നിയന്ത്രണംവിട്ട സ്കൂൾ ബസിലേക്ക് ചാടിക്കയറി, ബ്രേക്ക് ഇട്ട് നിർത്തി; 19 കുട്ടികൾക്ക് രക്ഷകനായി 27കാരൻ

OCTOBER 21, 2026, 10:17 PM

അമേരിക്കയിലെ മിനസോട്ടയിലെ സെന്റ് പോളിൽ നിയന്ത്രണംവിട്ട് നീങ്ങുകയായിരുന്ന സ്കൂൾ ബസ് സാഹസികമായി നിർത്തി കുട്ടികളെ രക്ഷിച്ച യുവാവിന്റെ ഇടപെടൽ ശ്രദ്ധേയമാകുന്നു. തന്റെ പ്രിയപ്പെട്ട ടെലിവിഷൻ പരമ്പരയായ ‘ഗ്രേയ്‌സ് അനാട്ടമി’യാണ് പ്രതിസന്ധിഘട്ടത്തിൽ ശാന്തനായി പ്രവർത്തിക്കാൻ പ്രചോദനമായതെന്ന് 27കാരനായ എബ്രോ അഹമ്മദ് പറഞ്ഞു.

തിങ്കളാഴ്ച ഉച്ചയോടെയാണ് സംഭവം. ബാറ്റിൽ ക്രീക്ക് മിഡിൽ സ്കൂളിലെ ബസ് വാതിലുകൾ തുറന്ന നിലയിലും മുന്നറിയിപ്പ് ലൈറ്റുകൾ തെളിഞ്ഞ നിലയിലും മണിക്കൂറിൽ ഏകദേശം 16 കിലോമീറ്റർ വേഗത്തിൽ നിരത്തിലൂടെ നീങ്ങുന്നത് സമീപത്തെ കടയിൽ ജോലി ചെയ്യുന്ന അഹമ്മദിന്റെ ശ്രദ്ധയിൽപ്പെട്ടു. ബസ് പൂർണമായി നിർത്തിയിരിക്കുമ്പോഴാണ് സാധാരണയായി ഇത്തരം ലൈറ്റുകൾ തെളിയുന്നതെന്നതിനാൽ എന്തോ അപകടമുണ്ടെന്ന് അദ്ദേഹം സംശയിച്ചു.

ബസ് കടന്നുപോയപ്പോൾ സംഭവം തന്നെ വല്ലാതെ പരിഭ്രാന്തനാക്കിയെന്ന് അഹമ്മദ് പറഞ്ഞു. ഉടൻതന്നെ അദ്ദേഹം റോഡരികിൽനിന്ന് ഓടിയെത്തി നീങ്ങിക്കൊണ്ടിരുന്ന ബസിലേക്ക് ചാടിക്കയറി. ഡ്രൈവർക്ക് ആരോഗ്യപ്രശ്നം ഉണ്ടായതായി മനസ്സിലാക്കിയതോടെ ബസ് നിർത്താനുള്ള ശ്രമം തുടങ്ങി.

ബസിന്റെ ഗിയർ നിയന്ത്രണം പരിശോധിച്ച് പാർക്ക് നിലയിലേക്ക് മാറ്റാനായിരുന്നു ശ്രമമെന്ന് അഹമ്മദ് പറഞ്ഞു. എന്നാൽ ബസ് ഓടിച്ച മുൻപരിചയമില്ലാത്തതിനാൽ പാർക്കിനും റിവേഴ്സിനും ഇടയിൽ ആശയക്കുഴപ്പമുണ്ടായി. അബദ്ധത്തിൽ ബസ് പിന്നോട്ടു നീങ്ങാൻ തുടങ്ങി. ബീപ് ശബ്ദം കേട്ടതോടെ പിഴവ് തിരിച്ചറിഞ്ഞ അദ്ദേഹം ഗിയർ ന്യൂട്രലിലാക്കി പാർക്കിങ് ബ്രേക്ക് ഉപയോഗിച്ച് ബസ് നിർത്തി.

പിന്നിലേക്ക് നോക്കിയപ്പോൾ കുട്ടികൾ ഭയന്നിരിക്കുന്നതാണ് കണ്ടതെന്ന് അഹമ്മദ് പറഞ്ഞു. ചിലർ കരയുകയും മൊബൈൽ ഫോണുകൾ എടുത്ത് പൊലീസിനെ വിളിക്കാൻ തയ്യാറെടുക്കുകയും ചെയ്തിരുന്നു.

സംഭവസമയത്ത് ബസിൽ 19 വിദ്യാർഥികളുണ്ടായിരുന്നുവെന്ന് സെന്റ് പോൾ പബ്ലിക് സ്കൂൾസ് അധികൃതർ അറിയിച്ചു. ആർക്കും പരിക്കേറ്റിട്ടില്ല. എന്നാൽ ഡ്രൈവറുടെ ആരോഗ്യനിലയെക്കുറിച്ച് അധികൃതർ കൂടുതൽ വിവരങ്ങൾ നൽകിയിട്ടില്ല.

ഡ്രൈവർ പിന്നീട് ബോധത്തിലേക്ക് തിരിച്ചുവരുന്നതായി തോന്നിയെങ്കിലും അപ്പോഴും പൂർണമായി സാധാരണ നിലയിലായിരുന്നില്ലെന്ന് അഹമ്മദ് പറഞ്ഞു. അതിനാൽ അദ്ദേഹത്തെ കൂടുതൽ ബുദ്ധിമുട്ടിക്കാതെ വിട്ടുനിന്നു. പൊലീസ് എത്തിയപ്പോഴേക്കും ഡ്രൈവറുടെ ആരോഗ്യപ്രശ്നം കുറഞ്ഞുതുടങ്ങിയിരുന്നുവെന്നും അദ്ദേഹം കൂട്ടിച്ചേർത്തു.

അഹമ്മദിന് വൈദ്യപരിശീലനമൊന്നുമില്ല. എന്നാൽ ‘ഗ്രേയ്‌സ് അനാട്ടമി’ എന്ന പരമ്പരയിൽ പ്രതിസന്ധിഘട്ടങ്ങളിൽ ഡോക്ടർമാർ പരിഭ്രാന്തരാകാതെ പ്രവർത്തിക്കുന്നത് കണ്ടിട്ടുണ്ടെന്നും അതാണ് ശാന്തനായി ചിന്തിക്കാൻ സഹായിച്ചതെന്നും അദ്ദേഹം പറഞ്ഞു. അതെല്ലാം അഭിനയമാണെന്ന് അറിയാമെങ്കിലും, സാഹചര്യങ്ങൾ വിലയിരുത്തി ശാന്തമായി പ്രവർത്തിക്കണമെന്ന ചിന്ത മനസ്സിലുണ്ടായിരുന്നുവെന്നും അഹമ്മദ് വ്യക്തമാക്കി.

സംഭവത്തെത്തുടർന്ന് മറ്റൊരു ബസ് എത്തിച്ചാണ് വിദ്യാർഥികളെ യാത്ര തുടരാൻ സഹായിച്ചത്. നായകനാണെന്ന് കരുതുന്നുണ്ടോയെന്ന ചോദ്യത്തിന്, തന്റെ സ്ഥാനത്ത് മറ്റാരെങ്കിലും ആയിരുന്നാലും കുട്ടികളെ രക്ഷിക്കാൻ ഇതേ രീതിയിൽ പ്രവർത്തിക്കുമായിരുന്നുവെന്നായിരുന്നു അഹമ്മദിന്റെ മറുപടി.