വാഷിംഗ്ടണില്‍ നാഷണല്‍ ഗാര്‍ഡിനെ ഇറക്കി ട്രംപ്: തെരുവില്‍ തോക്കേന്തിയ സൈന്യം, കുറ്റകൃത്യങ്ങള്‍ തടയുന്നതില്‍ വന്‍ പരാജയമെന്ന് റോയിട്ടേഴ്‌സ് അന്വേഷണ റിപ്പോര്‍ട്ട്

AUGUST 19, 2026, 9:59 PM

വാഷിംഗ്ടണ്‍: രാജ്യ തലസ്ഥാനത്തെ കുറ്റകൃത്യങ്ങള്‍ അടിച്ചമര്‍ത്താനെന്ന പേരില്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് വിന്യസിച്ച ആയിരക്കണക്കിന് നാഷണല്‍ ഗാര്‍ഡ് സൈനികര്‍ ലക്ഷ്യം കാണുന്നതില്‍ വന്‍ പരാജയമെന്ന് അന്താരാഷ്ട്ര വാര്‍ത്താ ഏജന്‍സിയായ റോയിട്ടേഴ്‌സ് ചൂണ്ടിക്കാണിക്കുന്നു. തലസ്ഥാനത്തെ തെരുവുകളില്‍ അത്യാധുനിക ആയുധങ്ങളുമായി പട്രോളിംഗ് നടത്തുന്ന സൈനികര്‍ക്ക് യഥാര്‍ത്ഥ കുറ്റവാളികളെ നിയമത്തിന് മുന്നില്‍ കൊണ്ടുവരാന്‍ കഴിയുന്നില്ലെന്ന് സുപീരിയര്‍ കോടതിയിലെ കേസ് രേഖകള്‍ അടിസ്ഥാനമാക്കിയുള്ള റിപ്പോര്‍ട്ടില്‍ പറയുന്നു.

ദിവസേന കോടികള്‍ ചെലവിട്ട് നടത്തുന്ന ഈ സൈനിക വിന്യാസം വന്‍ സാമ്പത്തിക ബാധ്യതയായി മാറിയിരിക്കുകയാണ്. നഗരത്തിലെ പൊലീസുകാരുടെ എണ്ണത്തിനേക്കാള്‍ കൂടുതലാണ് നിലവില്‍ തെരുവിലുള്ള സൈനികര്‍. എന്നാല്‍ കഴിഞ്ഞ ഒരു വര്‍ഷത്തിനിടെ നഗരത്തില്‍ റിപ്പോര്‍ട്ട് ചെയ്ത ക്രിമിനല്‍ കേസുകളില്‍ കേവലം 1.3 ശതമാനത്തില്‍ മാത്രമാണ് സൈന്യത്തിന്റെ ഏതെങ്കിലും തരത്തിലുള്ള ഇടപെടല്‍ ഉണ്ടായിട്ടുള്ളത്.

സുരക്ഷിത മേഖലകളില്‍ സമാന്തര ഭരണകൂടം

അക്രമ സംഭവങ്ങളും കൊലപാതകങ്ങളും നിരന്തരം റിപ്പോര്‍ട്ട് ചെയ്യപ്പെടുന്ന ചേരി പ്രദേശങ്ങളിലോ ഭൂരിപക്ഷ പാര്‍ശ്വവത്കൃത മേഖലകളിലോ അല്ല സൈനിക പട്രോളിംഗ് നടക്കുന്നത്. പകരം വെള്ളക്കാരായ ധനികരും വിനോദസഞ്ചാരികളും തിങ്ങിപ്പാര്‍ക്കുന്ന നഗരകേന്ദ്രങ്ങളിലാണ് സൈനികരെ കൂടുതലായി നിയോഗിച്ചിരിക്കുന്നത്. സബ്വേ സ്റ്റേഷനുകളില്‍ ടിക്കറ്റെടുക്കാത്തവരെ പിടികൂടുക, ചെറിയ മോഷണങ്ങള്‍ തടയുക, പൊതുസ്ഥലങ്ങളില്‍ നിസ്സാര സംഭവങ്ങളില്‍ ഇടപെടുക എന്നിവയിലാണ് ഇവര്‍ പ്രധാനമായും ശ്രദ്ധ കേന്ദ്രീകരിക്കുന്നത്.

മാത്രമല്ല പല സന്ദര്‍ഭങ്ങളിലും അക്രമം തടയേണ്ട സൈനികര്‍ തന്നെ അക്രമികളുടെ ഇരകളാകുന്ന സ്ഥിതിയുമുണ്ട്. സൈനികര്‍ക്ക് നേരെ ആക്രമണം നടന്നതിനും ഭീഷണിപ്പെടുത്തിയതിനും നിരവധി കേസുകളാണ് രജിസ്റ്റര്‍ ചെയ്തിട്ടുള്ളത്.

ജനാധിപത്യത്തിന് അപമാനം: പരക്കെ വിമര്‍ശനം

സാധാരണക്കാരെ ഭയപ്പെടുത്താനാണ് ട്രംപ് ഭരണകൂടം സൈന്യത്തെ തെരുവില്‍ ഇറക്കിയിരിക്കുന്നതെന്ന് പ്രാദേശിക നേതാക്കളും പൗരാവകാശ പ്രവര്‍ത്തകരും ആരോപിക്കുന്നു. തെരുവില്‍ എപ്പോഴും തോക്കേന്തിയ പടയാളികളെ നിര്‍ത്തി ഭയത്തിന്റെ അന്തരീക്ഷം സൃഷ്ടിക്കുന്നത് ഒരു ജനാധിപത്യ രാജ്യത്തിന് അനുയോജ്യമല്ലെന്ന് സാമൂഹിക പ്രവര്‍ത്തകരും ചൂണ്ടിക്കാട്ടുന്നു. പൊലീസ് ഉദ്യോഗസ്ഥരെക്കാള്‍ ചെലവേറിയ സംവിധാനമാണ് നാഷണല്‍ ഗാര്‍ഡ് എന്ന് ചൂണ്ടിക്കാട്ടി മുന്‍ മിലിട്ടറി ജനറല്‍മാരും രംഗത്തെത്തിയിട്ടുണ്ട്.

ക്രമസമാധാന പരിപാലനത്തില്‍ കൃത്യമായ പരിശീലനം ലഭിക്കാത്ത സൈനികരെ തെരുവില്‍ നിര്‍ത്തുന്നത് ഗുണത്തേക്കാളേറെ ദോഷം ചെയ്യുമെന്നാണ് ഇവരുടെ മുന്നറിയിപ്പ്. എന്നാല്‍ കുറ്റകൃത്യങ്ങള്‍ കുറയ്ക്കാനും നഗരത്തിന്റെ സുരക്ഷ വര്‍ദ്ധിപ്പിക്കാനും ഈ നടപടി സഹായിച്ചെന്നാണ് വൈറ്റ് ഹൗസിന്റെ ഔദ്യോഗിക പ്രതികരണം.