റഷ്യയുമായുള്ള എണ്ണ ഇടപാടില്‍ ഇന്ത്യന്‍ ഉല്‍പ്പന്നങ്ങള്‍ക്ക് അമേരിക്ക 50 ശതമാനം തീരുവ ഏര്‍പ്പെടുത്തിയതിന് പിന്നാലെ ബദല്‍ മാര്‍ഗങ്ങള്‍ തേടിയിരിക്കുകയാണ് കേന്ദ്ര സര്‍ക്കാര്‍. തുണിത്തരങ്ങളുടെ കയറ്റുമതി പ്രോത്സാഹിപ്പിക്കുന്നതിനായി യുകെ, ജപ്പാന്‍, ദക്ഷിണ കൊറിയ എന്നിവയുള്‍പ്പെടെ 40 രാജ്യങ്ങളുമായി ഇന്ത്യ ബന്ധപ്പെടുന്നുമുണ്ട്. എന്നാണ് സര്‍ക്കാര്‍ ഉദ്യോഗസ്ഥനെ ഉദ്ധരിച്ച് വാര്‍ത്താ ഏജന്‍സിയായ പിടിഐ റിപ്പോര്‍ട്ട് ചെയ്യുന്നത്.

ജര്‍മ്മനി, ഫ്രാന്‍സ്, ഇറ്റലി, സ്‌പെയിന്‍, നെതര്‍ലാന്‍ഡ്സ്, പോളണ്ട്, കാനഡ, മെക്‌സിക്കോ, റഷ്യ, ബെല്‍ജിയം, തുര്‍ക്കി, യുഎഇ, ഓസ്ട്രേലിയ എന്നീ രാജ്യങ്ങളിലെ വിപണിയും ഇന്ത്യ ലക്ഷ്യമിടുന്നുണ്ട്. ''ഈ 40 വിപണികളിലും, ഒരു ലക്ഷ്യബോധമുള്ള സമീപനം പിന്തുടരാനും, ഈ രാജ്യങ്ങളിലെ ഇപിസികളും ഇന്ത്യന്‍ മിഷനുകളും ഉള്‍പ്പെടെ ഇന്ത്യന്‍ വ്യവസായത്തിന്റെ ഗുണനിലവാരമുള്ളതും സുസ്ഥിരവും നൂതനവുമായ തുണിത്തരങ്ങളുടെ വിശ്വസനീയമായ വിതരണക്കാരനായി സ്വയം സ്ഥാപിക്കാനും ഇത് നിര്‍ദ്ദേശിക്കപ്പെട്ടിരിക്കുന്നു,''എന്ന് ഉദ്യോഗസ്ഥന്‍ പറഞ്ഞു.

ഇന്ത്യ നിലവില്‍ 220-ലധികം രാജ്യങ്ങളിലേക്ക് കയറ്റുമതി ചെയ്യുന്നുണ്ടെങ്കിലും ഈ 40 രാജ്യങ്ങള്‍ വൈവിധ്യവല്‍ക്കരണത്തിന്റെ യഥാര്‍ത്ഥ താക്കോല്‍ വഹിക്കുന്നു എന്നും അദ്ദേഹം പറഞ്ഞു. തുണിത്തരങ്ങളുടെയും വസ്ത്രങ്ങളുടെയും ഇറക്കുമതിയില്‍ ഇവ രണ്ടും ചേര്‍ന്ന് 590 ബില്യണ്‍ യുഎസ് ഡോളറിലധികം പ്രതിനിധീകരിക്കുന്നു. അതേസമയം ഇന്ത്യയുടെ വിഹിതം 5-6 ശതമാനം മാത്രമാണ്.

പരമ്പരാഗത വിപണികളിലും വളര്‍ന്നുവരുന്ന വിപണികളിലും ശ്രദ്ധ കേന്ദ്രീകരിച്ച് ഈ 40 രാജ്യങ്ങളിലും സമര്‍പ്പിത ഔട്ട്‌റീച്ച് പരിപാടികള്‍ സര്‍ക്കാര്‍ ആസൂത്രണം ചെയ്യുന്നു എന്നും ഉദ്യോഗസ്ഥന്‍ കൂട്ടിച്ചേര്‍ത്തു. ഓഗസ്റ്റ് 27 മുതല്‍ പ്രാബല്യത്തില്‍ വന്ന പുതിയ യുഎസ് താരിഫ്, 48 ബില്യണ്‍ ഡോളറിലധികം മൂല്യമുള്ള ഇന്ത്യന്‍ കയറ്റുമതിയെ ബാധിക്കുമെന്ന് പ്രതീക്ഷിക്കുന്നു.

തുണിത്തരങ്ങളും വസ്ത്രങ്ങളും, രത്‌നങ്ങളും ആഭരണങ്ങളും, ചെമ്മീന്‍, തുകല്‍, പാദരക്ഷകള്‍, മൃഗ ഉല്‍പ്പന്നങ്ങള്‍, രാസവസ്തുക്കള്‍, ഇലക്ട്രിക്കല്‍, മെക്കാനിക്കല്‍ യന്ത്രങ്ങള്‍ എന്നിവ ഇതില്‍ ഉള്‍പ്പെടുന്നു. 2024-25 ല്‍, ഇന്ത്യയുടെ തുണിത്തരങ്ങളുടെയും വസ്ത്രങ്ങളുടെയും മേഖലയുടെ മൊത്തത്തിലുള്ള വലുപ്പം 179 ബില്യണ്‍ യുഎസ് ഡോളറാണ്. ആഭ്യന്തര വിപണി 142 ബില്യണ്‍ യുഎസ് ഡോളറും കയറ്റുമതി 37 ബില്യണ്‍ യുഎസ് ഡോളറുമാണ്.

ആഗോളതലത്തില്‍, തുണിത്തരങ്ങളുടെയും വസ്ത്രങ്ങളുടെയും ഇറക്കുമതി വിപണി 2024 ല്‍ 800.77 ബില്യണ്‍ യുഎസ് ഡോളറായിരുന്നു, അവിടെ 4.1 ശതമാനം വിഹിതമുള്ള ഇന്ത്യ ആറാം വലിയ കയറ്റുമതിക്കാരായിരുന്നു. മാര്‍ക്കറ്റ് മാപ്പിംഗ് നടത്തുക, ഉയര്‍ന്ന ഡിമാന്‍ഡ് ഉള്ള ഉല്‍പ്പന്നങ്ങള്‍ തിരിച്ചറിയുക, സൂററ്റ്, പാനിപ്പത്ത്, തിരുപ്പൂര്‍, ഭദോഹി തുടങ്ങിയ ഉല്‍പ്പാദന ക്ലസ്റ്ററുകളെ പുതിയ അവസരങ്ങളുമായി ബന്ധിപ്പിക്കുക എന്നിവയിലൂടെ കയറ്റുമതി പ്രമോഷന്‍ കൗണ്‍സിലുകള്‍ (ഇപിസികള്‍) ഇന്ത്യയുടെ തന്ത്രത്തിന്റെ നട്ടെല്ല് ആയിരിക്കുമെന്ന് അദ്ദേഹം പറഞ്ഞു.

ഇന്ത്യയ്ക് മികച്ച അവസരം

നമ്മുടെ രാജ്യം നമ്മുടെ താല്‍പര്യങ്ങളെ വേണം സംരക്ഷിക്കാനെന്ന് ബിസിനസുകാരനായ വിനോദ് തരകന്‍. അങ്ങനെയൊരു നീക്കം ഉണ്ടാകുമ്പോള്‍ ട്രംപിന്റെ പാര ഇന്ത്യയ്ക്ക് അവസരമാകുമെന്ന് വിനോദ് തരകന്‍ വ്യക്തമാക്കുന്നു. അമേരിക്കയിലും ഇന്ത്യയിലുമായി ഏതാണ്ട് 1400 ജീവനക്കാര്‍ ഉള്ള ക്ലേസിസ് ടെക്‌നോളജിയുടെ മാനേജിങ് ഡയറക്ടറാണ് അദ്ദേഹം. ഒരു സ്വകാര്യ മാധ്യമത്തിന് നല്‍കിയ അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്.

മികച്ച രീതിയില്‍ ക്ലീന്‍ ചെയ്ത് അമേരിക്കയിലേയ്ക്ക് അയയ്ക്കുന്ന ചെമ്മീന്‍ ഇന്ത്യന്‍ മാര്‍ക്കറ്റുകളില്‍ വില്‍ക്കാന്‍ അവരെ പ്രാപ്തരാക്കും. യുഎസില്‍ ഇപ്പോള്‍ രണ്ട് ട്രില്യണ്‍ ഡോളര്‍ ഡെഫിസിറ്റ് ഉണ്ട്. ഗവണ്‍മെന്റിന്റെ വരുമാനവും ചെലവും തമ്മില്‍ താരതമ്യം ചെയ്യുമ്പോള്‍ അവര്‍ രണ്ട് ട്രില്യണ്‍ ഡോളര്‍ അധികമായി ചെലവഴിക്കുന്നുണ്ടെന്ന് അദ്ദേഹം പറയുന്നു. അവരുടെ പ്ലാന്‍ ഈ രണ്ട് ട്രില്യനില്‍ ഒരു ട്രില്യണ്‍ ഡോജ് എന്ന് പറഞ്ഞ ഇന്‌ഷ്യേറ്റീവ് കൊണ്ട് ചെലവഴിക്കുന്ന പണം സേവ് ചെയ്യുക എന്നതാണ്. രണ്ടാമത്തെ ട്രില്യണ്‍ താരീഫ് കൊണ്ട് ഉണ്ടാക്കുക എന്നതുമാണ്. അങ്ങനെ വരുമ്പോള്‍ ബഡ്ജറ്റ് താരീഫ് കൊണ്ട് റവന്യു ഉണ്ടാക്കാനാണ് ഗവണ്‍മെന്റ് ശ്രമിക്കുന്നതെന്നും അദ്ദേഹം വ്യക്തമാക്കുന്നു. 

25 ശതമാനം പകരം താരീഫ് എന്ന് പറഞ്ഞാണ് തുടങ്ങിയത്. പക്ഷെ ഇപ്പോള്‍ റഷ്യയില്‍ നിന്നും ഓയില്‍ വാങ്ങിക്കുന്ന ഒരു പ്രശ്‌നം കാണിച്ച് അധികമായി 25 ശതമാനം കൂട്ടിച്ചേര്‍ത്ത് 50 ശതമാനം ആക്കിയിരിക്കുകയാണ്. ഇത് ഇന്ത്യയ്ക്ക് മുന്നില്‍ തുറന്നിടുന്നത് വലിയൊരു സാധ്യതയാണെന്ന് വിനോദ് തരകന്‍ പറയുന്നു. കാരണം ഈയൊരു പ്രശ്‌നം വന്നതുകൊണ്ട് ഈ പ്രശ്‌നം എല്ലാവരും ചര്‍ച്ച ചെയ്യുന്നുണ്ട്. ട്രംപ് ഒരു ബിസിനസുകാരനാണ്. ഒരു ബിസിനസുകാരനെ സംബന്ധിച്ചടുത്തോളം അവര്‍ കൂടിയാലോചിച്ച ശേഷം അവര്‍ക്ക് മികച്ച നേട്ടം കൈവരിക്കുന്ന ട്രേഡ് ഡീല്‍ ആയിരിക്കും സ്വീകരിക്കുക. അവരത് ചൈനയുടെ കൂടെ ചെയ്യാന്‍ നോക്കി. പക്ഷെ ചൈന അതില്‍ നിന്ന് പിന്‍വലിഞ്ഞ് ഇന്ത്യയ്‌ക്കൊപ്പം ചേരാന്‍ ശ്രമിക്കുകയാണ്. ഈ സമയം ഇന്ത്യ വ്യക്തമായ കാഴ്ചപ്പാടോടെ നീങ്ങുകയാണെങ്കില്‍ ഇന്ത്യയ്ക്ക് അവര്‍ക്കൊപ്പം എത്താന്‍ കഴിയും. അതാണ് ഇതിനുള്ള പ്രതിവിധിയെന്ന് അദ്ദേഹം കൂട്ടിച്ചേര്‍ക്കുന്നു.  

ഫേസ്ബുക്കിൽ വാർത്തകൾ അറിയാൻ പേജ് ലൈക്ക് ചെയ്യുക Facebook ലിങ്ക് 👇
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്തിട്ട് ലൈക്ക് / Follow ബട്ടൺ ക്ലിക്ക് ചെയ്യുക. ഒപ്പം vachakam.com ന്റെ YouTube ചാനൽ സബ്സ്ക്രൈബ് ചെയ്യാനും മറക്കല്ലേ...
ചാനൽ ലിങ്ക്: https://www.youtube.com/channel/UCXRVmXRlpFL8TzgXtb8IIyw?sub_confirmation=1