ഒട്ടാവ:  കാനഡ പ്രധാനമന്ത്രി മാർക്ക് കാർണി ചൈനയിലെത്തി. രണ്ട് ദിവസത്തെ ഔദ്യോഗിക സന്ദർശനത്തിനായാണ് കാർണി ബെയ്ജിംഗിലെത്തിയത്. വ്യാപാരസഹകരണം ആണ് മുഖ്യ ലക്ഷ്യം.

 സർക്കാർതല ചർച്ചകൾക്ക് മുന്നോടിയായി  ഊർജം, ക്ലീൻ ടെക്‌നോളജി, ഫിൻടെക് മേഖലകളിലെ ചൈനീസ് വ്യവസായ നേതാക്കളുമായി അദ്ദേഹം കൂടിക്കാഴ്ച നടത്തും. കൂടാതെ, പ്രമുഖ ഇലക്ട്രിക് വാഹന ബാറ്ററി നിർമ്മാതാക്കളായ കോൺടെമ്പററി ആംപറക്‌സ് ടെക്‌നോളജിയുടെയും (CATL) പ്രതിനിധികളുമായി കൂടിക്കാഴ്ച നടത്താനും തീരുമാനിച്ചിട്ടുണ്ട്.

കാനഡയുടെ വിദേശകാര്യ മന്ത്രി അനിത ആനന്ദുമായി കൂടിക്കാഴ്ച നടത്തിയ ചൈനീസ് വിദേശകാര്യ മന്ത്രി വാങ് യി, കാർണിയുടെ സന്ദർശനം കാനഡ–ചൈന ബന്ധങ്ങളിൽ ഒരു “മാറുന്ന വഴിത്തിരിവ്” ആണെന്ന് വിശേഷിപ്പിച്ചിരുന്നു. എട്ട് വർഷത്തെ  ഇടവേളയ്ക്ക് ശേഷമാണ് കാനഡ പ്രധാനമന്ത്രി ചൈനയിലെത്തുന്നത്. 

കാനഡ കാർഷിക ഉൽപ്പന്നങ്ങളെ ബാധിച്ച കടുത്ത തീരുവ തർക്കം പരിഹരിക്കാനുള്ള ശ്രമത്തിന്റെ ഭാഗമായാണ് കാർണിയുടെ ഈ സന്ദർശനം. അമേരിക്കയോടൊപ്പം ചൈനീസ് ഇലക്ട്രിക് വാഹനങ്ങൾ, സ്റ്റീൽ, അലുമിനിയം എന്നിവയ്‌ക്കെതിരെ കാനഡ തീരുവ ഏർപ്പെടുത്തിയതിനെ തുടർന്നാണ് തർക്കം രൂക്ഷമായത്. എന്നാൽ, ഊർജം, വ്യാപാരം, സമ്പദ്‌വ്യവസ്ഥ, അന്താരാഷ്ട്ര സുരക്ഷ എന്നീ വിഷയങ്ങളിൽ ചൈനയുമായി വിശാലമായ സഹകരണം ലക്ഷ്യമിടുന്നതാണ് പ്രധാനമന്ത്രിയുടെ ദീർഘകാല ലക്ഷ്യമെന്ന് സർക്കാർ ഉദ്യോഗസ്ഥർ വ്യക്തമാക്കി.

ചൈനയ്ക്ക് ശേഷം അദ്ദേഹം ഖത്തറിലേക്കും തുടർന്ന് സ്വിറ്റ്സർലൻഡിലെ ഡാവോസിൽ നടക്കുന്ന വേൾഡ് ഇക്കണോമിക് ഫോറത്തിലേക്കും പോകും. യുഎസ് പ്രസിഡന്റ് ഡൊണാൾഡ് ട്രംപും മുൻ കാനഡ പ്രധാനമന്ത്രി ജസ്റ്റിൻ ട്രൂഡോയും ഫോറത്തിൽ പങ്കെടുക്കുമെന്നാണ് അനുമാനം. ഇറാനും ഗ്രീൻലാൻഡും സംബന്ധിച്ച ട്രംപിന്റെ ശക്തമായ പരാമർശങ്ങളും വെനസ്വേലൻ പ്രസിഡന്റിനെ സൈനിക നടപടിയിലൂടെ അറസ്റ്റ് ചെയ്ത സംഭവവും ഈ അന്താരാഷ്ട്ര ചർച്ചകളിൽ വലിയ സ്വാധീനം ചെലുത്തുമെന്നാണ് വിലയിരുത്തൽ.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്