കേരള രാഷ്ട്രീയത്തിലെ കോണ്‍ഗ്രസ് ഇതര കര്‍ഷക പ്രസ്ഥാനങ്ങളുടെ ചരിത്രമെഴുതുമ്പോള്‍ അതില്‍ മധ്യകേരളത്തില്‍ നിന്നുള്ള ചില പേരുകള്‍ അടയാളപ്പെടുത്താതെ പോകാനാകില്ല. ആ നിരയിലെ മുന്‍നിരക്കാരനായിരുന്നു അന്തരിച്ച മുന്‍ പൊതുമരാമത്ത് മന്ത്രി ടി.യു കുരുവിള. പ്രാദേശിക ഭരണകൂടത്തിന്റെ താഴേത്തട്ടില്‍ നിന്ന് തുടങ്ങി സംസ്ഥാന മന്ത്രിസഭയുടെ നിര്‍ണായക പദവിയില്‍ വരെയെത്തിയ അദ്ദേഹത്തിന്റെ രാഷ്ട്രീയ പ്രയാണം, കേരള കോണ്‍ഗ്രസ് രാഷ്ട്രീയത്തിന്റെ പല സുപ്രധാന ഏടുകളിലൂടെയും കടന്നുപോയ ഒന്നാണ്.

അടിത്തറ പാകിയ ജനകീയത

ഭരണപരിചയമാണ് ഒരു ജനപ്രതിനിധിയുടെ ഏറ്റവും വലിയ മൂലധനമെന്ന് വിശ്വസിച്ചിരുന്ന നേതാവായിരുന്നു കുരുവിള. 1964 ല്‍ വെറും 28-ാം വയസ്സില്‍ കീരമ്പാറ പഞ്ചായത്ത് പ്രസിഡന്റായി രാഷ്ട്രീയ ജീവിതം തുടങ്ങിയ അദ്ദേഹം നീണ്ട 14 വര്‍ഷമാണ് ആ പദവിയിലിരുന്ന് ജനവിശ്വാസം നേടിയത്. പിന്നീട് കോതമംഗലം നഗരസഭയിലും പ്ലാന്റേഷന്‍ കോര്‍പ്പറേഷന്‍, ഹൗസിങ് ബോര്‍ഡ് തുടങ്ങിയ പൊതുമേഖലാ സ്ഥാപനങ്ങളിലും അദ്ദേഹം തന്റെ തനതായ വികസന ശൈലി നടപ്പിലാക്കി. ഈ ഭരണപാടവമാണ് പിന്നീട് വി.എസ് അച്യുതാനന്ദന്‍ മന്ത്രിസഭയിലേക്ക് അദ്ദേഹത്തിന് വഴിതുറന്നത്.

വി.എസ് മന്ത്രിസഭയും പൊതുമരാമത്ത് വകുപ്പും

2006 ല്‍ എല്‍.ഡി.എഫ് സ്വതന്ത്രനായി കോതമംഗലത്ത് നിന്ന് വന്‍ ഭൂരിപക്ഷത്തോടെ നിയമസഭയിലെത്തിയ ടി.യു കുരുവിള, കരിയറിലെ ഏറ്റവും വലിയ ദൗത്യത്തിലേക്ക് നിയോഗിക്കപ്പെടുന്നത് അക്കൊല്ലം നവംബറിലാണ്. ടി.വി ചാനല്‍ വിവാദത്തെ തുടര്‍ന്ന് പി.ജെ ജോസഫ് രാജിവെച്ച ഒഴിവിലാണ് കുരുവിള പൊതുമരാമത്ത് വകുപ്പ് മന്ത്രിയായി ചുമതലയേല്‍ക്കുന്നത്.

വി.എസ് അച്യുതാനന്ദനെപ്പോലെ അഴിമതിക്കെതിരെ കടുത്ത നിലപാടെടുക്കുന്ന ഒരു മുഖ്യമന്ത്രിയുടെ കീഴില്‍, ഏറെ ചരടുവലികളുള്ള പൊതുമരാമത്ത് വകുപ്പ് കൈകാര്യം ചെയ്യുക എന്നത് വലിയ വെല്ലുവിളിയായിരുന്നു. എന്നാല്‍ ചുരുങ്ങിയ കാലം കൊണ്ട് തന്നെ വകുപ്പിന്റെ പ്രവര്‍ത്തനങ്ങളില്‍ വേഗതയും സുതാര്യതയും കൊണ്ടുവരാന്‍ അദ്ദേഹത്തിന് സാധിച്ചു.

രാഷ്ട്രീയ ധാര്‍മ്മികതയുടെ മാതൃക; വിവാദവും ക്ലീന്‍ ചിറ്റും

ടി.യു കുരുവിളയുടെ രാഷ്ട്രീയ ജീവിതത്തിലെ ഏറ്റവും വലിയ പരീക്ഷണഘട്ടമായിരുന്നു രാജകുമാരി ഭൂമിയിടപാട് വിവാദം. തന്റെ മക്കള്‍ ഉള്‍പ്പെട്ട ഒരു ഭൂമിയിടപാടുമായി ബന്ധപ്പെട്ട് ഉയര്‍ന്ന ആരോപണങ്ങള്‍ വി.എസ് അച്യുതാനന്ദന്‍ സര്‍ക്കാരിനെ പ്രതിരോധത്തിലാക്കിയപ്പോള്‍, കടിച്ചതൂങ്ങി നില്‍ക്കാന്‍ അദ്ദേഹം തയ്യാറായില്ല. രാഷ്ട്രീയ ധാര്‍മ്മികത ഉയര്‍ത്തിപ്പിടിച്ച് 2007 സെപ്റ്റംബറില്‍ അദ്ദേഹം മന്ത്രിസ്ഥാനം രാജിവെച്ചു.

പലപ്പോഴും രാഷ്ട്രീയത്തില്‍ ആരോപണങ്ങള്‍ വരുമ്പോള്‍ അധികാരമൊഴിയാന്‍ മടിക്കുന്നവര്‍ക്കിടയില്‍ കുരുവിളയുടെ രാജി ഒരു മാതൃകയായിരുന്നു. പില്‍ക്കാലത്ത് പൊലീസ് അന്വേഷണത്തിലും കോടതി നടപടികളിലും അദ്ദേഹം പൂര്‍ണ്ണമായി കുറ്റവിമുക്തനാക്കപ്പെട്ടു. രാഷ്ട്രീയ പ്രേരിതമായ ആരോപണങ്ങള്‍ മാത്രമായിരുന്നു അതെന്ന് തെളിയിക്കപ്പെട്ടതോടെ, കറപുരളാത്ത പ്രതിച്ഛായയുമായി 2011 ല്‍ യു.ഡി.എഫ് ബാനറില്‍ കോതമംഗലത്ത് നിന്ന് അദ്ദേഹം വീണ്ടും വന്‍ ഭൂരിപക്ഷത്തോടെ നിയമസഭയിലെത്തി.

വിശ്വസ്തതയുടെ രാഷ്ട്രീയം

കേരള കോണ്‍ഗ്രസ് രാഷ്ട്രീയത്തിലെ പല പിളര്‍പ്പുകളിലും ലയനങ്ങളിലും ഗ്രൂപ്പ് മാറ്റങ്ങള്‍ സര്‍വ്വസാധാരണമായിരുന്നപ്പോഴും, പി.ജെ ജോസഫ് എന്ന നേതാവിനോട് കാണിച്ച രാഷ്ട്രീയ വിശ്വസ്തതയായിരുന്നു കുരുവിളയുടെ സവിശേഷത. ജോസഫ് ഗ്രൂപ്പിന്റെ സാമ്പത്തിക ഭദ്രതയും രാഷ്ട്രീയ അടിത്തറയും കാത്തുസൂക്ഷിക്കുന്നതില്‍ പാര്‍ട്ടിയുടെ ട്രഷറര്‍, വൈസ് ചെയര്‍മാന്‍ എന്നീ നിലകളില്‍ അദ്ദേഹം നിര്‍ണായക പങ്കുവഹിച്ചു.

രാഷ്ട്രീയത്തിനപ്പുറം യാക്കോബായ സഭയുടെ ആഗോള ലേ സെക്രട്ടറിയായും വിദ്യാഭ്യാസ-സാമൂഹിക മേഖലകളിലെ സജീവ സാന്നിധ്യമായും അദ്ദേഹം തിളങ്ങി. ഒരു രാഷ്ട്രീയ നേതാവിന് ജനങ്ങള്‍ക്കിടയില്‍ എങ്ങനെ സ്വാധീനമുറപ്പിക്കാം എന്ന് സ്വന്തം ജീവിതത്തിലൂടെ കാണിച്ചുതന്ന ടി.യു കുരുവിളയുടെ വിയോഗം, മധ്യകേരളത്തിലെ കേരള കോണ്‍ഗ്രസ് രാഷ്ട്രീയത്തിന് നികത്താനാകാത്ത ഒരു വലിയ നഷ്ടം തന്നെയാണ്.

ജിജി ജേക്കബ്ബ്

ഫേസ്ബുക്കിൽ വാർത്തകൾ അറിയാൻ പേജ് ലൈക്ക് ചെയ്യുക Facebook ലിങ്ക് 👇
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്തിട്ട് ലൈക്ക് / Follow ബട്ടൺ ക്ലിക്ക് ചെയ്യുക. ഒപ്പം vachakam.com ന്റെ YouTube ചാനൽ സബ്സ്ക്രൈബ് ചെയ്യാനും മറക്കല്ലേ...
ചാനൽ ലിങ്ക്: https://www.youtube.com/channel/UCXRVmXRlpFL8TzgXtb8IIyw?sub_confirmation=1