നാട്ടിലുള്ള പ്രവാസികള്‍ക്ക് ആശ്വാസ വാര്‍ത്ത: ടിക്കറ്റ് നിരക്കില്‍ 64% വരെ ഇളവ്; സെപ്റ്റംബറോടെ യാത്രാച്ചെലവ് പകുതിയാകും

AUGUST 29, 2026, 6:26 AM

ദുബായ്: വേനലവധിയും സ്‌കൂള്‍ തുറക്കലും പ്രമാണിച്ച് നാട്ടില്‍ നിന്ന് യുഎഇയിലേക്കുള്ള വിമാന ടിക്കറ്റ് നിരക്കുകള്‍ ആകാശത്തോളം ഉയര്‍ന്നതോടെ കനത്ത സാമ്പത്തിക പ്രതിസന്ധിയിലായ പ്രവാസി കുടുംബങ്ങള്‍ക്ക് ഒടുവില്‍ ആശ്വാസവാര്‍ത്ത. ഈ മാസം അവസാനത്തോടെ കുതിച്ചുയരുന്ന വിമാന നിരക്കുകള്‍ സെപ്റ്റംബര്‍ പകുതിയോടെ പകുതിയിലധികമായി കുറയുമെന്ന് കണക്കുകള്‍ വ്യക്തമാക്കുന്നു. സെപ്റ്റംബര്‍ 13ന് ശേഷമുള്ള യാത്രകളില്‍ 49 മുതല്‍ 64 ശതമാനം വരെ ഇളവ് ലഭിക്കുന്നതോടെ സാധാരണക്കാരായ യാത്രാപ്രേമികള്‍ക്ക് വലിയൊരു തുക സാമ്പത്തികമായി ലാഭിക്കാന്‍ സാധിക്കും.

ഈ മാസം 30ന് ശരാശരി 2,089 ദിര്‍ഹം (ഏകദേശം 54,310 രൂപ) വരെ എത്തിയ ഒരു വശത്തേക്കുള്ള യാത്രാ നിരക്ക് സെപ്റ്റംബര്‍ 13 എത്തുന്നതോടെ 894 ദിര്‍ഹമായി (ഏകദേശം 23,000 രൂപ) കുത്തനെ താഴുമെന്നാണ് കണക്കാക്കുന്നത്. കേരളത്തിലെ പ്രധാന വിമാനത്താവളങ്ങളായ കൊച്ചി, കോഴിക്കോട്, കണ്ണൂര്‍, തിരുവനന്തപുരം എന്നിവിടങ്ങളില്‍ നിന്നെല്ലാം യുഎഇയിലേക്കുള്ള നിരക്കുകളില്‍ വന്‍ ഇളവുണ്ടാകും.

കൊച്ചിയില്‍ നിന്ന് ഓഗസ്റ്റ് 30ന് 2,272 ദിര്‍ഹമായിരുന്ന ഏറ്റവും കുറഞ്ഞ നിരക്ക് സെപ്റ്റംബര്‍ 13 ആകുമ്പോഴേക്ക് 1,057 ദിര്‍ഹമായി മാറും. കോഴിക്കോട് നിന്നുള്ള നിരക്ക് 2,285 ദിര്‍ഹത്തില്‍ നിന്ന് 1,070 ദിര്‍ഹമായും കുറയും. ഇതിലൂടെ സെപ്റ്റംബര്‍ പകുതിയോടെ യാത്ര പ്ലാന്‍ ചെയ്യുന്ന ഒരാള്‍ക്ക് 1,200 ദിര്‍ഹത്തിലധികം (30,000 രൂപയിലേറെ) ലാഭിക്കാന്‍ കഴിയും. ബെംഗളൂരുവില്‍ നിന്നാണ് ഏറ്റവും വലിയ നിരക്ക് വ്യത്യാസം രേഖപ്പെടുത്തുന്നത്. 2,513 ദിര്‍ഹത്തില്‍ നിന്ന് നിരക്ക് 914 ദിര്‍ഹമായി (64% കുറവ്) താഴുന്നതിനൊപ്പം ഡല്‍ഹി, ഹൈദരാബാദ്, മുംബൈ തുടങ്ങിയ നഗരങ്ങളില്‍ നിന്നും വലിയ തോതില്‍ നിരക്കുകള്‍ കുറയും.

കുട്ടികളുടെ സ്‌കൂള്‍ തുറക്കലും ജോലി സ്ഥലത്ത് പ്രവേശിക്കേണ്ട തീയതിയും അടുത്തെത്തിനില്‍ക്കെ, കുടുംബത്തോടൊപ്പം യുഎഇയിലേക്ക് മടങ്ങാന്‍ ലക്ഷങ്ങള്‍ ചെലവാക്കേണ്ടി വരുന്നത് സാധാരണക്കാരായ പ്രവാസികളുടെ സാമ്പത്തിക ആസൂത്രണത്തെ ആകെ താളംതെറ്റിച്ചിരിക്കുകയാണ്. ഇതിനാല്‍ പലരും നേരിട്ടുള്ള വിമാനങ്ങള്‍ ഒഴിവാക്കി മുംബൈ, മസ്‌കറ്റ് വഴി വളഞ്ഞ വഴിയിലൂടെ യാത്ര ചെയ്യാന്‍ നിര്‍ബന്ധിതരാവുകയായിരുന്നു. ടിക്കറ്റ് നിരക്കിലെ ഈ കനത്ത ഇളവ് പ്രതീക്ഷിച്ച് യാത്ര അല്‍പം വൈകിപ്പിക്കുന്നത് പ്രവാസി കുടുംബങ്ങള്‍ക്ക് വലിയ ആശ്വാസമാണ് നല്‍കുന്നത്. യാത്രാ പ്രതിസന്ധികള്‍ കാരണം സ്‌കൂളുകളില്‍ കുട്ടികളുടെ ഹാജര്‍ നില സാധാരണ നിലയിലാകാന്‍ അല്‍പം വൈകുമെങ്കിലും സാമ്പത്തിക ബാധ്യത ഒഴിവാക്കാന്‍ ഇതിലൂടെ സാധിക്കും.

എന്നാല്‍ ഈ ആനുകൂല്യം താത്കാലികം മാത്രമാണെന്നാണ് ട്രാവല്‍ ഏജന്‍സികള്‍ നല്‍കുന്ന മുന്നറിയിപ്പ്. സെപ്റ്റംബര്‍ 10 വരെ ഉയര്‍ന്ന നിരക്ക് തുടരുമെങ്കിലും അതിനുശേഷം കുറയുന്ന നിരക്കുകള്‍ ഒക്ടോബര്‍ അവസാനത്തോടെ വീണ്ടും ഉയര്‍ന്നേക്കാം. ഒക്ടോബറോടെ ദുബായില്‍ വന്‍കിട രാജ്യാന്തര മേളകളും സമ്മേളനങ്ങളും ആരംഭിക്കുന്നതും ശൈത്യകാല വിനോദസഞ്ചാര സീസണിന് തുടക്കമാകുന്നതും യാത്രാ ആവശ്യക്കാരുടെ എണ്ണം വര്‍ധിപ്പിക്കും. അതുകൊണ്ടുതന്നെ യാത്രാ തീയതികളില്‍ മാറ്റം വരുത്താന്‍ സാധിക്കുന്ന പ്രവാസികള്‍ സെപ്റ്റംബര്‍ പകുതിക്കും ഒക്ടോബറിനും ഇടയിലുള്ള സമയം പരമാവധി പ്രയോജനപ്പെടുത്തുന്നതാണ് ഉചിതം.

English Summary

Driven by the end of summer vacations and the reopening of schools, expat families returning to the UAE from India can expect significant financial relief as airfares are projected to plummet by 49% to 64% by mid-September. High demand has pushed end-of-August one-way rates up to an average of AED 2,089 (approx. ₹54,310), forcing many travelers onto indirect routes; however, prices are set to drop sharply to AED 894 (approx. ₹23,000) after September 13. Major Kerala routes like Kochi and Kozhikode will see fares cut by over half—saving travelers more than AED 1,200—while cities like Bengaluru will see discounts up to 64%. Travel agencies advise families who can adjust their travel dates to take advantage of this September window, while cautioning that rates are likely to surge again by late October with the arrival of Dubai's winter tourism season and international events.