വധശിക്ഷ നടപ്പാക്കാനുള്ള ശ്രമത്തിനിടെ പിഴവ്; ക്രിസ്റ്റ പൈക്ക് വെന്റിലേറ്ററിലെന്നും എക്കാലവും രോഗമുക്തി നേടിയേക്കില്ലെന്നും അഭിഭാഷകൻ

OCTOBER 6, 2026, 12:19 AM

ടെന്നസി: ടെന്നസിയിൽ വധശിക്ഷ നടപ്പാക്കാനുള്ള ശ്രമത്തിനിടെയുണ്ടായ പിഴവിനെ തുടർന്ന് ഗുരുതരാവസ്ഥയിലായ പ്രതി ക്രിസ്റ്റ പൈക്ക് (50) എക്കാലവും പൂർണ്ണ രോഗമുക്തി നേടിയേക്കില്ലെന്ന് അവരുടെ അഭിഭാഷകൻ സ്റ്റീഫൻ ഫെറെൽ അറിയിച്ചു.

കഴിഞ്ഞ സെപ്തംബർ 30നാണ് സംഭവം നടന്നത്. മാരകമായ മരുന്ന് കുത്തിവച്ചതിനെത്തുടർന്ന് വധശിക്ഷാ ശ്രമം പരാജയപ്പെടുകയായിരുന്നു. നിലവിൽ ആശുപത്രിയിൽ വെന്റിലേറ്ററിൽ കഴിയുന്ന പൈക്കിന്റെ ആരോഗ്യനില ഗുരുതരമാണെന്നും ദീർഘകാല ഫലങ്ങൾ എന്താകുമെന്ന് ഇപ്പോൾ പറയാനാകില്ലെന്നും അദ്ദേഹം വ്യക്തമാക്കി.

ഏഴ് സൂചികൾ ഉപയോഗിച്ചതിനെ തുടർന്ന് പൈക്കിന്റെ കൈകൾ വീർത്ത് പൊള്ളലേറ്റ നിലയിലായിരുന്നു. മരുന്ന് നൽകിയ ശേഷം അവർ ഭാഗികമായി ബോധം വീണ്ടെടുക്കുകയും കടുത്ത വേദനയോടെ കരയുകയും ചെയ്തിരുന്നു.

ദാരുണമായ ഈ സംഭവത്തിന് ശേഷം ടെന്നസി ഗവർണർ ബിൽ ലീ ഈ വർഷം അവസാനിക്കുന്നതുവരെ വധശിക്ഷകൾ താൽക്കാലികമായി നിർത്തിവയ്ക്കുകയും സ്വതന്ത്ര അന്വേഷണത്തിന് ഉത്തരവിടുകയും ചെയ്തിട്ടുണ്ട്.

പൈക്കിന്റെ വധശിക്ഷ ജീവപര്യന്തമായി കുറയ്ക്കണമെന്ന് അഭിഭാഷകർ ആവശ്യപ്പെട്ടു. 1995ൽ സഹപാഠിയെ കൊലപ്പെടുത്തിയ കേസിലാണ് ക്രിസ്റ്റ പൈക്കിന് വധശിക്ഷ വിധിച്ചിരുന്നത്.

പി.പി. ചെറിയാൻ