ലെബനനുമായി ബന്ധപ്പെട്ട കള്ളപ്പണം വെളുപ്പിക്കല്‍ കേസ്: സ്വിറ്റ്‌സര്‍ലന്‍ഡ് എച്ച്എസ്ബിസി ബ്രാഞ്ചിനെതിരെ അന്വേഷണം

JULY 30, 2025, 9:04 PM

ന്യൂയോര്‍ക്ക്: ലെബനനുമായി ബന്ധപ്പെട്ട കള്ളപ്പണം വെളുപ്പിക്കല്‍ കേസില്‍ സ്വിറ്റ്‌സര്‍ലന്‍ഡ് എച്ച്എസ്ബിസി ബ്രാഞ്ചിനെതിരെ അന്വേഷണം. ലെബനന്‍ സെന്‍ട്രല്‍ ബാങ്കുമായി ബന്ധപ്പെട്ട കള്ളപ്പണം വെളുപ്പിക്കല്‍ സംബന്ധിച്ച് ബാങ്കിന്റെ സ്വിസ് സ്വകാര്യ ബാങ്കിംഗ് വിഭാഗത്തെക്കുറിച്ച് അന്വേഷണം നടത്തിവരികയാണെന്ന് സ്വിസ് അറ്റോര്‍ണി ജനറലിന്റെ ഓഫീസ് അറിയിച്ചു.

ലെബനന്റെ മുന്‍ സെന്‍ട്രല്‍ ബാങ്കിന്റെ മേധാവി കോടിക്കണക്കിന് ഡോളര്‍ തട്ടിയെടുത്തതായി ആരോപിക്കപ്പെടുന്ന കള്ളപ്പണം വെളുപ്പിക്കല്‍ സംബന്ധിച്ച സ്വിസ് അന്വേഷണത്തിന്റെ കേന്ദ്രബിന്ദുവാണ് എച്ച്എസ്ബിസി ഹോള്‍ഡിംഗ്‌സ് പിഎല്‍സിയുടെ സ്വിസ് സ്വകാര്യ ബാങ്ക് എന്നാണ് റിപ്പോര്‍ട്ട്. കേസുമായി ബന്ധപ്പെട്ട് എച്ച്എസ്ബിസി പ്രൈവറ്റ് ബാങ്ക് (സൂയിസ്) എസ്എ, പേര് വെളിപ്പെടുത്താത്ത ഒരു വ്യക്തി, മറ്റ് നാല് അജ്ഞാത വ്യക്തികള്‍ എന്നിവര്‍ക്കെതിരെ സ്വിസ് ഫെഡറല്‍ പ്രോസിക്യൂട്ടര്‍മാര്‍ ജനുവരിയില്‍ അന്വേഷണം ആരംഭിച്ചതായി ബുധനാഴ്ച ഒരു പ്രസ്താവനയില്‍ പറഞ്ഞു.

2020 മുതല്‍, ലെബനന്റെ മുന്‍ സെന്‍ട്രല്‍ ബാങ്ക് ഗവര്‍ണറായിരുന്ന റിയാദ് സലാമയെ ചുറ്റിപ്പറ്റിയുള്ള കേസ് സ്വിസ് പ്രോസിക്യൂട്ടര്‍മാര്‍ അന്വേഷിച്ചുവരികയാണ്. കഴിഞ്ഞ വര്‍ഷം പൊതു ഫണ്ട് ദുരുപയോഗം ചെയ്യുക, വ്യാജരേഖ ചമയ്ക്കുക, നിയമവിരുദ്ധ ഇടപെടല്‍, കള്ളപ്പണം വെളുപ്പിക്കല്‍ എന്നീ കുറ്റങ്ങളാണ് ഇാള്‍ക്കെതിരെ ചുമത്തിയിരിക്കുന്നത്. സലാമ മൂന്ന് പതിറ്റാണ്ടോളം ലെബനന്റെ സെന്‍ട്രല്‍ ബാങ്കിന്റെ തലവനായിരുന്നു. തുടര്‍ന്ന് സ്ഥാനമൊഴിഞ്ഞു.

യുഎസും യുകെയും അദ്ദേഹത്തിന് ഉപരോധം ഏര്‍പ്പെടുത്തിയിട്ടുണ്ട്. യുഎസ് ട്രഷറി അദ്ദേഹം തന്റെ അധികാര സ്ഥാനം ദുരുപയോഗം ചെയ്ത് തന്നെയും കൂട്ടാളികളെയും സമ്പന്നരാക്കിയെന്ന് ആരോപിച്ചു. സലാമ തനിക്കെതിരായ ആരോപണങ്ങള്‍ പലതവണ നിഷേധിച്ചിട്ടുണ്ട്, കൂടാതെ മുന്‍ ധനകാര്യ കരിയറില്‍ തന്റെ സമ്പത്ത് സമ്പാദിച്ചുവെന്ന് അദ്ദേഹം പറഞ്ഞു.

കള്ളപ്പണം വെളുപ്പിക്കല്‍ കേസില്‍ സ്വിസ്, ഫ്രഞ്ച് നിയമ നിര്‍വ്വഹണ ഏജന്‍സികള്‍ അന്വേഷണം നടത്തിവരികയാണെന്ന് ബുധനാഴ്ച നേരത്തെ യുകെ ബാങ്ക് അറിയിച്ചിരുന്നു. അന്വേഷണങ്ങള്‍ പ്രാരംഭ ഘട്ടത്തിലാണെന്നും രണ്ട് ചരിത്രപരമായ ബാങ്കിംഗ് ബന്ധങ്ങള്‍' എന്ന് ബാങ്ക് പറഞ്ഞതുമായി ബന്ധപ്പെട്ട സാധ്യമായ കുറ്റകൃത്യങ്ങള്‍ അധികൃതര്‍ പരിശോധിച്ചുവരികയാണെന്നും ഒരു പ്രസ്താവനയില്‍ പറയുന്നു. സ്ഥാപനത്തില്‍ ഉണ്ടാകാവുന്ന ആഘാതം ഗണ്യമായിരിക്കുമെന്ന് എച്ച്എസ്ബിസി മുന്നറിയിപ്പ് നല്‍കി.

രാഷ്ട്രീയക്കാരുടെ ഉടമസ്ഥതയിലുള്ള ഉയര്‍ന്ന അപകടസാധ്യതയുള്ള അക്കൗണ്ടുകളില്‍ എച്ച്എസ്ബിസിയുടെ സ്വകാര്യ ബാങ്ക് മതിയായ പരിശോധനകള്‍ നടത്തുന്നതില്‍ പരാജയപ്പെട്ടതായി സ്വിറ്റ്‌സര്‍ലന്‍ഡിന്റെ സാമ്പത്തിക നിയന്ത്രണ ഏജന്‍സി കഴിഞ്ഞ വര്‍ഷം പ്രഖ്യാപിച്ചിരുന്നു. 2002 നും 2015 നും ഇടയില്‍ നടത്തിയ മൊത്തം 300 മില്യണ്‍ ഡോളറിലധികം ഇടപാടുകളുമായി ബന്ധപ്പെട്ട ഗുരുതരമായ നിയമ ലംഘനങ്ങള്‍ കണ്ടെത്തിയതായി ഫിന്‍മ അന്ന് വ്യക്തമാക്കിയിരുന്നു.