റോഡ് ഐലൻഡ് ഗവർണർ ഡാൻ മക്കീ ഡെമോക്രാറ്റിക് പാർട്ടി പ്രൈമറിയിൽ പരാജയപ്പെട്ടു. ബിസിനസ് രംഗത്തെ പ്രമുഖ ഹെലേന ഫൗൾക്സിനോടാണ് ബുധനാഴ്ച നടന്ന മത്സരത്തിൽ മക്കീ തോറ്റത്. ഇതോടെ 2018ന് ശേഷം സ്വന്തം പാർട്ടിയുടെ സ്ഥാനാർഥിത്വം നേടാനാകാതെ പോകുന്ന അമേരിക്കയിലെ ആദ്യ അധികാരത്തിലിരിക്കുന്ന ഗവർണറായി മക്കീ മാറി.

മുൻ സി.വി.എസ്. എക്സിക്യൂട്ടീവായ ഫൗൾക്സും മക്കിയും തമ്മിലുള്ള പോരാട്ടം ഇത് രണ്ടാം തവണയാണ്. 2022ലെ ഡെമോക്രാറ്റിക് ഗവർണർ പ്രൈമറിയിലും ഇരുവരും ഏറ്റുമുട്ടിയിരുന്നു. അന്ന് ഏതാനും ശതമാനം വോട്ടുകളുടെ നേരിയ വ്യത്യാസത്തിലാണ് മക്കീ ഫൗൾക്സിനെ മറികടന്നത്.

2026ലെ പ്രൈമറി തിരഞ്ഞെടുപ്പുകളിൽ സ്വന്തം പാർട്ടിക്കുള്ളിൽ നിന്ന് തന്നെ പരാജയം നേരിടുന്ന അധികാരികളുടെയും ജനപ്രതിനിധികളുടെയും പട്ടികയിലേക്കാണ് മക്കീയും ഇപ്പോൾ എത്തുന്നത്.

2021ലാണ് മക്കീ ആദ്യമായി റോഡ് ഐലൻഡ് ഗവർണറായത്. അന്നത്തെ ഗവർണർ ജിന റൈമോണ്ടോ ബൈഡൻ ഭരണകൂടത്തിൽ വാണിജ്യ സെക്രട്ടറിയായി ചുമതലയേറ്റതിനെ തുടർന്നായിരുന്നു മക്കീ ഗവർണർ സ്ഥാനത്തെത്തിയത്. മുമ്പ് കംബർലാൻഡ് മേയറായും രണ്ട് തവണ ലെഫ്റ്റനന്റ് ഗവർണറായും പ്രവർത്തിച്ച മക്കീ 2022ൽ നടന്ന തിരഞ്ഞെടുപ്പിൽ ആദ്യ പൂർണ കാലാവധി നേടി.

2018ലാണ് ഇതിന് മുമ്പ് അധികാരത്തിലിരുന്ന ഒരു ഗവർണർ സ്വന്തം പാർട്ടിയുടെ പ്രൈമറിയിൽ പരാജയപ്പെട്ടത്. അന്ന് കൻസാസ് റിപ്പബ്ലിക്കൻ ഗവർണർ ജെഫ് കോലിയർ, റിപ്പബ്ലിക്കൻ പ്രൈമറിയിൽ അന്നത്തെ കൻസാസ് സ്റ്റേറ്റ് സെക്രട്ടറിയായിരുന്ന ക്രിസ് കോബാക്കിനോട് പരാജയപ്പെട്ടു. അന്നത്തെ പ്രസിഡന്റ് ഡൊണാൾഡ് ട്രംപിന്റെ പിന്തുണ കോബാക്കിനുണ്ടായിരുന്നു. 400ൽ താഴെ വോട്ടുകളുടെ വ്യത്യാസത്തിലാണ് കോലിയർ തോറ്റത്.

റോഡ് ഐലൻഡ് ആസ്ഥാനമായ സി.വി.എസ്. ഹെൽത്തിൽ മുതിർന്ന എക്സിക്യൂട്ടീവ് ഉൾപ്പെടെ നിരവധി പ്രമുഖ പദവികളിൽ ഫൗൾക്സ് പ്രവർത്തിച്ചിട്ടുണ്ട്. പിന്നീട് ഹഡ്സൺസ് ബേ കമ്പനിയുടെ ചീഫ് എക്സിക്യൂട്ടീവ് ഓഫീസറായും സേവനമനുഷ്ഠിച്ചു. നിലവിൽ കോസ്റ്റ്കോയുടെ ഡയറക്ടർ ബോർഡ് അംഗമാണ്.

2026ലെ തിരഞ്ഞെടുപ്പ് ഫൗൾക്സിന്റെ രാഷ്ട്രീയ രംഗത്തെ രണ്ടാമത്തെ ശ്രമമാണ്. 2022ലെ ഡെമോക്രാറ്റിക് ഗവർണർ പ്രൈമറിയിൽ മക്കീക്ക് പിന്നിൽ രണ്ടാം സ്ഥാനത്തെത്തിയിരുന്നു.

ഇത്തവണത്തെ പ്രചാരണത്തിൽ ഇരുവരുടെയും ഭരണപരിചയവും നേതൃത്വശേഷിയും പ്രധാന ചർച്ചാവിഷയമായി. സംസ്ഥാന ഭരണകൂടത്തെ മക്കീ കൈകാര്യം ചെയ്ത രീതിയെ ഫൗൾക്സ് രൂക്ഷമായി വിമർശിച്ചിരുന്നു.

2023 ഡിസംബറിൽ ഘടനാപരമായ സുരക്ഷാ പ്രശ്നങ്ങളെ തുടർന്ന് അപ്രതീക്ഷിതമായി അടച്ച വാഷിങ്ടൺ പാലവുമായി ബന്ധപ്പെട്ട സംസ്ഥാന ഭരണകൂടത്തിന്റെ നടപടികളും ഫൗൾക്സ് വിമർശിച്ചു. പാലം ഇപ്പോഴും പുനർനിർമാണത്തിലാണ്.

അതേസമയം, തന്റെ ഭരണത്തിന്റെ നേട്ടങ്ങൾ മക്കീ ഉയർത്തിക്കാട്ടി. സി.വി.എസിലെ ഫൗൾക്സിന്റെ മുൻകാല പ്രവർത്തനങ്ങളെ അദ്ദേഹം പലതവണ വിമർശിക്കുകയും സാധാരണ ജനങ്ങളുടെ ജീവിത യാഥാർഥ്യങ്ങളിൽ നിന്ന് അകന്നുനിൽക്കുന്ന കോർപ്പറേറ്റ് എക്സിക്യൂട്ടീവാണ് ഫൗൾക്സ് എന്ന് ആരോപിക്കുകയും ചെയ്തു. കുറിപ്പടി മരുന്നുകളുമായി ബന്ധപ്പെട്ട വിവാദങ്ങളിൽ സി.വി.എസ് സ്വീകരിച്ച നടപടികളെയും അദ്ദേഹം പ്രചാരണത്തിൽ ഉന്നയിച്ചു.

നവംബറിൽ നടക്കുന്ന പൊതുതെരഞ്ഞെടുപ്പിൽ ഡെമോക്രാറ്റിക് സ്ഥാനാർഥിയായി ഫൗൾക്സ് മത്സരിക്കും. റിപ്പബ്ലിക്കൻ പ്രൈമറിയിൽ റോഡ് ഐലൻഡ് ലെഫ്റ്റനന്റ് ഗവർണർ സ്ഥാനത്തേക്ക് 2022ൽ മത്സരിച്ച ആരൺ ഗക്കിയനും മുൻ ബിസിനസ് എക്സിക്യൂട്ടീവ് എലൈൻ പെലിനോയും തമ്മിലാണ് മത്സരം. ഇവരിൽ വിജയിക്കുന്ന സ്ഥാനാർഥിയെയാണ് ഫൗൾക്സ് പൊതുതെരഞ്ഞെടുപ്പിൽ നേരിടുക.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്