ന്യൂഡൽഹി: ഇന്ത്യൻ വിദ്യാഭ്യാസ സ്ഥാപനങ്ങളുമായുള്ള സഹകരണം ശക്തമാക്കുന്നതിന്റെ ഭാഗമായി കാനഡ 13 പുതിയ കരാറുകളിൽ ഒപ്പിട്ടതായി കനേഡിയൻ പ്രധാനമന്ത്രി മാർക്ക് കാർണി അറിയിച്ചു.

നാലു ദിവസത്തെ ഔദ്യോഗിക സന്ദർശനത്തിനായി ഇന്ത്യയിലെത്തിയ അദ്ദേഹം, ഇരുരാജ്യങ്ങളിലെയും വിദ്യാർത്ഥികൾക്ക് അന്താരാഷ്ട്ര നിലവാരത്തിലുള്ള അക്കാദമിക് എക്സ്പോഷർ ലഭ്യമാക്കുകയാണ് ഇതിലൂടെ ലക്ഷ്യമിടുന്നതെന്ന് വ്യക്തമാക്കി.

പ്രശസ്തമായ മക്ഗിൽ സർവകലാശാല (McGill University) ഇന്ത്യയിൽ ആർട്ടിഫിഷ്യൽ ഇന്റലിജൻസ് എഡ്യൂക്കേഷൻ ആൻഡ് റിസർച്ച് സെന്റർ സ്ഥാപിക്കും. ജൂബിലന്റ് ഭാർട്ടിയ ഗ്രൂപ്പുമായി സഹകരിച്ചാണ് ഈ പദ്ധതി നടപ്പിലാക്കുന്നത്.

2027 മേയിൽ ആരംഭിക്കുന്ന ഈ കേന്ദ്രത്തിൽ ആദ്യഘട്ടത്തിൽ 50 വിദ്യാർത്ഥികൾക്ക് പ്രവേശനം നൽകും. ആർട്ടിഫിഷ്യൽ ഇന്റലിജൻസ് മേഖലയിലെ മാസ്റ്റേഴ്സ് കോഴ്സാണ് ഇവിടെ ലഭ്യമാകുക.

മക്ഗിൽ സർവകലാശാലയിലെ ഫാക്കൽറ്റി ഓഫ് എൻജിനീയറിങ് ആയിരിക്കും ഇതിന്റെ പാഠ്യപദ്ധതിയും ഗുണനിലവാരവും നിശ്ചയിക്കുന്നത്.

ഫെബ്രുവരി 27 മുതൽ മാർച്ച് 2 വരെ നീളുന്ന സന്ദർശനത്തിനായി പ്രധാനമന്ത്രി നരേന്ദ്ര മോദിയുടെ ക്ഷണപ്രകാരമാണ് മാർക്ക് കാർണി ഇന്ത്യയിലെത്തിയത്. ഹൈദരാബാദ് ഹൗസിൽ നടക്കുന്ന ചർച്ചകളിൽ ഇരുരാജ്യങ്ങളും തമ്മിലുള്ള തന്ത്രപരമായ പങ്കാളിത്തം നേതാക്കൾ വിലയിരുത്തും.

നയതന്ത്ര നീക്കങ്ങൾ: പ്രധാനമന്ത്രിമാരുടെ കൂടിക്കാഴ്ചയ്ക്ക് മുന്നോടിയായി ഇന്ത്യൻ വിദേശകാര്യ മന്ത്രി എസ്. ജയശങ്കറും കനേഡിയൻ വിദേശകാര്യ മന്ത്രി അനിത ആനന്ദും തമ്മിൽ ചർച്ചകൾ നടത്തി.

കാനഡയിലെ സർവകലാശാലകളുടെ കൂട്ടായ്മയായ യൂണിവേഴ്സിറ്റീസ് കാനഡയുടെ നേതൃത്വത്തിൽ നടന്ന അക്കാദമിക് മിഷന്റെ ഭാഗമായാണ് ഈ നിർണ്ണായക പ്രഖ്യാപനങ്ങൾ ഉണ്ടായത്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്