ഒഴിപ്പിച്ചിട്ടുണ്ട്.
വ്യോമതാവളത്തിന് സമീപമുള്ള വനമേഖലയില് നിര്ത്തിയിട്ടിരുന്ന മൂന്ന് വെളുത്ത വാനുകളില് രണ്ട് എണ്ണത്തിന്റെ പിന്വാതിലുകള് തുറന്ന നിലയിലായിരുന്നു. ഇവയ്ക്ക് ചുറ്റും കറുത്ത വലിയ സാമഗ്രികള് ചിതറിക്കിടക്കുന്നതും ബോംബ് നിര്വീര്യമാക്കുന്ന റോബോട്ട് പ്രദേശത്ത് പരിശോധന നടത്തുന്നതുമായ വ്യോമ ദൃശ്യങ്ങള് പുറത്തുവന്നിട്ടുണ്ട്. പ്രതികളെ അര്ദ്ധരാത്രിയില് കൈകള് പിന്നില് കൂട്ടിക്കെട്ടിയ നിലയില് അറസ്റ്റ് ചെയ്ത് മാറ്റുന്ന ദൃശ്യങ്ങളും മാധ്യമങ്ങള് പുറത്തുവിട്ടു.
ലക്ഷ്യം തന്ത്രപ്രധാനമായ ആര്.എ.എഫ് ഫെയര്ഫോര്ഡ്
ഇറാനെതിരെയുള്ള ആക്രമണങ്ങള്ക്കായി യു.എസ് സൈന്യം ഉപയോഗിക്കുന്ന തന്ത്രപ്രധാനമായ ആര്.എ.എഫ് ഫെയര്ഫോര്ഡ് വ്യോമ താവളത്തിന് സമീപമുള്ള വെല്ഫോര്ഡിലാണ് സംഭവം. യു.എസിന്റെ ബി-1 ബോംബര് വിമാനങ്ങളും ഗ്ലോബല് സ്ട്രൈക്ക് കമാന്ഡിന്റെ കേന്ദ്രവും ഇവിടെയാണ് സ്ഥിതി ചെയ്യുന്നത്. കഴിഞ്ഞ കുറച്ച് ആഴ്ചകളായി ബേസിന് ചുറ്റും വലിയ ട്രാക്ടറുകളും മറ്റും ഉപയോഗിച്ച് കനത്ത സുരക്ഷ ഏര്പ്പെടുത്തിയിരുന്നതായി പ്രദേശവാസികള് പറയുന്നു.
സ്ഥിതിഗതികള് വിലയിരുത്തി പ്രധാനമന്ത്രി
അടിയന്തര സാഹചര്യങ്ങള് നേരിടാന് യുകെ സായുധ സേനയും എമര്ജന്സി ടീമുകളും സദാസജ്ജമാണെന്ന് യുകെ പ്രതിരോധ സെക്രട്ടറി വെസ് സ്ട്രീറ്റിംഗ് വ്യക്തമാക്കി. യുകെ പ്രധാനമന്ത്രി ആന്റി ബര്ണഹാം സ്ഥിതിഗതികള് നിരന്തരം നിരീക്ഷിച്ച് വരികയാണ്. യുകെ ഭീകരവിരുദ്ധ നിയമപ്രകാരം കുറ്റം ചുമത്തുന്നതിന് മുന്പ് സംശയിക്കുന്നവരെ 14 ദിവസം വരെ പോലീസിന് കസ്റ്റഡിയില് വച്ച് ചോദ്യം ചെയ്യാന് സാധിക്കും. സംഭവത്തെ തുടര്ന്ന് വ്യോമതാവളത്തിലും പരിസര പ്രദേശങ്ങളിലും സുരക്ഷ അതീവ ശക്തമാക്കിയിട്ടുണ്ട്.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20260927022337.jpg)
-20260410052515.jpg)
-20260711065000.jpg){kind=spacer}
