1960-കളിലെ ശീതയുദ്ധകാലം, ചൈനയുടെ ആണവപരീക്ഷണങ്ങൾ രഹസ്യമായി നിരീക്ഷിക്കാൻ അമേരിക്കയുടെ സെൻട്രൽ ഇന്റലിജൻസ് ഏജൻസിയും (CIA) ഇന്ത്യൻ ഇന്റലിജൻസ് ബ്യൂറോയും (IB) ചേർന്ന് നടത്തിയ ഒരു അതീവ രഹസ്യ ദൗത്യം ഇന്നും ലോകത്തിന് ഒരു വലിയ ഭീഷണിയായി നിലനിൽക്കുന്നു. ഉത്തരാഖണ്ഡിലെ നന്ദാദേവി പർവ്വതശിഖരത്തിൽ സ്ഥാപിക്കാനായി കൊണ്ടുപോയ അമേരിക്കൻ ആണവ ഉപകരണം 60 വർഷം മുൻപ് കാണാതായ സംഭവമാണ് വീണ്ടും ചർച്ചയാകുന്നത്.

ചൈനയുടെ ആണവ ശേഷി അറിയുന്നതിനായി റേഡിയോ ഐസോടോപ്പ് തെർമോ ഇലക്ട്രിക് ജനറേറ്റർ (RTG) എന്ന ആണവോർജ്ജം നൽകുന്ന നിരീക്ഷണോപകരണമാണ് നന്ദാദേവിയിൽ സ്ഥാപിക്കാൻ പദ്ധതിയിട്ടത്. 57 കിലോഗ്രാം ഭാരമുള്ള ഈ ഉപകരണത്തിൽ ഏഴ് പ്ലൂട്ടോണിയം-238 കാപ്സ്യൂളുകൾ അടങ്ങിയിരുന്നു. ഇന്ത്യൻ പർവ്വതാരോഹകനായ ക്യാപ്റ്റൻ മോഹൻ സിംഗ് കോഹ്‌ലിയുടെ നേതൃത്വത്തിലുള്ള സംഘം അമേരിക്കൻ പർവ്വതാരോഹകരുമായി ചേർന്നാണ് 1965-ൽ ഈ രഹസ്യ ദൗത്യം ആരംഭിച്ചത്.

നന്ദാദേവിയിലെ നാലാം ക്യാമ്പിന് സമീപം എത്തിയപ്പോൾ കനത്ത മഞ്ഞുകാറ്റിനെ തുടർന്ന് ദൗത്യം താൽക്കാലികമായി നിർത്തിവയ്ക്കാൻ തീരുമാനിച്ചു. തുടർന്ന്, പർവ്വതത്തിലെ ഒരു പാറയിടുക്കിൽ ഉപകരണം ഭദ്രമായി കെട്ടിവെച്ച നിലയിൽ ഉപേക്ഷിച്ചു. എന്നാൽ, അടുത്ത വർഷം വീണ്ടും പരിശോധനക്കെത്തിയപ്പോൾ ആ പ്രദേശമാകെ ഹിമപാതത്തിൽ തകർന്ന് മഞ്ഞുമൂടി കിടക്കുകയായിരുന്നു. ഉപകരണത്തിന്റെ ഒരു ഭാഗം പോലും കണ്ടെത്താനായില്ല. ഹിമപാതത്തിൽപ്പെട്ട് ഉപകരണം താഴേക്ക് ഒഴുകിപ്പോയതായി സംഘം തിരിച്ചറിഞ്ഞു.

ലോകത്തിലെ ഏറ്റവും പരിസ്ഥിതിലോലമായ മേഖലകളിൽ ഒന്നായ ഹിമാലയത്തിൽ ആണവ വസ്തുക്കൾ നഷ്ടപ്പെട്ടത് വലിയ ആശങ്കയുണ്ടാക്കി. ഹിമാലയൻ മഞ്ഞുപാളികൾക്കുള്ളിൽ എവിടെയോ ഇപ്പോഴും ഈ പ്ലൂട്ടോണിയം കാപ്‌സ്യൂളുകൾ ഉറങ്ങുന്നു എന്നാണ് അനുമാനം. മഞ്ഞുമലകൾ ഉരുകി ആണവവസ്തുക്കൾ ഋഷിഗംഗ, ഗംഗാ നദിയിലേക്ക് കലർന്നാൽ കോടിക്കണക്കിന് ആളുകൾക്ക് ആണവ ഭീഷണി ഉണ്ടാകാൻ സാധ്യതയുണ്ടെന്നാണ് വിദഗ്ധർ മുന്നറിയിപ്പ് നൽകുന്നത്. ഒരു രഹസ്യ ദൗത്യമായിരുന്നതിനാൽ, പതിറ്റാണ്ടുകളോളം അമേരിക്കൻ സർക്കാരും ഇന്ത്യയും ഈ വിവരം നിഷേധിച്ചിരുന്നു. എന്നാൽ ഇത്രയും വർഷങ്ങൾ കഴിഞ്ഞിട്ടും, തങ്ങൾക്ക് അങ്ങനെയൊന്ന് നഷ്ടപ്പെട്ടിട്ടില്ല എന്ന് ഔദ്യോഗികമായി അംഗീകരിക്കാൻ അമേരിക്കൻ ഭരണകൂടം ഇപ്പോഴും തയ്യാറല്ല.

English Summary: The US government still refuses to acknowledge the loss of a nuclear powered spying device containing plutonium in the Indian Himalayas 60 years ago during a joint covert mission with India The device disappeared on Nanda Devi peak in 1965 and experts fear it remains buried in the glacier posing a long term radioactive threat to the Ganges river system

Tags: USA News, USA News Malayalam, Nanda Devi, Himalayas, Lost Nuclear Device, Plutonium, CIA, India, Cold War, Ganga River, ആണവ ഉപകരണം, നന്ദാദേവി, ഹിമാലയം, പ്ലൂട്ടോണിയം, മലയാളം ന്യൂസ്, ന്യൂസ് മലയാളം, ലേറ്റസ്റ്റ് മലയാളം ന്യൂസ്, വചകം ന്യൂസ്

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്