യൂട്യൂബിൽ ഇൻ-ആപ്പ് പ്രൈവറ്റ് മെസ്സേജിങ് തിരിച്ചെത്തുന്നു; പ്രായപരിശോധനയും ഇൻവൈറ്റ്-ഓൺലി ചാറ്റും നിർബന്ധം

JUNE 12, 2026, 5:57 AM

പ്രമുഖ വീഡിയോ സ്ട്രീമിങ് പ്ലാറ്റ്‌ഫോമായ യൂട്യൂബ് (YouTube) തങ്ങളുടെ ഉപക്താക്കൾക്കായി ഇൻ-ആപ്പ് ഡയറക്ട് മെസ്സേജിങ് (DM) സംവിധാനം കൂടുതൽ സുരക്ഷാ ഫീച്ചറുകളോടെ വീണ്ടും അവതരിപ്പിച്ചു. 2019-ൽ കുറഞ്ഞ ഉപയോഗവും സുരക്ഷാ പ്രശ്നങ്ങളും മുൻനിർത്തി നിർത്തലാക്കിയ പ്രൈവറ്റ് മെസ്സേജിങ് സംവിധാനമാണ്, ഉപഭോക്താക്കളുടെ നിരന്തരമായ ആവശ്യപ്രകാരം പുതിയ മാറ്റങ്ങളോടെ യൂട്യൂബ് ആപ്പിലേക്ക് തിരിച്ചുകൊണ്ടുവരുന്നത്. വീഡിയോകൾ, ഷോർട്സുകൾ, ലൈവ് സ്ട്രീമുകൾ എന്നിവ മറ്റ് സോഷ്യൽ മീഡിയ ആപ്പുകളിലേക്ക് ലിങ്ക് ഷെയർ ചെയ്യാതെ തന്നെ യൂട്യൂബിനുള്ളിൽ വെച്ച് സുഹൃത്തുക്കളുമായി പങ്കുവെക്കാനും അതിനെക്കുറിച്ച് സംസാരിക്കാനും ഈ ഫീച്ചർ സഹായിക്കും.

മുൻപത്തെ പതിപ്പിൽ നിന്നും വ്യത്യസ്തമായി കടുത്ത സുരക്ഷാ മാനദണ്ഡങ്ങളാണ് (Safeguards) ഇത്തവണ യൂട്യൂബ് ഏർപ്പെടുത്തിയിട്ടുള്ളത്. ഈ മെസ്സേജിങ് ഫീച്ചർ ഉപയോഗിക്കാൻ ഉപഭോക്താവിന് 18 വയസോ അതിൽ കൂടുതലോ പ്രായമുണ്ടായിരിക്കണം. ഗൂഗിൾ അക്കൗണ്ടിലെ ജനനത്തീയതി അടിസ്ഥാനമാക്കിയാണ് പ്രായം കണക്കാക്കുന്നത്. ആവശ്യമെങ്കിൽ ഔദ്യോഗിക ഐഡി കാർഡോ ക്രെഡിറ്റ് കാർഡോ ഉപയോഗിച്ച് പ്രായം വെരിഫൈ (Age Verification) ചെയ്യേണ്ടി വരും. കുട്ടികളുടെ സുരക്ഷയും സ്വകാര്യതയും മുൻനിർത്തിയാണ് പ്രായപരിധി 18 പ്ലസ് ആയി നിശ്ചയിച്ചിരിക്കുന്നത്.

മറ്റൊരു പ്രധാന പ്രത്യേകത ഇത് 'ഇൻവൈറ്റ്-ഓൺലി' (Invite-only) ചാറ്റ് സംവിധാനമാണ് എന്നതാണ്. അതായത്, ആപ്പിൽ ഒരു വ്യക്തിയുമായി ചാറ്റ് ചെയ്യണമെങ്കിൽ ആദ്യം ഒരു ഇൻവിറ്റേഷൻ ലിങ്ക് ജനറേറ്റ് ചെയ്ത് മറ്റ് തേർഡ് പാർട്ടി മെസ്സേജിങ് ആപ്പുകൾ (WhatsApp, Instagram മുതലായവ) വഴി അവർക്ക് അയച്ചു നൽകണം. ലിങ്ക് ലഭിക്കുന്ന വ്യക്തി ഇത് 'അലൗ' (Allow) ചെയ്താൽ മാത്രമേ യൂട്യൂബിൽ ചാറ്റ് ആരംഭിക്കാൻ സാധിക്കൂ. പരിചയമില്ലാത്ത ആളുകളിൽ നിന്നുള്ള സ്പാമുകളും അനാവശ്യ സന്ദേശങ്ങളും തടയാൻ ഈ ഇൻവൈറ്റ് രീതി സഹായിക്കും.

മെസ്സേജുകൾ അൺസെൻഡ് ചെയ്യാനും (Unsend), ഉപഭോക്താക്കളെ ബ്ലോക്ക് ചെയ്യാനും റിപ്പോർട്ട് ചെയ്യാനുമുള്ള ഫീച്ചറുകൾ ഇതിലുണ്ട്. കൂടാതെ, അയക്കുന്ന എല്ലാ സന്ദേശങ്ങളും യൂട്യൂബിന്റെ കമ്മ്യൂണിറ്റി ഗൈഡ്‌ലൈൻസിന് വിധേയമായിരിക്കും. നിലവിൽ യുഎസ്, യുകെ ഉൾപ്പെടെയുള്ള തിരഞ്ഞെടുത്ത അന്താരാഷ്ട്ര വിപണികളിലാണ് ഈ ഫീച്ചർ ലഭ്യമാക്കിയിട്ടുള്ളത്. ഇന്ത്യ ഉൾപ്പെടെയുള്ള മറ്റ് രാജ്യങ്ങളിലേക്ക് വരും ദിവസങ്ങളിൽ ഈ ഫീച്ചർ വ്യാപിപ്പിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്.

English Summary:

YouTube has brought back its in-app private messaging feature after a six-year hiatus, implementing strict safety guidelines including an 18+ age verification and an invite-only system to prevent spam and protect user privacy.

Tags:

Malayalam News, News Malayalam, Latest Malayalam News, Vachakam News, Technology News Malayalam, YouTube Private Messaging Returns, YouTube DM Update Malayalam