അമേരിക്കൻ താല്പര്യങ്ങൾ സംരക്ഷിച്ചില്ലെങ്കിൽ മെക്സിക്കോയുമായും കാനഡയുമായുമുള്ള സ്വതന്ത്ര വ്യാപാര കരാർ പുതുക്കില്ലെന്ന് ഡോണാൾഡ് ട്രംപ്

JUNE 10, 2026, 10:06 PM

വാഷിംഗ്ടൺ: കാനഡ, മെക്സിക്കോ എന്നീ രാജ്യങ്ങളുമായുള്ള നിലവിലെ സ്വതന്ത്ര വ്യാപാര കരാർ അമേരിക്ക പുതുക്കിയേക്കില്ലെന്ന് പ്രസിഡന്റ് ഡോണാൾഡ് ട്രംപ്. ഇരു രാജ്യങ്ങളുമായുള്ള വ്യാപാരത്തിലെ വൻ സാമ്പത്തിക നഷ്ടം ചൂണ്ടിക്കാണിച്ചാണ് ട്രംപിന്റെ മുന്നറിയിപ്പ്.

വിഷയത്തിൽ ഇരു രാജ്യങ്ങളുടെയും ഭരണത്തലവന്മാരുമായി ചർച്ച നടത്തുന്നുണ്ടെങ്കിലും കരാർ നിലനിർത്താൻ തനിക്ക് താല്പര്യമില്ലെന്ന് വൈറ്റ് ഹൗസിൽ വാർത്താലേഖകരോട് സംസാരിക്കവെ ട്രംപ് വ്യക്തമാക്കി. കാനഡയിൽ നിന്നോ മെക്സിക്കോയിൽ നിന്നോ അമേരിക്കയ്ക്ക് ഒന്നും ആവശ്യമില്ലെന്നും എന്നാൽ അവർക്ക് ആവശ്യമായതെല്ലാം നൽകുന്നത് അമേരിക്കയാണെന്നും ട്രംപ് കൂട്ടിച്ചേർത്തു.

വരുന്ന ജൂലൈ ഒന്നിനകം നിലവിലെ വ്യാപാര കരാർ പുതുക്കാൻ മൂന്ന് രാജ്യങ്ങളും അനുമതി നൽകേണ്ടതുണ്ട്. അല്ലാത്തപക്ഷം കരാറിൽ നിന്ന് പിന്മാറാനുള്ള താല്പര്യം ഔദ്യോഗികമായി അറിയിക്കണം. കരാറിൽ നിന്ന് പൂർണ്ണമായി പിന്മാറാൻ പത്ത് വർഷത്തെ സമയപരിധിയുള്ളതിനാൽ ഈ കാലയളവിൽ ആവശ്യമായ മാറ്റങ്ങൾ വരുത്താൻ രാജ്യങ്ങൾക്ക് സാധിക്കും. കഴിഞ്ഞ വർഷത്തെ കണക്കുകൾ പ്രകാരം കാനഡയുമായുള്ള വ്യാപാരത്തിൽ 46 ശതകോടി ഡോളറിന്റെയും മെക്സിക്കോയുമായി 197 ശതകോടി ഡോളറിന്റെയും വൻ വ്യാപാര കമ്മി പ്രവാസികളുടെയും അമേരിക്കൻ സമ്പദ്‌വ്യവസ്ഥയുടെയും മേൽ വലിയ ബാധ്യതയുണ്ടാക്കുന്നു എന്നാണ് ട്രംപിന്റെ നിലപാട്.

പ്രശ്നപരിഹാരത്തിനായി അമേരിക്കയും മെക്സിക്കോയും തമ്മിലുള്ള രണ്ടാം ഘട്ട ചർച്ചകൾ ജൂൺ 16, 17 തീയതികളിൽ വാഷിംഗ്ടണിൽ നടക്കും. കാർഷിക മേഖലയ്ക്കും ഇരുരാജ്യങ്ങൾക്കും തുല്യമായ അവസരങ്ങൾ ഉറപ്പാക്കുന്നതിനും മുൻഗണന നൽകുന്ന ചർച്ചകളുടെ മൂന്നാം ഘട്ടം ജൂലൈ 20ന് മെക്സിക്കോ സിറ്റിയിൽ നടക്കുമെന്ന് അമേരിക്കൻ വ്യാപാര പ്രതിനിധിയുടെ ഓഫീസ് അറിയിച്ചു.

അതേസമയം, കാനഡയും അമേരിക്കയും തമ്മിൽ നടത്തിയ പ്രാഥമിക ചർച്ചകൾ അനുകൂലമായിരുന്നു എന്ന് കനേഡിയൻ വ്യാപാര മന്ത്രി ഡൊമിനിക് ലെബ്ലാങ്ക് വ്യക്തമാക്കിയെങ്കിലും ഔദ്യോഗിക ചർച്ചകളുടെ തീയതി ഇതുവരെ പ്രഖ്യാപിച്ചിട്ടില്ല.