ഹോങ്കോങ്ങിനെ വിഴുങ്ങി തീപിടിത്തം: മരണസംഖ്യ 44 ആയി

NOVEMBER 26, 2025, 7:20 PM

ഹോങ്കോങ്: വടക്കൻ തായ്പേയിൽ ബഹുനില പാർപ്പിട സമുച്ചയങ്ങളിലുണ്ടായ തീപിടിത്തത്തിൽ മരണസംഖ്യ 44 ആയി ഉയർന്നു. 279 പേരെ ഇനിയും കണ്ടെത്താനായിട്ടില്ലെന്ന് ഹോങ്കോങ് ചീഫ് എക്സിക്യൂട്ടീവ് ജോൺ ലീ അറിയിച്ചു.

മരിച്ചവരിൽ ഒരു അഗ്നിശമന സേനാംഗവും ഉൾപ്പെടുന്നു. രക്ഷാപ്രവർത്തനം തുടരുകയാണ്. ഇപ്പോഴും കെട്ടിടങ്ങളിൽ നിന്ന് പുക ഉയരുന്നുണ്ട്.

ആദ്യം 28 പേരെയാണ് രക്ഷാപ്രവർത്തകർ കണ്ടെത്തിയത്. ഇതിൽ ഒൻപത് പേർ സംഭവസ്ഥലത്ത് വെച്ച് തന്നെ മരിച്ചിരുന്നു. ആശുപത്രിയിൽ ചികിത്സയിലിരുന്നവർ പിന്നീട് മരണപ്പെട്ടു.

രണ്ട് പേർ ഇപ്പോഴും ഗുരുതരാവസ്ഥയിലാണ്. ഗുരുതരമായി പൊള്ളലേറ്റ നിലയിലാണ് ഇവരെ ആശുപത്രിയിൽ പ്രവേശിപ്പിച്ചത്. അഗ്നിശമന സേനാംഗങ്ങൾക്കും പരിക്കേറ്റിട്ടുണ്ട്.

ബുധനാഴ്ച ഉച്ചകഴിഞ്ഞാണ് തീപിടുത്തം ആരംഭിച്ചത്. ഏകദേശം 2,000 അപ്പാർട്ടുമെന്റുകളുള്ള എട്ട് കെട്ടിട സമുച്ചയത്തിലാണ് തീപിടുത്തം ഉണ്ടായത്. ഹോങ്കോങ്ങിന്റെ വടക്കൻ ജില്ലയായ തായ് പോയിലെ വാങ് ഫുക്ക് കോർട്ടിലെ നിരവധി അപ്പാർട്ട്മെന്റ് ബ്ലോക്കുകളെ തീവിഴുങ്ങി.

തീപിടിത്തത്തിനു പിന്നിലെ കാരണം കണ്ടെത്താൻ പോലീസും അഗ്നിരക്ഷാ സേനയും ചേർന്ന് പ്രത്യേക അന്വേഷണ സംഘം രൂപീകരിച്ചതായി ജോൺ ലീ പറഞ്ഞു. നൂറുകണക്കിന് താമസക്കാരെ ഒഴിപ്പിച്ചിട്ടുണ്ട്. 29 പേർ ആശുപത്രിയിൽ ചികിത്സയിലാണ്. നിലവിൽ തീ നിയന്ത്രണ വിധേയമാണെന്നും അദ്ദേഹം അറിയിച്ചു.