ബാങ്ക് ഓഫ് ജപ്പാനിലേക്ക് പുതിയ പ്രതിനിധികൾ: യെന്നിന്റെ മൂല്യം ഇടിഞ്ഞു

FEBRUARY 25, 2026, 7:33 PM

ടോക്കിയോ: ജപ്പാൻ പ്രധാനമന്ത്രി സനായെ തകായ്‌ച്ചി സെൻട്രൽ ബാങ്കിലെ നിർണ്ണായക പദവികളിലേക്ക് രണ്ട് പ്രതിനിധികളെ നാമനിർദ്ദേശം ചെയ്തതിനെത്തുടർന്ന് വിദേശ വിനിമയ വിപണിയിൽ ജാപ്പനീസ് കറൻസിയായ യെന്നിന്റെ (Yen) മൂല്യം കുത്തനെ ഇടിഞ്ഞു.

സാമ്പത്തിക ഉത്തേജനത്തിനും കുറഞ്ഞ പലിശനിരക്കിനും മുൻഗണന നൽകുന്ന അയാനോ സാറ്റോ, ടോയിച്ചിറോ അസഡ എന്നീ അക്കാദമിക് വിദഗ്ധരെയാണ് തകായ്‌ച്ചി ബാങ്ക് ഓഫ് ജപ്പാന്റെ (BOJ) ഒമ്പതംഗ പോളിസി ബോർഡിലേക്ക് നിർദ്ദേശിച്ചത്. ഇതോടെ പലിശനിരക്ക് ഉയർത്താനുള്ള ബാങ്ക് ഓഫ് ജപ്പാൻ ഗവർണർ കസുവോ ഉവേദയുടെ ശ്രമങ്ങൾക്ക് തിരിച്ചടിയുണ്ടാകുമെന്ന ആശങ്കയിൽ ഡോളറിനെതിരെ യെന്നിന്റെ മൂല്യം 0.5 ശതമാനം ഇടിഞ്ഞ് 1.55 എന്ന നിലയിലെത്തി.

കഴിഞ്ഞ മാസത്തെ ഉപതിരഞ്ഞെടുപ്പിൽ വൻ ഭൂരിപക്ഷത്തോടെ അധികാരത്തിലേറിയ തകായ്‌ച്ചി, രാജ്യത്തെ മന്ദഗതിയിലുള്ള സമ്പദ്‌വ്യവസ്ഥയെ പുനരുജ്ജീവിപ്പിക്കുമെന്ന വാഗ്ദാനവുമായാണ് മുന്നോട്ട് പോകുന്നത്. ഇതിന്റെ ഭാഗമായി 135 ബില്യൺ ഡോളറിന്റെ ചിലവ് പദ്ധതിയും ഭക്ഷണസാധനങ്ങളുടെ മേലുള്ള എട്ട് ശതമാനം കൺസപ്ഷൻ ടാക്സ് രണ്ട് വർഷത്തേക്ക് റദ്ദാക്കുമെന്ന പ്രഖ്യാപനവും അവർ നടത്തിയിരുന്നു.

എന്നാൽ, ഈ വൻകിട പദ്ധതികൾ രാജ്യത്തെ കടക്കെണിയിലേക്കോ കറൻസി പ്രതിസന്ധിയിലേക്കോ നയിക്കുമെന്ന് സാമ്പത്തിക വിദഗ്ധർ മുന്നറിയിപ്പ് നൽകുന്നുണ്ട്. പലിശനിരക്ക് വർദ്ധിപ്പിക്കുന്നതിനോട് തകായ്‌ച്ചി പ്രകടിപ്പിച്ച വിയോജിപ്പും പുതിയ നാമനിർദ്ദേശങ്ങളും ജപ്പാൻ ബാങ്കിന്റെ സ്വതന്ത്രമായ തീരുമാനങ്ങളെ സ്വാധീനിക്കുമോ എന്ന ചോദ്യവും ഉയർത്തുന്നുണ്ട്.

യെന്നിന്റെ മൂല്യത്തിൽ ഇടിവുണ്ടായെങ്കിലും ജപ്പാൻ ഓഹരി വിപണിയിൽ വലിയ ഉന്മേഷമാണ് ദൃശ്യമായത്. സർക്കാരിന്റെ സാമ്പത്തിക ഉത്തേജന പദ്ധതികൾ വിപണിക്ക് ഗുണകരമാകുമെന്ന പ്രതീക്ഷയിൽ നിക്കി 225 (Nikkei 225) സൂചിക 2.2 ശതമാനം ഉയർന്ന് 58,583.12 എന്ന പോയിന്റിലെത്തി.