H5N1 ഏവിയൻ ഇൻഫ്ലുവൻസ ബാധിച്ച ആദ്യ മനുഷ്യൻ; രോഗം ബാധിച്ച കൗമാരക്കാരി ഐസിയു വിട്ടതായി റിപ്പോർട്ട്

JANUARY 1, 2025, 7:13 PM

കാനഡയിലെ H5N1 ഏവിയൻ ഇൻഫ്ലുവൻസ ബാധിച്ച ആദ്യ മനുഷ്യൻ എന്ന പ്രത്യേകതയുള്ള കൗമാരക്കാരിയെ കഴിഞ്ഞ മാസം തീവ്രപരിചരണത്തിൽ നിന്ന് മാറ്റുകയും അനുബന്ധ ഓക്സിജൻ നീക്കം ചെയ്യുകയും ചെയ്തതായി റിപ്പോർട്ട്.

നവംബർ മുതൽ ആരോഗ്യ ഉദ്യോഗസ്ഥർ കേസിനെക്കുറിച്ച് ഒരു അപ്‌ഡേറ്റും നൽകിയിരുന്നില്ല. എന്നാൽ പുതിയ വിശദാംശങ്ങൾ അനുസരിച്ചു കുട്ടിയെ തീവ്രപരിചരണ വിഭാഗത്തിൽ നിന്ന് മാറ്റി എന്നാണ് ലഭിക്കുന്ന വിവരം. കാനഡയിലെ പബ്ലിക് ഹെൽത്ത് ഏജൻസിയിലെ ഡോക്ടർമാർ ഒപ്പിട്ട റിപ്പോർട്ടിൽ, ബി.സി. സെൻ്റർ ഫോർ ഡിസീസ് കൺട്രോൾ, ബി.സി. കുട്ടികളുടെ ആശുപത്രി എന്നിവരെ ഉദ്ധരിച്ചു ന്യൂ ഇംഗ്ലണ്ട് ജേണൽ ഓഫ് മെഡിസിനിൽ ആണ് ഇക്കാര്യം പ്രസിദ്ധീകരിച്ചത്.

നേരിയ ആസ്ത്മയുള്ള 13 വയസ്സുള്ള പെൺകുട്ടിയായ രോഗിയെ ആദ്യം പനിയും കൺജങ്ക്റ്റിവിറ്റിസും ബാധിച്ച് നവംബർ 4-ന് ആണ് അത്യാഹിത വിഭാഗത്തിലേക്ക് കൊണ്ടുപോയത്. എന്നാൽ ചികിത്സ നൽകാതെ അവളെ ആദ്യം വീട്ടിലേക്ക് അയച്ചു, മൂന്ന് ദിവസത്തിന് ശേഷം ശ്വസന സംബന്ധമായ അസുഖം കാരണം അവളെ തിരികെ ആശുപത്രിയിലേക്ക് കൊണ്ടുവന്നു. കേസ് റിപ്പോർട്ട് അനുസരിച്ച് ന്യുമോണിയ, നിശിത വൃക്ക ക്ഷതം, ത്രോംബോസൈറ്റോപീനിയ, ല്യൂക്കോപീനിയ, ശ്വസന പരാജയം എന്നിവയാൽ കുട്ടി ബുദ്ധിമുട്ടുകയായിരുന്നു.

ആശുപത്രിയിലെ പീഡിയാട്രിക് വാർഡിലേക്ക് മാറ്റുന്ന ഡിസംബർ 4 വരെ അവൾ തീവ്രപരിചരണത്തിൽ തുടർന്നു. ഡിസംബർ 18 ആയപ്പോഴേക്കും അവൾക്ക് സപ്ലിമെൻ്റൽ ഓക്സിജൻ ആവശ്യമില്ല എന്ന നിലയിലേക്ക് മാറി എന്നാണ് ലഭിക്കുന്ന വിവരം.

അതേസമയം എച്ച് 5 ഇൻഫ്ലുവൻസ വൈറസിൻ്റെ സാന്നിധ്യം പരിശോധനയിലൂടെ സ്ഥിരീകരിച്ചതിന് ശേഷം നവംബർ 9 ന് പ്രവിശ്യാ ഉദ്യോഗസ്ഥർ കുട്ടിയുടെ അണുബാധ പ്രഖ്യാപിക്കുകയും അവൾക്ക് എങ്ങനെ, എവിടെ നിന്നാണ് രോഗം പിടിപെട്ടത് എന്നതിനെക്കുറിച്ച് അന്വേഷണം ആരംഭിക്കുകയും ചെയ്തു.

ബി.സി.യുടെ ഫ്രേസർ വാലിയിൽ നിന്നുള്ള ആളാണെന്നതൊഴിച്ചാൽ, ആ സമയത്ത് രോഗിയെക്കുറിച്ചുള്ള സ്വകാര്യ വിവരങ്ങളൊന്നും സർക്കാർ പങ്കിട്ടില്ല. ന്യൂ ഇംഗ്ലണ്ട് ജേണൽ ഓഫ് മെഡിസിനിൽ ഈ ആഴ്ച പ്രസിദ്ധീകരിച്ച റിപ്പോർട്ട് രോഗിയും അവളുടെ കുടുംബവും അവളുടെ കേസിൻ്റെ കൂടുതൽ വിശദാംശങ്ങൾ പുറത്തുവിടാൻ സമ്മതിച്ചതായി സൂചിപ്പിക്കുന്നു.