ആരോഗ്യം അനുവദിച്ചാല്‍ മകൻ മത്സരിക്കുന്ന മണ്ഡലത്തിൽ കോൺഗ്രസിന് വേണ്ടി പ്രചാരണത്തിനെത്തും എന്ന് എ കെ ആന്റണി

MARCH 26, 2024, 3:52 PM

തിരുവനന്തപുരം: ആരോഗ്യം അനുവദിച്ചാല്‍ ലോക്സഭ തെരഞ്ഞെടുപ്പ് പ്രചാരണത്തിന് പത്തനംതിട്ടയിലെത്തുമെന്ന് വ്യക്തമാക്കി മുതിര്‍ന്ന കോൺഗ്രസ് നേതാവ് എകെ ആന്റണി. ആന്റണിയുടെ മകൻ അനില്‍ ആന്റണി ബിജെപിക്ക് വേണ്ടി പത്തനംതിട്ടയില്‍ നിന്നാണ് മത്സരിക്കുന്നത്.

അതേസമയം മകനെതിരെ മത്സരിക്കുന്ന യുഡിഎഫ് സ്ഥാനാര്‍ത്ഥി ആന്റോ ആന്റണിക്ക് വേണ്ടിയാണ് ആന്റണി പത്തനംതിട്ടയിലെത്തുക എന്നാണ് പുറത്തു വരുന്ന വിവരം. കോൺഗ്രസിന് ഇത് 'ഡു ഓര്‍ ഡൈ ഇലക്ഷൻ' ആണെന്നും എകെ ആന്റണി കൂട്ടിച്ചേർത്തു.

കഴിഞ്ഞ തിരഞ്ഞെടുപ്പിൽ താൻ തിരുവനന്തപുരം കേന്ദ്രീകരിച്ചാണ് പ്രവർത്തിച്ചത്, ആരോഗ്യം അനുവദിക്കുന്നത് പോലെ തിരുവനന്തപുരത്തെ എല്ലാ സ്ഥലങ്ങളിലും പ്രചാരണത്തിന് എത്തും എന്നും എ കെ ആന്‍റണി പറഞ്ഞു.