മധ്യേഷ്യയിലെ യുദ്ധസാഹചര്യം അതീവ ഗുരുതരമായി തുടരുന്നതിനിടയിൽ, യുണൈറ്റഡ് അറബ് എമിറേറ്റ്സിലെ തങ്ങളുടെ ഭൂരിഭാഗം ശാഖകളും താൽക്കാലികമായി അടച്ചുപൂട്ടാൻ സിറ്റിബാങ്ക്. മുൻകരുതൽ നടപടിയുടെ ഭാഗമായി മാർച്ച് 14 വരെയാണ് ഈ നിയന്ത്രണം ഏർപ്പെടുത്തിയിരിക്കുന്നത്. മേഖലയിലെ പ്രമുഖ വിദേശ ബാങ്കുകളെല്ലാം തങ്ങളുടെ ജീവനക്കാരെ വീട്ടിലിരുന്ന് ജോലി ചെയ്യാൻ അനുവദിച്ചതിന് പിന്നാലെയാണ് സിറ്റിബാങ്കിന്റെ ഈ നീക്കം.

ദുബായിലെ മാൾ ഓഫ് എമിറേറ്റ്സിലുള്ള ശാഖ മാത്രമാണ് നിലവിൽ പ്രവർത്തിക്കുന്നത്. ബാക്കിയുള്ളവ മാർച്ച് 16-ന് വീണ്ടും തുറക്കാനാണ് അധികൃതർ ആലോചിക്കുന്നത്. അമേരിക്കയുമായും ഇസ്രായേലുമായും ബന്ധമുള്ള ഗൾഫിലെ ബാങ്കിംഗ് സ്ഥാപനങ്ങളെ ലക്ഷ്യം വയ്ക്കുമെന്ന് ഇറാൻ മുന്നറിയിപ്പ് നൽകിയതാണ് ഈ അടിയന്തര നീക്കങ്ങൾക്ക് കാരണം. നേരത്തെ ദുബായ് ഇന്റർനാഷണൽ ഫിനാൻഷ്യൽ സെന്ററിലെയും (DIFC) ഔദ് മേത്തയിലെയും ഓഫീസുകൾ ശൂന്യമാക്കാൻ ജീവനക്കാർക്ക് ബാങ്ക് നിർദ്ദേശം നൽകിയിരുന്നു.

എച്ച്എസ്ബിസി (HSBC) ബാങ്ക് ഖത്തറിലെ തങ്ങളുടെ എല്ലാ ശാഖകളും ഇനിയൊരു അറിയിപ്പ് ഉണ്ടാകുന്നത് വരെ അടച്ചുപൂട്ടി.യുഎഇയിലെ ഫോൺ ബാങ്കിംഗ് സേവനങ്ങൾ പരിമിതപ്പെടുത്തിയതായും ചെക്കുകൾ പ്രോസസ്സ് ചെയ്യുന്നതിൽ കാലതാമസം ഉണ്ടാകുമെന്നും സിറ്റിബാങ്ക് അറിയിച്ചു.

രണ്ടാഴ്ചയോളമായി തുടരുന്ന യുദ്ധം മേഖലയുടെ സാമ്പത്തിക ഭദ്രതയെയും ചരക്കുനീക്കത്തെയും ആഗോള ഇന്ധന വിപണിയെയും പ്രതികൂലമായി ബാധിച്ചിരിക്കുകയാണ്.സുരക്ഷിതമായ സാമ്പത്തിക കേന്ദ്രമെന്ന ദുബായിയുടെ ഖ്യാതിക്ക് ഈ സംഘർഷം മങ്ങലേൽപ്പിക്കുന്നതായി റിപ്പോർട്ടുകൾ വ്യക്തമാക്കുന്നു.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്