വാട്സാപ്പിൽ അവതരിപ്പിച്ച യൂസർനെയിം സംവിധാനം; കടുത്ത മുന്നറിയിപ്പുമായി കേന്ദ്ര സർക്കാർ

JULY 1, 2026, 7:20 AM

വാട്സാപ്പിൽ പുതിയതായി അവതരിപ്പിച്ച പോകുന്ന യൂസർനെയിം സംവിധാനത്തിൽ അതീവ ജാഗ്രത പ്രകടിപ്പിച്ച് കേന്ദ്ര സർക്കാർ. ഫോൺ നമ്പർ വെളിപ്പെടുത്താതെ തന്നെ മറ്റുള്ളവരുമായി ബന്ധപ്പെടാൻ സാധിക്കുന്ന ഈ ഫീച്ചർ വലിയ സുരക്ഷാ ഭീഷണിയുണ്ടാക്കുമെന്നാണ് വിലയിരുത്തൽ. വ്യാജ അക്കൗണ്ടുകൾ സൃഷ്ടിക്കാനും ആളുകളെ കബളിപ്പിക്കാനും തട്ടിപ്പുകാർക്ക് ഇത് എളുപ്പവഴിയൊരുക്കുമെന്ന് സർക്കാർ വൃത്തങ്ങൾ മുന്നറിയിപ്പ് നൽകുന്നു.

പ്രമുഖരായ വ്യക്തികളുടെയോ സ്ഥാപനങ്ങളുടെയോ പേരിൽ വ്യാജ യൂസർനെയിമുകൾ ഉണ്ടാക്കി പണം തട്ടാൻ സാധ്യതയുണ്ടെന്ന് സൈബർ സുരക്ഷാ വിദഗ്ധർ ചൂണ്ടിക്കാട്ടുന്നു. ഇത്തരം അക്കൗണ്ടുകൾ തിരിച്ചറിയുക സാധാരണക്കാർക്ക് വലിയ വെല്ലുവിളിയായിരിക്കും. ഇക്കാരണത്താൽ വാട്സാപ്പിന് കർശനമായ നിർദ്ദേശങ്ങൾ നൽകാൻ കേന്ദ്ര സർക്കാർ തയ്യാറെടുക്കുകയാണ്.

പുതിയ ഫീച്ചർ നടപ്പിലാക്കുമ്പോൾ കൃത്യമായ സുരക്ഷാ മാനദണ്ഡങ്ങൾ പാലിക്കുന്നുണ്ടെന്ന് മെറ്റ ഉറപ്പുവരുത്തണം. ഉപയോക്താക്കളെ സംരക്ഷിക്കുന്നതിനായി ശക്തമായ ആന്റി-അബ്യൂസ് സംവിധാനങ്ങൾ ഏർപ്പെടുത്തണമെന്ന് കേന്ദ്രം ആവശ്യപ്പെട്ടിട്ടുണ്ട്. ഫീച്ചർ മൂലം ഏതെങ്കിലും തരത്തിലുള്ള തട്ടിപ്പുകൾ നടന്നാൽ അതിന് വാട്സാപ്പ് നേരിട്ട് ഉത്തരവാദിയായിരിക്കുമെന്നും സർക്കാർ വ്യക്തമാക്കിയിട്ടുണ്ട്.

യൂസർനെയിം സംവിധാനം വഴി നടക്കുന്ന തട്ടിപ്പുകൾ സംബന്ധിച്ച് നിരവധി പരാതികളാണ് വിവിധ കോണുകളിൽ നിന്ന് ഉയരുന്നത്. പ്രശസ്തരായ വ്യക്തികളുടെ പേരുകളിൽ ചെറിയ മാറ്റങ്ങൾ വരുത്തി യൂസർനെയിമുകൾ സ്വന്തമാക്കുന്നത് വലിയ തിരിച്ചടിയാകുമെന്ന് സംരംഭകർ ഉൾപ്പെടെയുള്ളവർ മുന്നറിയിപ്പ് നൽകുന്നുണ്ട്. ഇത് ഡിജിറ്റൽ ലോകത്തെ വിശ്വാസ്യതയെ തന്നെ ബാധിക്കുമെന്നും അവർ ആശങ്കപ്പെടുന്നു.

അമേരിക്കൻ പ്ലാറ്റ്‌ഫോമുകൾ ഇത്തരം മാറ്റങ്ങൾ കൊണ്ടുവരുമ്പോൾ ഇന്ത്യൻ നിയമങ്ങൾ പൂർണ്ണമായും പാലിക്കപ്പെടണമെന്നും കേന്ദ്രം ഓർമ്മിപ്പിച്ചു. രാജ്യത്തെ ടെലികോം സൈബർ സുരക്ഷാ ചട്ടങ്ങൾ പ്രകാരം ഉപയോക്താക്കളുടെ വിവരങ്ങൾ കൃത്യമായി പരിശോധിക്കപ്പെടേണ്ടതുണ്ട്. പുതിയ സംവിധാനം ഈ നിയമങ്ങളുടെ ലംഘനമാകുമോ എന്ന് സർക്കാർ വിശദമായി പരിശോധിക്കും.

സുരക്ഷാ പിഴവുകൾ കണ്ടെത്തിയാൽ വാട്സാപ്പിനെതിരെ ശക്തമായ നടപടികൾ സ്വീകരിക്കുമെന്ന് അധികൃതർ അറിയിച്ചു. തട്ടിപ്പുകൾ തടയാൻ ആവശ്യമായ മുൻകരുതലുകൾ എടുക്കാതെ യൂസർനെയിം ഫീച്ചർ രാജ്യത്ത് നടപ്പിലാക്കാൻ അനുവദിക്കില്ല. ഇക്കാര്യത്തിൽ വാട്സാപ്പിനോട് വിശദീകരണം തേടി നോട്ടീസ് അയക്കാനും സർക്കാർ ആലോചിക്കുന്നുണ്ട്.

English Summary

The Indian government has issued a stern warning to WhatsApp regarding its upcoming username feature citing serious concerns over potential impersonation and cyber fraud. Officials fear that allowing users to communicate without verified phone numbers could create loopholes for scammers to deceive the public by posing as celebrities or official agencies. The Ministry of Electronics and Information Technology has made it clear that messaging platforms will be held legally responsible if their new updates lead to public deception. While Meta claims the feature enhances privacy experts and tech leaders have raised red flags about the lack of trust mechanisms in the new system. The government is currently assessing the privacy implications and may issue a formal notice seeking corrective measures before the rollout.