ട്രെന്റണിലും ഷിക്കാഗോയിലും മിനിട്ടുകളുടെ വ്യത്യാസത്തില്‍ കൂട്ട വെടിവെപ്പ്: മൂന്ന് പേര്‍ കൊല്ലപ്പെട്ടു; 23 പേര്‍ക്ക് പരിക്ക്

AUGUST 30, 2026, 6:42 PM

ഷിക്കാഗോ: അമേരിക്കന്‍ നഗരങ്ങളായ ന്യൂജേഴ്‌സിയിലെ ട്രെന്റണിലും ഷിക്കാഗോയിലും മിനിറ്റുകളുടെ വ്യത്യാസത്തില്‍ ഉണ്ടായ കൂട്ടവെടിവെപ്പില്‍ മൂന്ന് പേര്‍ കൊല്ലപ്പെടുകയും 23 പേര്‍ക്ക് ഗുരുതരമായി പരിക്കേല്‍ക്കുകയും ചെയ്തു. ഞായറാഴ്ച പുലര്‍ച്ചെ 12:25 ഓടെയാണ് ട്രെന്റണിലെ ലോക്കസ്റ്റ് സ്ട്രീറ്റിന് സമീപം ആദ്യ സംഭവം നടന്നത്. വിവരമറിഞ്ഞെത്തിയ പോലീസും രക്ഷാപ്രവര്‍ത്തകരും വെടിയേറ്റ നിലയില്‍ 11 പേരെ കണ്ടെത്തുകയായിരുന്നു. ഇതില്‍ രണ്ടുപേര്‍ സംഭവസ്ഥലത്തുതന്നെ മരിച്ചു. പരിക്കേറ്റ ഒന്‍പത് പേരെ ക്യാപിറ്റല്‍ ഹെല്‍ത്ത് റീജിയണല്‍ മെഡിക്കല്‍ സെന്ററിലേക്ക് മാറ്റി.

ജയില്‍ മോചിതനായ ശേഷം ജീവിതത്തിലേക്ക് തിരികെ വരാന്‍ ശ്രമിച്ച വ്യക്തിയാണ് കൊല്ലപ്പെട്ടവരില്‍ ഒരാളെന്ന് ട്രെന്റണ്‍ മേയര്‍ ഡബ്ല്യു. റീഡ് ഗുസിയോറ സ്ഥിരീകരിച്ചു. സംഭവത്തില്‍ ന്യൂജേഴ്‌സി ഗവര്‍ണര്‍ മിഷേല്‍ ഷെറില്‍ അനുശോചനം രേഖപ്പെടുത്തുകയും അന്വേഷണത്തിന് നിര്‍ദ്ദേശം നല്‍കുകയും ചെയ്തു. ട്രെന്റണ്‍ സംഭവത്തിന് കേവലം 12 മിനിറ്റുകള്‍ക്ക് ശേഷമാണ് ഷിക്കാഗോയിലെ സൗത്ത് സൈഡില്‍ രണ്ടാമത്തെ ആക്രമണം നടന്നത്. ശനിയാഴ്ച രാത്രി 11:37 ഓടെ ഒരു വലിയ ജനക്കൂട്ടത്തെ പോലീസ് പിരിച്ചുവിടാന്‍ ശ്രമിക്കുന്നതിനിടെയാണ് അക്രമികള്‍ ജനകൂട്ടത്തിന് നേരെ വെടിയുതിര്‍ത്തത്.

സംഭവത്തില്‍ 35 വയസ്സുള്ള ഒരാള്‍ മരണപ്പെടുകയും 21 നും 47 നും ഇടയില്‍ പ്രായമുള്ള ഏഴ് സ്ത്രീകളും ആറ് പുരുഷന്മാരും ഉള്‍പ്പെടെ 14 പേര്‍ക്ക് പരിക്കേല്‍ക്കുകയും ചെയ്തു. ഈ വര്‍ഷം ഷിക്കാഗോയില്‍ നടക്കുന്ന ഏറ്റവും വലിയ ഒറ്റപ്പെട്ട വെടിവെപ്പ് സംഭവമാണിതെന്ന് സ്ഥിരീകരിച്ചിട്ടുണ്ട്. അക്രമികളെ കുറിച്ച് വിവരം നല്‍കുന്നവര്‍ക്ക് കുക്ക് കൗണ്ടി ക്രൈം സ്റ്റോപ്പേഴ്‌സ് 10,000 ഡോളര്‍ പാരിതോഷികം പ്രഖ്യാപിച്ചു.

നഗരത്തിലേക്ക് നിയമവിരുദ്ധമായി ആയുധങ്ങള്‍ എത്തുന്നത് തടയുമെന്നും അക്രമങ്ങള്‍ തടയാന്‍ വേണ്ട നടപടികള്‍ സ്വീകരിക്കുമെന്നും ഷിക്കാഗോ മേയര്‍ ബ്രാന്‍ഡന്‍ ജോണ്‍സണ്‍ അറിയിച്ചു. രണ്ട് സംഭവങ്ങളിലും അക്രമികളെക്കുറിച്ചോ ആക്രമണത്തിന്റെ കാരണങ്ങളെക്കുറിച്ചോ പോലീസിന് ഇതുവരെ വിവരങ്ങളൊന്നും ലഭിച്ചിട്ടില്ല.

English Summary

Within a 15-minute window overnight, separate mass shootings in Trenton, New Jersey, and Chicago's South Side left at least three people dead and 23 others wounded, leaving investigators in both cities searching for suspects and motives. The Trenton attack killed two people—including a man actively participating in a reentry program after returning home from prison—and injured nine others near Locust Street around 12:25 a.m. Just 12 minutes earlier, at 11:37 p.m., gunmen opened fire into a large crowd being dispersed by police on Chicago's South Side, leaving one 35-year-old man dead and 14 others injured in the city's largest single shooting incident this year. State and local officials, including New Jersey Governor Mikie Sherrill and Chicago Mayor Brandon Johnson, publicly condemned the violence, as Cook County Crime Stoppers offered a $10,000 reward for information leading to an arrest in the Chicago shooting.