നാറ്റോയുടെ ആകാശക്കണ്ണാകാൻ ബോംബാർഡിയർ-സാബ് സഖ്യം; കാനഡയുടെ പ്രതിരോധ മേഖലയ്ക്ക് വൻ കുതിച്ചുചാട്ടം

APRIL 29, 2026, 9:00 PM

ഒട്ടാവ: നാറ്റോ തങ്ങളുടെ കാലപ്പഴക്കം ചെന്ന നിരീക്ഷണ വിമാനങ്ങൾക്ക് പകരം കനേഡിയൻ കമ്പനിയായ ബോംബാർഡിയറും സ്വീഡിഷ് കമ്പനിയായ സാബും സംയുക്തമായി വികസിപ്പിച്ച 'ഗ്ലോബൽ ഐ' സംവിധാനം തിരഞ്ഞെടുക്കാൻ ഒരുങ്ങുന്നതായി റിപ്പോർട്ടുകൾ.

ഫ്രഞ്ച്, ജർമ്മൻ മാധ്യമങ്ങളാണ് ഈ സുപ്രധാന പ്രതിരോധ കരാറിനെക്കുറിച്ചുള്ള വിവരങ്ങൾ പുറത്തുവിട്ടത്. നിലവിൽ നാറ്റോ ഉപയോഗിക്കുന്ന ബോയിംഗ് E-3A സെൻട്രി വിമാനങ്ങൾക്ക് പകരമായാണ് അത്യാധുനികമായ ഈ നിരീക്ഷണ സംവിധാനം പരിഗണിക്കുന്നത്.

ബോംബാർഡിയറിന്റെ ബിസിനസ് ജെറ്റുകളിൽ സാബിന്റെ ആധുനിക സർവൈലൻസ് സാങ്കേതികവിദ്യ ഘടിപ്പിച്ചാണ് 'ഗ്ലോബൽ ഐ' നിർമ്മിക്കുന്നത്. ആകാശത്തും കടലിലും കരയിലുമുള്ള ഭീഷണികളെ ദൂരപരിധിയിൽ നിന്ന് തന്നെ കണ്ടെത്താൻ ശേഷിയുള്ള ഈ വിമാനങ്ങൾക്ക് തുടർച്ചയായി 11 മണിക്കൂറിലധികം പറക്കാൻ സാധിക്കും.

1982-ന് ശേഷം ആദ്യമായാണ് ബോയിംഗ് അല്ലാത്ത ഒരു വിമാനം ഇത്തരമൊരു സുപ്രധാന ദൗത്യത്തിനായി നാറ്റോ പരിഗണിക്കുന്നത് എന്നത് ശ്രദ്ധേയമാണ്. നേരത്തെ ബോയിംഗ് E-7A വെഡ്‌ജ്‌ടെയിൽ വിമാനങ്ങളെ നാറ്റോ പരിഗണിച്ചിരുന്നെങ്കിലും, അമേരിക്കൻ വ്യോമസേന ഈ പദ്ധതിയിൽ നിന്ന് പിന്മാറി ബഹിരാകാശ അധിഷ്ഠിത നിരീക്ഷണ സംവിധാനങ്ങളിലേക്ക് മാറിയതോടെയാണ് നാറ്റോ പുതിയ വഴികൾ തേടിയത്.

നിലവിൽ സ്വീഡൻ, ഫ്രാൻസ്, യു.എ.ഇ എന്നീ രാജ്യങ്ങൾ ഈ സംവിധാനം ഉപയോഗിക്കുന്നുണ്ട്. കരാർ ഔദ്യോഗികമായി സ്ഥിരീകരിക്കപ്പെട്ടാൽ കാനഡയിലെ മോൺട്രിയൽ ആസ്ഥാനമായുള്ള ബോംബാർഡിയറിനും കനേഡിയൻ സമ്പദ്‌വ്യവസ്ഥയ്ക്കും ഇത് വലിയ നേട്ടമാകും.