ടാമ്പ: ടാമ്പാ ബേ മലയാളി സമൂഹത്തിന്റെ ഏറ്റവും വലിയ സാംസ്‌കാരിക ആഘോഷങ്ങളിലൊന്നായ Malayalee Association of Cetnral Florida (MACF)യുടെ 36-ാമത് ഗ്രാൻഡ് ഓണഘോഷം സെപ്തംബർ 5ന് വാല്രിക്കോയിലെ Sacred Heart Knanaya Communtiy Center-ൽ നടക്കും. രണ്ടായിരത്തിലധികം പേരുടെ പങ്കാളിത്തം പ്രതീക്ഷിക്കുന്ന ആഘോഷത്തിനായി മാസങ്ങളായി നടന്നുവരുന്ന ഒരുക്കങ്ങൾ അവസാനഘട്ടത്തിലെത്തി.

മൂന്നര പതിറ്റാണ്ടിലേറെയായി ടാമ്പാ ബേയിലെ മലയാളി സമൂഹത്തെ ഓണത്തിന്റെ ഒരുമയിലേക്ക് കൂട്ടിക്കൊണ്ടുവരുന്ന MACF, ഇത്തവണയും കേരളത്തിന്റെ തനത് പാരമ്പര്യവും കലാസാംസ്‌കാരിക വൈവിധ്യവും പ്രവാസഭൂമിയിൽ പുനരാവിഷ്‌കരിക്കുന്ന വിപുലമായ പരിപാടികളാണ് ഒരുക്കിയിരിക്കുന്നത്.

പരമ്പരാഗത ഓണസദ്യ, ചെണ്ടമേളം, താലപ്പൊലി, വർണശബളമായ ഘോഷയാത്ര, സംഗീതനൃത്ത പരിപാടികൾ, നാടൻ കലാരൂപങ്ങൾ തുടങ്ങി കേരളത്തിന്റെ ഓണപ്പെരുമ വിളിച്ചോതുന്ന നിരവധി പരിപാടികൾ അരങ്ങേറും. വിവിധ പ്രായവിഭാഗങ്ങളിലുള്ള നൂറുകണക്കിന് കലാകാരന്മാർ മാസങ്ങളായി നടത്തിയ പരിശീലനത്തിന്റെ മികവ് ഓണവേദിയിൽ അവതരിപ്പിക്കും.

MACF പ്രസിഡന്റ് ബെൻ കനകാഭായി, സെക്രട്ടറി പൂജ മോഹനകൃഷ്ണൻ, ട്രഷറർ രഘു രാജ്, പ്രസിഡന്റ് ഇലക്ട് രോഹിണി ഫിലിപ്പ് എന്നിവരുടെ നേതൃത്വത്തിൽ നൂറുകണക്കിന് സന്നദ്ധപ്രവർത്തകരാണ് ആഘോഷത്തിന്റെ വിവിധ വിഭാഗങ്ങളുടെ ഒരുക്കങ്ങൾക്ക് പിന്നിൽ പ്രവർത്തിക്കുന്നത്.

പരിപാടികളുടെ ഏകോപനത്തിനായി ഓഗസ്റ്റ് 23, 30 തീയതികളിൽ സംഘടിപ്പിച്ച മെഗാ പ്രാക്ടീസ് സെഷനുകൾ വലിയ പങ്കാളിത്തത്തോടെ പൂർത്തിയായി. ട്രസ്റ്റി ബോർഡ് ചെയർ അഞ്ജന നായർ, വിമൻസ് ഫോറം പ്രസിഡന്റ് പഞ്ചമി അജയ് എന്നിവർ പരിശീലന പ്രവർത്തനങ്ങൾക്ക് നേതൃത്വം നൽകി. അവസാനഘട്ട ഒരുക്കങ്ങളുടെ ഭാഗമായി സെപ്തംബർ 4ന് വൈകിട്ട് പരിപാടി നടക്കുന്ന Sacred Heart Knanaya Communtiy Centerൽ ഡ്രസ് റിഹേഴ്‌സലും നടക്കും.

ഇന്ന് ആയിരക്കണക്കിന് മലയാളികളെ ഒരേ വേദിയിൽ എത്തിക്കുന്ന ആഘോഷമായി വളർന്ന MACF ഓണത്തിന് പിന്നിൽ 36 വർഷത്തെ ഒരു സമൂഹത്തിന്റെ വളർച്ചയുടെ ചരിത്രവുമുണ്ട്. ടാമ്പാ ബേയിലെ ഏതാനും മലയാളി കുടുംബങ്ങളുടെ കൂട്ടായ്മയിൽ ആരംഭിച്ച പ്രവർത്തനങ്ങൾ തലമുറകൾ കൈമാറി മുന്നോട്ടുകൊണ്ടുപോയതിന്റെ ഫലമാണ് ഇന്നത്തെ വിപുലമായ ആഘോഷം.

ഈ വളർച്ചയ്ക്ക് അടിത്തറ പാകിയ മുൻ പ്രസിഡന്റുമാർ, മുൻ ഭാരവാഹികൾ, സന്നദ്ധപ്രവർത്തകർ, കുടുംബങ്ങൾ എന്നിവരുടെ സേവനത്തെ ങഅഇഎ നേതൃത്വം ഈ അവസരത്തിൽ നന്ദിയോടെ അനുസ്മരിച്ചു. മലയാളി പൈതൃകം സംരക്ഷിക്കുകയും പുതുതലമുറയെ അതുമായി ബന്ധിപ്പിക്കുകയും ചെയ്യണമെന്ന മുൻതലമുറയുടെ ദർശനമാണ് ഒരോ വർഷവും ഓണഘോഷത്തിലൂടെ പുതിയ തലമുറയിലേക്ക് കൈമാറുന്നതെന്ന് ഭാരവാഹികൾ പറഞ്ഞു.

മാത്യു മുണ്ടിയാങ്കൽ, Courtesy Toyota-യുടെ സുനിൽ വർഗീസ് എന്നിവരാണ് ഇത്തവണത്തെ ആഘോഷത്തിന്റെ പ്രധാന സ്‌പോൺസർമാർ.

MACF ഓണത്തിന്റെ ഏറ്റവും വലിയ ആകർഷണങ്ങളിലൊന്നായ പരമ്പരാഗത ഓണസദ്യയ്ക്ക് ഇത്തവണയും മികച്ച പ്രതികരണമാണ് ലഭിച്ചിരിക്കുന്നത്. കേരളത്തിന്റെ തനത് രുചിയും പാരമ്പര്യവും നിലനിർത്തി സദ്യ ഒരുക്കുന്നതിനായി ഷെഫ്മാർട്ടിന്റെ നേതൃത്വത്തിലുള്ള സംഘം കഴിഞ്ഞ ഏതാനും ആഴ്ചകളായി തയ്യാറെടുപ്പിലാണ്.

രാവിലെ 11 മുതൽ ഉച്ചയ്ക്ക് 1.30 വരെ വിവിധ റൗണ്ടുകളിലായി സദ്യ വിളമ്പും. ലഭ്യമായ സദ്യ ടിക്കറ്റുകളിൽ ഭൂരിഭാഗവും ഇതിനകം വിറ്റഴിഞ്ഞതായി സംഘാടകർ അറിയിച്ചു. ആവശ്യക്കാരുടെ എണ്ണം വർധിച്ച സാഹചര്യത്തിൽ പരിപാടിയുടെ സുഗമമായ നടത്തിപ്പിനെ ബാധിക്കാത്ത വിധത്തിൽ കൂടുതൽ പേർക്ക് അവസരം നൽകുന്നതിനുള്ള സാധ്യതയും സംഘാടകർ പരിശോധിച്ചുവരികയാണ്.

മലയാളികൾക്ക് മാത്രമായി ചുരുങ്ങുന്ന ആഘോഷമല്ല MACF ലക്ഷ്യമിടുന്നത്. സുഹൃത്തുക്കളെയും അയൽക്കാരെയും മറ്റു സമൂഹങ്ങളിലുള്ളവരെയും ഓണവേദിയിലേക്ക് കൂട്ടിക്കൊണ്ടുവന്ന് കേരളത്തിന്റെ ഭക്ഷണവും കലയും സംസ്‌കാരവും ആതിഥേയത്വവും പരിചയപ്പെടുത്താനുള്ള അവസരമായും ആഘോഷത്തെ മാറ്റുകയാണ് ലക്ഷ്യം.

ഓണസദ്യയുടെ രുചിയും ചെണ്ടമേളത്തിന്റെ താളവും താലപ്പൊലിയുടെ ഐശ്വര്യവും കലാകാരന്മാരുടെ പ്രകടനങ്ങളും കുടുംബങ്ങളുടെ ഒത്തുചേരലും ചേർന്ന് സെപ്തംബർ 5ന് വാല്രിക്കോയിൽ കേരളത്തിന്റെ ഒരു ചെറുപതിപ്പ് തന്നെ സൃഷ്ടിക്കുമെന്ന പ്രതീക്ഷയിലാണ് സംഘാടകർ.

'ഓണം ഒരു ദിവസത്തെ ആഘോഷം മാത്രമല്ല; നമ്മുടെ കുടുംബങ്ങളെയും തലമുറകളെയും സമൂഹത്തെയും ഒരുമിപ്പിക്കുന്ന അനുഭവമാണ്. 36 വർഷമായി MACF കാത്തുസൂക്ഷിക്കുന്ന ആ ഒരുമയുടെ പാരമ്പര്യം കൂടുതൽ വിപുലമായി ആഘോഷിക്കുകയാണ് ഇത്തവണയും,' ഭാരവാഹികൾ പറഞ്ഞു.

ടാമ്പാ ബേയിലെയും സമീപപ്രദേശങ്ങളിലെയും എല്ലാ മലയാളി കുടുംബങ്ങളെയും സുഹൃത്തുക്കളെയും സെപ്തംബർ 5ലെ ഓണഘോഷത്തിലേക്ക് MACF നേതൃത്വം സ്വാഗതം ചെയ്തു. കുടുംബസമേതം എത്തി ഓണസദ്യയും കലാസാംസ്‌കാരിക പരിപാടികളും ആസ്വദിച്ച് 36 വർഷത്തെ MACF ഓണപ്പെരുമയുടെ ഭാഗമാകണമെന്നും സംഘാടകർ അഭ്യർത്ഥിച്ചു.

കൂടുതൽ വിവരങ്ങളും പരിപാടി സംബന്ധിച്ച അപ്‌ഡേറ്റുകളും MACFയുടെ ഔദ്യോഗിക വെബ്‌സൈറ്റിലും Facebook പേജിലും ലഭ്യമാണ്.

കൂടുതൽ വിവരങ്ങൾക്ക്: വെബ്‌സൈറ്റ്: www.macftampa.com | Facebook: facebook.com/MacfTampa

അരുൺ ഭാസ്‌കർ

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്