കാനഡയിലെ ഭരണസംവിധാനത്തെ അടിമുടി പരിഷ്കരിക്കുന്നതിന്റെ ഭാഗമായി ഉന്നത ഉദ്യോഗസ്ഥ തലത്തിൽ നിർണ്ണായകമായ രണ്ടാമത്തെ അഴിച്ചുപണി കൂടി പ്രധാനമന്ത്രി മാർക്ക് കാർണി പ്രഖ്യാപിച്ചു. മൂന്ന് മാസത്തിനിടെ ഇത് രണ്ടാം തവണയാണ് ഡെപ്യൂട്ടി മിനിസ്റ്റർ റാങ്കിലുള്ള ഉദ്യോഗസ്ഥരുടെ വലിയ തോതിലുള്ള സ്ഥാനചലനം നടക്കുന്നത്. സർക്കാരിന്റെ മുൻഗണനാ വിഷയങ്ങളിൽ കൂടുതൽ ഫലം കണ്ടെത്തുക എന്ന ലക്ഷ്യത്തോടെയാണ് ഈ നീക്കമെന്ന് ഒട്ടാവ സിറ്റിസൺ റിപ്പോർട്ട് ചെയ്യുന്നു.

വിദേശകാര്യം, പ്രതിരോധം, കുടിയേറ്റം തുടങ്ങിയ പ്രധാന വകുപ്പുകളിലാണ് പ്രധാനമായും മാറ്റങ്ങൾ വരുത്തിയിരിക്കുന്നത്. വിദേശകാര്യ ഡെപ്യൂട്ടി മിനിസ്റ്റർ ഡേവിഡ് മോറിസണെ പ്രധാനമന്ത്രിയുടെ സീനിയർ ഡിപ്ലോമാറ്റിക് അഡൈസർ സ്ഥാനത്തേക്ക് മാറ്റി. പകരം ഗതാഗത വകുപ്പ് ഡെപ്യൂട്ടി മിനിസ്റ്റർ അരുൺ തങ്കരാജ് വിദേശകാര്യ വകുപ്പിന്റെ ചുമതല ഏറ്റെടുക്കും. കുടിയേറ്റ വകുപ്പിലും സമുദ്ര സുരക്ഷാ വിഭാഗത്തിലും പുതിയ തലവന്മാരെ നിശ്ചയിച്ചിട്ടുണ്ട്.

സൈനികവും നയതന്ത്രപരവുമായ നീക്കങ്ങളിൽ കൂടുതൽ വേഗത കൈവരിക്കാനാണ് കാർണി ഭരണകൂടം ശ്രമിക്കുന്നത്. ഇതിന്റെ ഭാഗമായി കാനഡയുടെ കോസ്റ്റ് ഗാർഡ് കമ്മീഷണറായി കെവിൻ ബ്രൂസോയെ നിയമിച്ചു. അദ്ദേഹം ഒരേസമയം പ്രതിരോധ വകുപ്പിന്റെ സീനിയർ അസോസിയേറ്റ് ഡെപ്യൂട്ടി മിനിസ്റ്ററായും പ്രവർത്തിക്കും. അമേരിക്കൻ പ്രസിഡന്റ് ഡൊണ്ടാൾഡ് ട്രംപ് നയിക്കുന്ന പുതിയ ഭരണകൂടവുമായിട്ടുള്ള നയതന്ത്ര ബന്ധങ്ങൾ ശക്തമാക്കാനും ഈ മാറ്റങ്ങൾ സഹായിക്കുമെന്ന് കരുതപ്പെടുന്നു.

ഇറാനുമായുള്ള സംഘർഷം ഉൾപ്പെടെയുള്ള ആഗോള സാഹചര്യങ്ങൾ മുൻനിർത്തിയാണ് വിദേശകാര്യ-പ്രതിരോധ വകുപ്പുകളിൽ വിശ്വസ്തരായ ഉദ്യോഗസ്ഥരെ കാർണി നിയമിച്ചിരിക്കുന്നത്. നയതന്ത്ര തലത്തിലുള്ള പ്രധാന ചർച്ചകളിൽ പ്രധാനമന്ത്രിയെ നേരിട്ട് സഹായിക്കാനാണ് ഡേവിഡ് മോറിസണെ മാറ്റിയത്. ഇതോടൊപ്പം ഫെന്റനൈൽ വ്യാപനം തടയാനുള്ള പ്രത്യേക ദൗത്യവും കെവിൻ ബ്രൂസോ തന്നെ തുടരും.

ഭരണനിർവ്വഹണത്തിൽ കൂടുതൽ വേഗതയും കൃത്യതയും വേണമെന്ന കർശ്ശന നിർദ്ദേശം ഉദ്യോഗസ്ഥർക്ക് കാർണി നൽകിയിട്ടുണ്ട്. പഴയ രീതിയിലുള്ള ഉദ്യോഗസ്ഥ ഭരണക്രമത്തിന് പകരം ലക്ഷ്യങ്ങൾ വേഗത്തിൽ പൂർത്തിയാക്കുന്ന രീതിയിലേക്ക് സിവിൽ സർവീസിനെ മാറ്റാനാണ് അദ്ദേഹം ശ്രമിക്കുന്നത്. വരും മാസങ്ങളിൽ കൂടുതൽ മാറ്റങ്ങൾ ഉണ്ടാകുമെന്ന സൂചനയും പ്രധാനമന്ത്രിയുടെ ഓഫീസ് നൽകി.

ദീർഘകാലമായി പദവികളിൽ ഇരുന്ന പല മുതിർന്ന ഉദ്യോഗസ്ഥരും ഈ മാറ്റത്തോടെ വിരമിക്കൽ പ്രഖ്യാപിച്ചിട്ടുണ്ട്. പുതിയ ടീമിനെ ഉപയോഗിച്ച് കാനഡയുടെ സാമ്പത്തികവും സുരക്ഷാപരവുമായ താൽപ്പര്യങ്ങൾ സംരക്ഷിക്കാനാണ് കാർണി ലക്ഷ്യമിടുന്നത്. ഉദ്യോഗസ്ഥ തലത്തിലെ ഈ അഴിച്ചുപണി രാജ്യത്തിന്റെ ഭരണത്തിൽ വലിയ സ്വാധീനം ചെലുത്തുമെന്ന് ഉറപ്പാണ്.

English Summary: Prime Minister Mark Carney has announced his second major shuffle of senior public service ranks in less than three months. Key changes include moving David Morrison to be the Prime Ministers Senior Diplomatic and International Affairs Advisor and appointing Arun Thangaraj as the new Deputy Minister of Foreign Affairs. These strategic reassignments aim to enhance delivery of government priorities and respond to shifting global dynamics particularly in defense and international trade.

Tags: Malayalam News, News Malayalam, Latest Malayalam News, Vachakam News, Canada News Malayalam, Mark Carney Shuffle, Canada Public Service News, USA News