മൈക്രോസോഫ്റ്റ് അസ്യൂർ തകരാറിൽ ആഗോള സേവനങ്ങൾ തടസ്സപ്പെട്ടു; എയർലൈൻസുകൾക്കും ടെലികോം കമ്പനികൾക്കും ഉണ്ടായത് വ്യാപക പ്രശ്നങ്ങൾ

OCTOBER 29, 2025, 10:23 PM

ന്യൂയോർക്ക്: മൈക്രോസോഫ്റ്റിന്റെ ക്ലൗഡ് സേവനമായ അസ്യൂർ (Azure) ബുധനാഴ്ച നേരിട്ട വലിയ തകരാറിനെ തുടർന്ന് ലോകമെമ്പാടുമുള്ള എയർലൈൻസുകൾ, ടെലികോം കമ്പനികൾ, ബിസിനസുകൾ എന്നിവയിൽ വ്യാപകമായ സേവന തടസ്സങ്ങൾ റിപ്പോർട്ട് ചെയ്തു. ഇത് ക്ലൗഡ് സംവിധാനങ്ങളിൽ പൂർണ്ണമായും ആശ്രയിക്കുന്ന വ്യവസായങ്ങൾക്കും സ്ഥാപനങ്ങൾക്കും "എപ്പോഴും ഓൺലൈൻ" മാത്രം ആശ്രയിക്കുന്നത് അപകടമാണെന്ന് ഓർമ്മപ്പെടുത്തലായി മാറി.

മൈക്രോസോഫ്റ്റ് പ്രസ്താവിച്ചതനുസരിച്ച്, ഈ തകരാറിന് കാരണം ‘ഫ്രണ്ട് ഡോർ’ (Front Door) എന്ന അസ്യൂറിലെ പ്രധാന ഘടകത്തിൽ നടന്ന ഒരു തെറ്റായ കോൺഫിഗറേഷൻ മാറ്റം (configuration change) ആണെന്ന് കണ്ടെത്തി.ഈ സിസ്റ്റം വെബ്‌സൈറ്റുകളും ആപ്പുകളും വേഗത്തിൽ പ്രവർത്തിക്കാനായി ഉള്ളടക്കം കൈമാറുന്ന “ഡിജിറ്റൽ ഹൈവേ”പോലെയാണ്. അതാണ് തകരാറിലായത് എന്നാണ് പുറത്തു വരുന്ന റിപ്പോർട്ട്.

തകരാറിനെത്തുടർന്ന് ഉപയോക്താക്കൾക്ക് ലോഗിൻ ചെയ്യാനും സേവനങ്ങൾ നിയന്ത്രിക്കാനും പോലും കഴിയാതെ പോയി. പിന്നീട് മൈക്രോസോഫ്റ്റ് പ്രശ്നം പരിഹരിച്ചതായി അറിയിച്ചു, എങ്കിലും ചില ചെറിയ മേഖലകളിൽ ഇപ്പോഴും പിഴവുകൾ ഉണ്ടാകാമെന്ന് മുന്നറിയിപ്പ് നൽകി.

ഓൺലൈൻ സേവനങ്ങളുടെ അവസ്ഥ നിരീക്ഷിക്കുന്ന ഡൗൺഡിറ്റക്ടർ (Downdetector) വെബ്സൈറ്റിന് തകരാറിന്റെ ഏറ്റവും കൂടിയ സമയത്ത് 18,000-ലധികം പരാതികൾ ആണ് ലഭിച്ചത്. എന്നാൽ മൈക്രോസോഫ്റ്റ് പ്രശ്നപരിഹാര ശ്രമങ്ങൾ ആരംഭിച്ചതോടെ അവയൊക്കെ കുറയുകയും ചെയ്തു.

അസ്യൂർ തകരാർ എയർലൈൻസുകളെയും ടെലികോം മേഖലയെയും ബാധിച്ചു. റോയിറ്റേഴ്സ് റിപ്പോർട്ടനുസരിച്ച്, അലാസ്ക എയർലൈൻസ് അവരുടെ വെബ്സൈറ്റിൽ തടസ്സം നേരിട്ടപ്പോൾ, വോഡാഫോൺ യു.കെയും ഹീത്രോ വിമാനത്താവളവും ചെറിയ സാങ്കേതിക തകരാറുകൾ അനുഭവിച്ചു.ഇതിലൂടെ ലോകമെമ്പാടുമുള്ള വ്യവസായ സേവനങ്ങളെയും ആശയവിനിമയ സംവിധാനങ്ങളെയും ബാധിച്ച ഒരു ആഗോള തകരാറായി സംഭവം മാറി.

അതേസമയം ഇത് വെറും ഒരു ആഴ്ചയ്ക്കുള്ളിൽ ഉണ്ടായ രണ്ടാമത്തെ വലിയ ക്ലൗഡ് സേവന തകരാറാണ് എന്നത് ആശങ്ക ഉയർത്തുന്നുണ്ട്. കഴിഞ്ഞ ആഴ്ച അമസോൺ AWS തകരാറിലായതിനെ തുടർന്ന് Snapchat, Reddit അടക്കം നിരവധി ഓൺലൈൻ പ്ലാറ്റ്‌ഫോമുകൾ നിലച്ചിരുന്നു. ഇതോടെ ലോകം മുഴുവൻ ആശ്രയിക്കുന്ന ഈ “ക്ലൗഡ് ലോകം” എത്രത്തോളം അസ്ഥിരമാണെന്ന ചോദ്യം ഉയരുകയാണ്.