സിഡ്‌നി: ലോകനേതാക്കളുമായുള്ള തന്റെ വ്യക്തിപരമായ അനുഭവങ്ങളും നയതന്ത്ര ബന്ധങ്ങളിലെ വെല്ലുവിളികളും പങ്കുവെച്ച് കനേഡിയൻ പ്രധാനമന്ത്രി മാർക്ക് കാർണി. സിഡ്‌നിയിലെ പ്രമുഖ തിങ്ക് ടാങ്കായ ലോവി ഇൻസ്റ്റിറ്റ്യൂട്ടിൽ നടന്ന ചർച്ചയിലാണ്, തന്റെ പതിവ് ഗൗരവ പ്രകൃതത്തിൽ നിന്ന് മാറി സരസമായ ഭാഷയിൽ കാർണി മനസ്സ് തുറന്നത്. അമേരിക്കൻ പ്രസിഡന്റ് ഡൊണാൾഡ് ട്രംപ്, ചൈനീസ് പ്രസിഡന്റ് ഷി ജിൻപിംഗ്, ഇന്ത്യൻ പ്രധാനമന്ത്രി നരേന്ദ്ര മോദി എന്നിവരുമായുള്ള തന്റെ ആശയവിനിമയങ്ങളെക്കുറിച്ച് അദ്ദേഹം വിശദീകരിച്ചു.

ഡൊണാൾഡ് ട്രംപിനെ കൈകാര്യം ചെയ്യുന്നതിനെക്കുറിച്ച് സംസാരിക്കവെ, പരസ്യമായി പറയുന്ന കാര്യങ്ങൾ തെളിവുകളുടെ പിൻബലത്തോടെ വേണം അവതരിപ്പിക്കാനെന്ന് അദ്ദേഹം ഓർമ്മിപ്പിച്ചു. എന്നാൽ സ്വകാര്യ ചർച്ചകളിൽ ട്രംപ് തികച്ചും വ്യത്യസ്തനാണെന്നും മറ്റുള്ളവരുടെ അഭിപ്രായങ്ങൾ കേൾക്കാൻ അദ്ദേഹം താൽപ്പര്യപ്പെടുന്നുണ്ടെന്നും കാർണി പറഞ്ഞു. 

ചൈനീസ് പ്രസിഡന്റ് ഷി ജിൻപിംഗുമായുള്ള കൂടിക്കാഴ്ചയെക്കുറിച്ച് സംസാരിക്കവെ, പരസ്യമായ ഉപദേശങ്ങളോ വിമർശനങ്ങളോ ഷി ഇഷ്ടപ്പെടുന്നില്ലെന്നും പ്രശ്നങ്ങൾ നേരിട്ട് ചർച്ച ചെയ്യാനാണ് അദ്ദേഹം താൽപ്പര്യപ്പെടുന്നതെന്നും കാർണി നിരീക്ഷിച്ചു. 2025 നവംബറിൽ നടന്ന എപെക് (APEC) ഉച്ചകോടിക്കിടയിലുള്ള കൂടിക്കാഴ്ചയെ മുൻനിർത്തിയായിരുന്നു ഈ പരാമർശം.

ഇന്ത്യൻ പ്രധാനമന്ത്രി നരേന്ദ്ര മോദിയെ അദ്വിതീയൻ എന്നാണ് കാർണി വിശേഷിപ്പിച്ചത്. കഴിഞ്ഞ 25 വർഷമായി ഒരു ദിവസം പോലും അവധിയെടുക്കാത്ത മോദിയുടെ ജോലിയിലുള്ള അർപ്പണബോധത്തെ അദ്ദേഹം പ്രശംസിച്ചു. സാധാരണക്കാരുടെ ജീവിതനിലവാരം മെച്ചപ്പെടുത്തുന്നതിലാണ് മോദി കൂടുതൽ ശ്രദ്ധ കേന്ദ്രീകരിക്കുന്നതെന്നും കാർണി കൂട്ടിച്ചേർത്തു. 

ഇന്ത്യയും കാനഡയും തമ്മിലുള്ള ബന്ധത്തെക്കുറിച്ച് സംസാരിക്കവെ, വിദേശ ഇടപെടലുകളും അതിർത്തി കടന്നുള്ള സുരക്ഷാ പ്രശ്നങ്ങളും കാനഡ അതീവ ഗൗരവത്തോടെയാണ് കാണുന്നതെന്ന് അദ്ദേഹം വ്യക്തമാക്കി. ഈ വർഷം അവസാനത്തോടെ ഇന്ത്യയുമായി സമഗ്രമായ വ്യാപാര കരാറിൽ ഏർപ്പെടുമെന്നും പ്രധാനമന്ത്രി മോദിയെ കാനഡയിലേക്ക് ക്ഷണിച്ചിട്ടുണ്ടെന്നും അദ്ദേഹം അറിയിച്ചു.

തന്റെ ബാങ്കിംഗ് കാലഘട്ടത്തിലെ രസകരമായ ഒരു ഓർമ്മ പങ്കുവെക്കുന്നതിനിടയിൽ അപ്രതീക്ഷിതമായി f-word പ്രയോഗിച്ച പ്രധാനമന്ത്രി സദസ്സിനെ ചിരിപ്പിച്ചു. 2008-ലെ സാമ്പത്തിക പ്രതിസന്ധിക്കാലത്ത് ബാങ്ക് ഓഫ് കാനഡ ഗവർണറായിരിക്കെ സ്വിറ്റ്‌സർലൻഡിൽ നടന്ന ഒരു അത്താഴവിരുന്നിനെക്കുറിച്ചാണ് അദ്ദേഹം സംസാരിച്ചത്.

അതീവ ഗുരുതരമായ സാമ്പത്തിക തീരുമാനങ്ങൾ എടുക്കാൻ വെറും ഒന്നര മണിക്കൂർ മാത്രം ബാക്കിയുള്ളപ്പോൾ, വിരുന്നിലെ വൈനിനെക്കുറിച്ച് ദീർഘനേരം സംസാരിച്ച ചെയർമാനോട് തോന്നിയ അക്ഷമ വിവരിക്കവെയാണ് അദ്ദേഹം തമാശരൂപേണ ഈ വാക്ക് ഉപയോഗിച്ചത്. പ്രധാനമന്ത്രിമാരേക്കാൾ കൂടുതൽ ആസ്വദിച്ചു ജോലി ചെയ്യുന്നത് സെൻട്രൽ ബാങ്കർമാരാണെന്നും അദ്ദേഹം തമാശയായി പറഞ്ഞു.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്