മുംബൈ: ഡിജിറ്റൽ ഇടപാടുകളിൽ വിപ്ലവം സൃഷ്ടിച്ച യൂണിഫൈഡ് പേയ്മെന്റ് ഇന്റർഫേസ് (UPI) സംവിധാനം അന്താരാഷ്ട്ര തലത്തിൽ കൂടുതൽ ജനകീയമാക്കാൻ പുതിയ നീക്കങ്ങളുമായി നാഷണൽ പേയ്മെന്റ് കോർപ്പറേഷൻ ഓഫ് ഇന്ത്യ (NPCI). ഇതിന്റെ ഭാഗമായി വിദേശത്തേക്കുള്ള തത്സമയ പണമിടപാടുകൾ വേഗത്തിലും സുതാര്യമായും പൂർത്തിയാക്കുന്നതിനായി പ്രമുഖ ആഗോള ബാങ്കുകളായ എച്ച്.എസ്.ബി.സി. ഇന്ത്യ (HSBC India), ജെ.പി. മോർഗൻ പേയ്മെന്റ്സ് (J.P. Morgan Payments) എന്നിവയുമായി എൻപിസിഐ ധാരണയിലെത്തി.
പുതിയ പങ്കാളിത്തത്തിലൂടെ എ.പി.ഐ (API) സാങ്കേതികവിദ്യ ഉപയോഗിച്ച് ബാങ്കുകൾ തത്സമയ വിദേശ വിനിമയ നിരക്കുകൾ ലഭ്യമാക്കും. ഇതോടെ, ഇന്ത്യയിൽ നിന്ന് വിദേശത്തേക്ക് പണം അയക്കുമ്പോൾ നിലവിലെ വിനിമയ മൂല്യമനുസരിച്ച് ഇന്ത്യൻ രൂപയിൽ എത്ര തുകയാകും എന്നും, അത് സ്വീകരിക്കുന്നയാൾക്ക് വിദേശ കറൻസിയിൽ കൃത്യം എത്ര തുക ലഭിക്കുമെന്നും ഉപഭോക്താവിന് ഇടപാട് നടത്തുന്ന സമയത്ത് തന്നെ മുൻകൂട്ടി അറിയാനാകും.
അന്താരാഷ്ട്ര വ്യാപാരികൾക്കും ധനകാര്യ സ്ഥാപനങ്ങൾക്കും അവരുടെ പ്രാദേശിക കറൻസിയിൽ തന്നെ തടസ്സങ്ങളില്ലാതെ പണം സ്വീകരിക്കാൻ ഇത് സഹായിക്കും. എച്ച്എസ്ബിസിയുമായുള്ള ഈ സഹകരണത്തിലൂടെ 24 മണിക്കൂറും തത്സമയ വിദേശ ഇടപാടുകൾ നടത്താനുള്ള സൗകര്യമാണ് ഒരുങ്ങുന്നത്.
ഇതോടൊപ്പം കൂടുതൽ രാജ്യങ്ങളിലേക്ക് യുപിഐ സേവനം വ്യാപിപ്പിക്കുന്നതിന്റെ ഭാഗമായി യൂറോപ്യൻ രാജ്യമായ ഗ്രീസിലും ഇപ്പോൾ യുപിഐ പേയ്മെന്റ് സംവിധാനം ലഭ്യമാക്കിത്തുടങ്ങിയിട്ടുണ്ട്. ഇതോടെ യുപിഐ ഔദ്യോഗികമായി ഉപയോഗിക്കാനാകുന്ന വിദേശ രാജ്യങ്ങളുടെ എണ്ണം പത്തായി ഉയർന്നു.
നിലവിൽ ഗ്രീസിന് പുറമെ സിംഗപ്പൂർ, യു.എ.ഇ, നേപ്പാൾ, ഭൂട്ടാൻ, മൗറീഷ്യസ്, ഫ്രാൻസ്, ശ്രീലങ്ക, ഖത്തർ, കംബോഡിയ എന്നീ രാജ്യങ്ങളിൽ ഇന്ത്യൻ സഞ്ചാരികൾക്ക് ക്യു.ആർ കോഡ് സ്കാൻ ചെയ്ത് തങ്ങളുടെ ഇന്ത്യൻ ബാങ്ക് അക്കൗണ്ടിൽ നിന്ന് നേരിട്ട് രൂപയിൽ സുരക്ഷിതമായി പണമിടപാടുകൾ നടത്താൻ സാധിക്കും.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
