ഗാസയിലെ ഭരണസമിതി പിരിച്ചുവിട്ട് ഹമാസ്; സിവിലിയൻ ഭരണത്തിന് വഴിയൊരുക്കി പുതിയ നീക്കം

JULY 6, 2026, 7:23 AM

പലസ്തീൻ: ഗാസയിലെ ഭരണഘടനയിൽ നിർണായക മാറ്റത്തിന് തുടക്കമിട്ട് ഹമാസ്. ഗാസയുടെ ഭരണചുമതല വഹിച്ചിരുന്ന ഗവൺമെന്റ് എമർജൻസി കമ്മിറ്റി പിരിച്ചുവിടുകയും, സമിതി രാജിവെക്കുകയും ചെയ്തു. അന്താരാഷ്ട്ര പിന്തുണയോടെയുള്ള പുതിയ സിവിലിയൻ ഭരണസംവിധാനത്തിന് അധികാരം കൈമാറാനുള്ള നടപടിയുടെ ഭാഗമായാണ് ഈ തീരുമാനം.

ഗവൺമെന്റ് എമർജൻസി കമ്മിറ്റി തലവൻ മുഹമ്മദ് അബ്ദുൽ ഖാലിഖ് അൽ-ഫറ രാജിവെച്ചതോടെയാണ് ഗാസയെ ഏകദേശം രണ്ട് പതിറ്റാണ്ടായി ഭരിച്ചിരുന്ന ഭരണസംവിധാനം അവസാനിച്ചത്.

ഗാസയുടെ ഭരണത്തിനായി രൂപീകരിക്കുന്ന നാഷണൽ കമ്മിറ്റി ഫോർ ഗാസ അഡ്മിനിസ്ട്രേഷൻ (NCAG)-ലേക്ക് അധികാരം കൈമാറുന്നതിനുള്ള നടപടികൾ പൂർത്തിയായതായി ഹമാസ് അറിയിച്ചു. അലി ഷാത്ത് നേതൃത്വം നൽകുന്ന സാങ്കേതിക വിദഗ്ധരുടെ (ടെക്നോക്രാറ്റിക്) സമിതിയാണ് ഇനി സിവിലിയൻ ഭരണചുമതല ഏറ്റെടുക്കുക.

2025 ഒക്ടോബറിൽ ഹമാസും ഇസ്രയേലും തമ്മിലുള്ള വെടിനിർത്തലിന് മധ്യസ്ഥത വഹിച്ച സമയത്ത്, അമേരിക്കൻ പ്രസിഡന്റ് ഡൊണാൾഡ് ട്രംപ് രൂപീകരിച്ച സമാധാന ബോർഡിന്റെ നേതൃത്വത്തിലൂടെയാണ് എൻ.സി.എ.ജി നിലവിൽ വന്നത്.

ഭരണമാറ്റത്തിനിടയിലും പൊതുസേവനങ്ങളിൽ തടസ്സമുണ്ടാകാതിരിക്കാൻ നിലവിലുള്ള സാങ്കേതിക, പ്രൊഫഷണൽ സർക്കാർ ജീവനക്കാർ തുടർന്നും പ്രവർത്തിക്കുമെന്ന് ഹമാസ് അറിയിച്ചു.

അതേസമയം, രാഷ്ട്രീയമായി പ്രഖ്യാപിച്ച ഈ മാറ്റം പ്രായോഗികമായി പൂർണമായി നടപ്പാക്കുന്നതിൽ ഇസ്രയേലിന്റെ എതിർപ്പ് വെല്ലുവിളിയാകുന്നുണ്ട്. ഇതുമൂലം പുതിയ ഭരണസമിതിക്ക് ഗാസയിൽ പൂർണമായും പ്രവർത്തനം ആരംഭിക്കാൻ ഇതുവരെ സാധിച്ചിട്ടില്ല. ഹമാസിന്റെ സായുധ വിഭാഗത്തിന്റെ പ്രവർത്തനങ്ങളെ ഈ ഭരണമാറ്റം ബാധിക്കില്ലെന്നും സംഘടന വ്യക്തമാക്കി.