ഇന്ത്യാ സന്ദര്‍ശനം വീണ്ടും റദ്ദാക്കി ഇസ്രയേല്‍ പ്രധാനമന്ത്രി; സന്ദര്‍ശനം റദ്ദാക്കുന്നത് ഈ വര്‍ഷം മൂന്നാം തവണ

NOVEMBER 25, 2025, 6:11 PM

ന്യൂഡല്‍ഹി: ഇന്ത്യാ സന്ദര്‍ശനം തുടര്‍ച്ചയായ മൂന്നാം തവണയും റദ്ദാക്കി ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹു. സുരക്ഷാ വിഷയങ്ങള്‍ പരിഗണിച്ചാണ് നെതന്യാഹുവിന്റെ ഇന്ത്യ സന്ദര്‍ശനം മാറ്റിവച്ചുവെന്നാണ് ഇസ്രയേല്‍ മാധ്യമങ്ങള്‍ റിപ്പോര്‍ട്ട് ചെയ്യുന്നത്. ഡല്‍ഹി ചെങ്കോട്ടയ്ക്ക് സമീപം ഈ മാസം 10 ന് പതിമൂന്ന് പേരുടെ മരണത്തിന് ഇടയാക്കിയ സ്‌ഫോടനത്തിന് പിന്നാലെയാണ് സന്ദര്‍ശനം റദ്ദാക്കിയതെന്നായിരുന്നു റിപ്പോര്‍ട്ട്.

എന്നാല്‍ ആഭ്യന്തര വിഷയങ്ങളാണ് കാരണമെന്ന സൂചനയും ഉണ്ട്.
ഈ വര്‍ഷം ഇതു മൂന്നാം തവണയാണ് നെതന്യാഹു ഇന്ത്യാ സന്ദര്‍ശനം റദ്ദാക്കുന്നത്. ആഭ്യന്തര രാഷ്ട്രീയ പ്രശ്‌നങ്ങളും ഇടക്കാല തിരഞ്ഞെടുപ്പ് സാധ്യതകളും ചൂണ്ടിക്കാട്ടി ഏപ്രിലിലും സെപ്റ്റംബറിലും നടത്താനിരുന്ന സന്ദര്‍ശനങ്ങളില്‍ നിന്ന് നെതന്യാഹു പിന്‍മാറിയിരുന്നു.

ഇന്ത്യയും ഇസ്രയേലും തമ്മിലും പ്രധാനമന്ത്രി നരേന്ദ്ര മോദിയും പ്രധാനമന്ത്രി നെതന്യാഹുവും തമ്മിലുമുള്ള ബന്ധം വളരെ ശക്തമാണ്. പ്രധാനമന്ത്രി നരേന്ദ്ര മോദിയുടെ കീഴിലുള്ള ഇന്ത്യയിലെ സുരക്ഷയില്‍ പൂര്‍ണ വിശ്വാസമുണ്ട്. നെതന്യാഹുവിന്റെ സന്ദര്‍ശനത്തിനായി പുതിയൊരു തീയതി ഏകോപിപ്പിക്കാന്‍ ഇരു രാജ്യങ്ങളും ശ്രമിച്ചുവരികയാണെന്നും ഇസ്രയേല്‍ പ്രധാനമന്ത്രിയുടെ ഓഫിസ് അറിയിച്ചു.

നെതന്യാഹു ഡിസംബര്‍ പകുതിയോടെ ഇന്ത്യ സന്ദര്‍ശിക്കുമെന്നായിരുന്നു നേരത്തെയുണ്ടായിരുന്ന വിവരം. അതേസമയം സ്‌ഫോടനത്തെയും നെതന്യാഹുവിന്റെ സന്ദര്‍ശനത്തെയും ബന്ധിപ്പിക്കുന്നത് നിരുത്തരവാദപരമാണെന്ന് വിദേശകാര്യ മന്ത്രാലയം വ്യക്തമാക്കി.