അമേരിക്കൻ സമ്മർദ്ദം ശക്തം; ഖമേനിയുടെ വിലാപയാത്രയിൽ നിന്ന് 13 രാജ്യങ്ങൾ പിന്മാറിയതായി റിപ്പോർട്ട്

JULY 5, 2026, 11:47 AM

ഇറാൻ മുൻ പരമോന്നത നേതാവ് ആയത്തുള്ള അലി ഖമേനിയുടെ വിലാപയാത്ര ചടങ്ങുകളിൽ പങ്കെടുക്കുന്നതിൽ നിന്നും 13 രാജ്യങ്ങൾ പിന്മാറിയതായി റിപ്പോർട്ടുകൾ പുറത്തുവരുന്നു. അമേരിക്കയിൽ നിന്നും ഉണ്ടായ കടുത്ത നയതന്ത്ര സമ്മർദ്ദത്തെ തുടർന്നാണ് ഈ രാജ്യങ്ങൾ ചടങ്ങിൽ നിന്ന് വിട്ടുനിൽക്കുകയോ പ്രതിനിധികളുടെ എണ്ണം ചുരുക്കുകയോ ചെയ്തത്. ഇറാന്റെ ഔദ്യോഗിക വാർത്താ ഏജൻസിയായ തസ്നിം ആണ് ഉന്നത വൃത്തങ്ങളെ ഉദ്ധരിച്ച് ഈ വിവരം പുറത്തുവിട്ടത്.

ചടങ്ങിൽ വിദേശ രാജ്യങ്ങളുടെ പങ്കാളിത്തം കുറയ്ക്കുന്നതിനായി വാഷിംഗ്ടൺ വലിയ രീതിയിലുള്ള നയതന്ത്ര നീക്കങ്ങൾ നടത്തിയെന്നാണ് റിപ്പോർട്ടുകൾ വ്യക്തമാക്കുന്നത്. ചടങ്ങിൽ പങ്കെടുക്കുന്നത് അമേരിക്കയോടുള്ള സൗഹൃദപരമായ സമീപനമല്ലെന്ന രീതിയിൽ വിദേശകാര്യ സെക്രട്ടറി മാർക്കോ റൂബിയോ നയതന്ത്ര പ്രതിനിധികൾക്ക് രഹസ്യ നിർദ്ദേശം നൽകിയിരുന്നു. ഇത് ലംഘിച്ചാൽ ഉഭയകക്ഷി ബന്ധത്തെ ബാധിക്കുമെന്ന മുന്നറിയിപ്പും അമേരിക്കൻ ഭരണകൂടം നൽകിയതായി സൂചനയുണ്ട്.

കിഴക്കൻ യൂറോപ്പ്, ആഫ്രിക്ക, ഗൾഫ് മേഖലകൾ എന്നിവടങ്ങളിൽ നിന്നുള്ള പ്രധാന രാജ്യങ്ങളാണ് അമേരിക്കയുടെ കടുത്ത നിലപാടോടെ ചടങ്ങിൽ നിന്നും പിന്മാറിയത്. ആഫ്രിക്കൻ രാജ്യങ്ങൾക്ക് നൽകിവരുന്ന സാമ്പത്തിക സഹായങ്ങൾ നിർത്തലാക്കുമെന്ന ഭീഷണിയും അമേരിക്കൻ അംബാസഡർമാർ ഉയർത്തിയതായി റിപ്പോർട്ടിൽ പറയുന്നു. വിലാപയാത്രയിൽ നിന്നും വിട്ടുനിന്ന ചില രാജ്യങ്ങൾ പിന്നീട് തങ്ങളുടെ അസൗകര്യം ഇറാനെ ഔദ്യോഗികമായി അറിയിച്ചിട്ടുണ്ട്.

ഫെബ്രുവരിയിൽ ഉണ്ടായ യുഎസ് ഇസ്രായേൽ വ്യോമാക്രമണത്തിലാണ് ആയത്തുള്ള അലി ഖമേനി കൊല്ലപ്പെടുന്നത്. ഇതിനെത്തുടർന്ന് പശ്ചിമേഷ്യയിൽ വലിയ രീതിയിലുള്ള യുദ്ധപ്രതിസന്ധികൾ ഉടലെടുത്തിരുന്നു. ഖമേനിയുടെ മരണത്തെ തുടർന്ന് അദ്ദേഹത്തിന്റെ മകൻ മുജ്തബ ഖമേനിയെയാണ് പുതിയ പരമോന്നത നേതാവായി ഇറാൻ പ്രഖ്യാപിച്ചിരിക്കുന്നത്.

ഇറാൻ തലസ്ഥാനമായ ടെഹ്റാനിൽ നിലവിൽ വൻ സുരക്ഷാ ക്രമീകരണങ്ങളാണ് ചടങ്ങുകളോട് അനുബന്ധിച്ച് ഒരുക്കിയിട്ടുള്ളത്. ലക്ഷക്കണക്കിന് ആളുകളാണ് മുൻ പരമോന്നത നേതാവിന് ആദരാഞ്ജലി അർപ്പിക്കാനായി തെരുവുകളിൽ ഒത്തുകൂടിയിരിക്കുന്നത്. അമേരിക്കയുടെ കടുത്ത സമ്മർദ്ദങ്ങൾക്കിടയിലും നിരവധി വിദേശ പ്രതിനിധികൾ ചടങ്ങിൽ പങ്കാളികളാകുന്നുണ്ട്.

English Summary According to Iranian media reports at least 13 countries withdrew or scaled down their participation in the funeral of former Supreme Leader Ayatollah Ali Khamenei due to intense diplomatic pressure from the United States. US Secretary of State Marco Rubio reportedly directed embassies to warn host nations that attending the ceremony would be viewed as an unfriendly act affecting bilateral ties. Tags: Malayalam News, News Malayalam, Latest Malayalam News, Vachakam News, Iran News Malayalam, US Iran Tension News, Ayatollah Khamenei Funeral Malayalam