ബാലവിവാഹ നിരോധന നിയമവും പോക്‌സോയും ശരീഅത്ത് നിയമത്തിന് മുകളിലെന്ന് അലഹബാദ് ഹൈക്കോടതി; വിവാഹം കഴിക്കാൻ 18 വയസ്സ് നിർബന്ധം

JULY 9, 2026, 3:49 AM

ന്യൂഡൽഹി: പ്രായപൂർത്തിയായാൽ പെൺകുട്ടികൾക്ക് വിവാഹം കഴിക്കാൻ അനുവാദം നൽകുന്ന മുസ്ലിം വ്യക്തിനിയമത്തിലെ (ശരീഅത്ത്) വ്യവസ്ഥകൾക്ക്, രാജ്യത്തെ ബാലവിവാഹ നിരോധന നിയമത്തെയും (PCMA) പോക്‌സോ (POCSO) നിയമത്തെയും മറികടക്കാനാകില്ലെന്ന് അലഹബാദ് ഹൈക്കോടതി. പെൺകുട്ടികളുടെ കുറഞ്ഞ വിവാഹപ്രായം 18 വയസ്സായി നിശ്ചയിച്ചിട്ടുള്ള ഈ നിയമങ്ങൾ എല്ലാ പൗരന്മാർക്കും ഒരുപോലെ ബാധകമാണെന്ന് കോടതി വ്യക്തമാക്കി.

"പെൺകുട്ടികളുടെ വിവാഹപ്രായമായി പ്രായപൂർത്തിയാകുന്നതിനെ കണക്കാക്കുന്ന ശരീഅത്ത് നിയമത്തിലെ വ്യവസ്ഥകൾ, ബാലവിവാഹ നിരോധന നിയമത്തിനും പോക്‌സോ നിയമത്തിനും തികച്ചും വിരുദ്ധമാണ്," എന്ന് ജസ്റ്റിസ് ജെ.ജെ മുനീർ, ജസ്റ്റിസ് അച്ചൽ സച്ച്ദേവ് എന്നിവരടങ്ങിയ ഡിവിഷൻ ബെഞ്ച് ജൂലൈ 1-ലെ വിധിയിൽ ചൂണ്ടിക്കാട്ടി.

2026 ഫെബ്രുവരി 15-ന് 16 വയസ്സുള്ള മുസ്ലിം പെൺകുട്ടിയുടെ വിവാഹം നടക്കാൻ പോകുന്നുവെന്ന വിവരത്തെത്തുടർന്ന് പോലീസും ചൈൽഡ്‌ലൈൻ പ്രവർത്തകരും വിവാഹം തടയാൻ എത്തിയിരുന്നു. എന്നാൽ പെൺകുട്ടിയുടെ വീട്ടുകാരും നാട്ടുകാരും ചേർന്ന് പോലീസിനെയും ചൈൽഡ് വെൽഫെയർ കമ്മിറ്റി അംഗങ്ങളെയും മർദ്ദിക്കുകയും കുട്ടിയെ ബലമായി കടത്തിക്കൊണ്ടുപോവുകയും ചെയ്തു.

ഇതുമായി ബന്ധപ്പെട്ട് ഔദ്യോഗിക കൃത്യനിർവഹണം തടസ്സപ്പെടുത്തിയതടക്കമുള്ള വകുപ്പുകൾ ചേർത്ത് ഭാരതീയ ന്യായ സംഹിത (BNS) പ്രകാരം പോലീസ് എടുത്ത എഫ്.ഐ.ആർ (FIR) റദ്ദാക്കണമെന്ന് ആവശ്യപ്പെട്ട് 19 പ്രതികൾ നൽകിയ ഹർജി പരിഗണിക്കവെയാണ് ഹൈക്കോടതിയുടെ സുപ്രധാന നിരീക്ഷണം. 15 വയസ്സ് കഴിഞ്ഞാൽ മുസ്ലിം നിയമപ്രകാരം പെൺകുട്ടികൾക്ക് വിവാഹം കഴിക്കാൻ നിയമപരമായ അവകാശമുണ്ടെന്നായിരുന്നു ഹർജിക്കാരുടെ വാദം.

മതം ഏതായാലും രാജ്യത്തെ എല്ലാ പൗരന്മാർക്കും ബാധകമായ വിവാഹപ്രായം ബാലവിവാഹ നിരോധന നിയമത്തിൽ (2006) കൃത്യമായി പറയുന്നുണ്ട്. 18 വയസ്സിന് താഴെയുള്ള പെൺകുട്ടികളുടെ വിവാഹം അനുവദിച്ചാൽ അത്തരം ബന്ധങ്ങളിലെ ശാരീരിക ബന്ധം പോക്‌സോ നിയമപ്രകാരം കടുത്ത കുറ്റകൃത്യമായി മാറും.

ബാലവിവാഹ നിരോധന നിയമവും പോക്‌സോയും രാജ്യത്തെ പൊതുജനാരോഗ്യവും ദേശീയ നയങ്ങളും അടിസ്ഥാനമാക്കി നിർമ്മിച്ചിട്ടുള്ളതാണ്. ശാസ്ത്രീയമായ അടിത്തറയുള്ള ഈ നിയമങ്ങളിൽ നിന്ന് ആർക്കും മതത്തിന്റെ പേരിൽ മാറിനിൽക്കാനാകില്ല. സ്ത്രീകളുടെ വിവാഹപ്രായം 21 ആയി ഉയർത്താൻ നിർദ്ദേശിച്ചുള്ള 'ബാലവിവാഹ നിരോധന ഭേദഗതി ബിൽ 2021', 17-ാമത് ലോക്സഭ പിരിച്ചുവിട്ടതോടെ റദ്ദായിപ്പോയ വിവരവും കോടതി ഹർജി പരിഗണിക്കുന്നതിനിടെ പരാമർശിച്ചു.