ഫിലാഡൽഫിയ സെന്റ് ജോൺ ന്യൂമാൻ ക്‌നാനായ കത്തോലിക്കാ മിഷന് ഇനി സ്വന്തം ദേവാലയം!

OCTOBER 31, 2026, 2:33 PM

ഫിലാഡൽഫിയ: സർവ്വശക്തനായ ദൈവത്തിന് ഹൃദയം നിറഞ്ഞ നന്ദിയും സ്തുതിയും അർപ്പിച്ചുകൊണ്ട്, ഫിലഡൽഫിയ സെന്റ് ജോൺ ന്യൂമാൻ ക്‌നാനായ കത്തോലിക്കാ മിഷന് പുതിയ ദേവാലയം. ഇതോടെ ന്യൂയോർക്ക് ക്‌നാനായ കത്തോലിക്കാ ഫൊറോനയിൽ 4-ാമത്തെ ദേവാലയം കൂടി യാഥാർത്ഥ്യമായി.

ഫിലാഡൽഫിയയിലെ ന്യൂടൗണിലുള്ള 749 Durham Road, Newtown, PA 18940-ൽ 5.44 ഏക്കർ സ്ഥലവും പള്ളിയും മിഷന്റെ ആത്മീയ യാത്രയിലെ ചരിത്രപ്രധാനമായ ഒരു നാഴികക്കല്ലാണ്. സ്വന്തമായൊരു ദേവാലയവും വിശ്വാസപരിശീലനത്തിനും കൂട്ടായ്മയ്ക്കും അനുയോജ്യമായ ഒരു കേന്ദ്രവും എന്ന നീണ്ട 27 വർഷത്തെ ദീർഘകാല സ്വപ്നത്തിന്റെ സാക്ഷാത്കാരമാണിത്.

ഈ വലിയ നേട്ടം കൈവരിക്കാൻ പ്രാർത്ഥനകളിലൂടെയും സാമ്പത്തിക സഹായങ്ങളിലൂടെയും പ്രോത്സാഹനങ്ങളിലൂടെയും ഒപ്പംനിന്ന എല്ലാ വിശ്വാസികളോടും കുടുംബങ്ങളോടും അഭ്യുദയകാംക്ഷികളോടും ഹൃദയം നിറഞ്ഞ നന്ദി ഇടവക വികാരി റവ. ഡോക്ടർ ബിബി തറയിൽ അറിയിക്കുന്നു. ഓരോ പ്രാർത്ഥനയും ഓരോ സംഭാവനയും ഓരോ ത്യാഗവും ഓരോ പ്രോത്സാഹനവാക്കും ഈ സ്വപ്നസാക്ഷാത്കാരത്തിൽ വിലപ്പെട്ട പങ്കുവഹിച്ചിട്ടുണ്ട്.

ഈ ലക്ഷ്യത്തിനായി ആത്മാർത്ഥമായി പ്രവർത്തിച്ച ജനറൽ ബോഡി അംഗങ്ങളോടും പാരിഷ് കൗൺസിൽ അംഗങ്ങളോടും കമ്മിറ്റി അംഗങ്ങളായ ജിജി ചാമക്കാല, റോബിൻ നെടുമാക്കൽ, ജിപി കട്ടപ്പുറം, തോമസ് നെടുമാക്കൽ, സണ്ണി പാറക്കൽ, ലൂക്കോസ് തത്തംകിണറ്റുകര എന്നിവർക്കും മിഷൻ ഡയറക്ടർ റവ. ഡോ. ബിബി തറയിലിനും പ്രത്യേകം നന്ദി രേഖപ്പെടുത്തുന്നു.

ഈ പുതിയ അധ്യായത്തലേക്ക് പ്രവേശിക്കുമ്പോൾ, ഈ ദേവാലയം പ്രാർത്ഥനയുടെ ഭവനമായും വിശ്വാസപരിശീലനത്തിന്റെ കേന്ദ്രമായും ഫിലഡൽഫിയയിലെയും പരിസരപ്രദേശങ്ങളിലെയും ഭാവി ക്‌നാനായ കത്തോലിക്കാ തലമുറകൾക്ക് പ്രത്യാശ പകരുന്ന ആത്മീയ സങ്കേതമായും മാറട്ടെ എന്ന് നമുക്ക് പ്രാർത്ഥിക്കാം.

ഈ നേട്ടം, വിശ്വാസവും ഐക്യവും ത്യാഗവും ഉദാരമനസ്‌കതയും ചേർന്ന് സാക്ഷാത്കരിച്ച ഒരു സമൂഹത്തിന്റെ സ്വപ്നമാണ്. ക്രിസ്തുവിൽ വേരൂന്നിയും പൈതൃകമായ ക്‌നാനായ കത്തോലിക്കാ പാരമ്പര്യങ്ങളിൽ വളർന്നും, ഐക്യത്തിലും സ്‌നേഹത്തിലും മുന്നേറുന്ന ഒരു വിശ്വാസസമൂഹമായി നമുക്ക് ഒരുമിച്ച് ദൈവരാജ്യം പടുത്തുയർത്താം.

ഈ മഹത്തായ സംരംഭത്തിൽ പങ്കുചേർന്ന ഓരോരുത്തരെയും ദൈവം സമൃദ്ധമായി അനുഗ്രഹിക്കട്ടെ. നിങ്ങളുടെ പ്രാർത്ഥനകൾക്കും സ്‌നേഹത്തിനും ത്യാഗങ്ങൾക്കും ഉദാരമായ സംഭാവനകൾക്കും ദൈവം തക്ക പ്രതിഫലം നൽകട്ടെ.