ന്യൂയോർക്ക്: ഭാരത സഭയുടെ അപ്പസ്‌തോലനും, ബ്രോങ്ക്‌സ് ഇടവകയുടെ മദ്ധ്യസ്ഥനുമായ മാർതോമാ ശ്ലീഹായുടെ തിരുന്നാൾ ജൂൺ 25 ബുധനാഴ്ച മുതൽ ജൂലൈ 6 ഞായറാഴ്ച വരെ വിവിധ തിരുക്കർമ്മങ്ങളോടെ ഭക്ത്യാഢംബരപൂർവം ആഘോഷിക്കുന്നു. ഇടവകയിലെ വിമൻസ് ഫോറമാണ് ഇക്കൊല്ലത്തെ തിരുന്നാൾ ഏറ്റെടുത്ത് നടത്തുന്നത്.

തിരുന്നാൾ തിരുക്കർമ്മങ്ങൾക്ക്  ജൂൺ 25-ാം തീയതി ബുധനാഴ്ച വൈകുന്നേരം 7മണിക്ക് വിശുദ്ധ കുർബാനയോടും തുടർന്നുള്ള നൊവേനയോടും കൂടി തുടക്കമാകും. വിശുദ്ധ കുർബാനക്ക് ലോങ്ങ് അയലൻഡ് സെന്റ് മേരീസ് സിറോ മലബാർ ഇടവക വികാരി റവ. ഫാ. ജോൺ തോമസ് തച്ചാറ മുഖ്യ കാർമ്മികത്വം വഹിക്കും. ഇടവകയിലെ ഗ്രാന്റ് പേരന്റിന്‌സിനെ അന്നേ ദിവസം പ്രത്യേകം ആശീർവദിക്കുന്നതാണ്. ഒന്നാം വാർഡുകാരാണ് ഈ  ദിവസത്തെ ചടങ്ങുകൾക്കു നേതൃത്വം നൽകുന്നത്.

ജൂൺ 25 മുതൽ ജൂലൈ 3  വരെ എല്ലാ ദിവസവും വിശുദ്ധ കുർബാനക്ക് ശേഷം തോമാശ്ലീഹായുടെ നൊവേന ഉണ്ടായിരിക്കും. ജൂൺ 26  വ്യാഴാഴ്ച  വൈകുന്നേരം 7 മണിക്കുള്ള വിശുദ്ധ കുർബാനക്കും, നൊവേനക്കും റവ. ഫാ. അരുൺ കാരക്കാട്ടു കാർമ്മികനായിരിക്കും. വിവാഹ ജീവിതത്തിൽ സിൽവർ ജൂബിലി പിന്നിട്ടവരെ അന്നേദിവസം അനുമോദിക്കുകയും പ്രത്യേകം ആശീർവദിക്കുന്നതുമാണ്. രണ്ടാം വാർഡുകാരാണ് ചടങ്ങുകൾക്കു നേതൃത്വം നൽകുന്നത്.

ജൂൺ 27 വെള്ളിയാഴ്ച വൈകുന്നേരം 7 മണിക്കുള്ള വിശുദ്ധ കുർബാനക്കും, നൊവേനക്കും ലോങ്ങ് അയലൻഡ് സെന്റ് മേരീസ് സിറോ മലബാർ ഇടവക അസിസ്റ്റന്റ് വികാരി റവ. ഫാ.ജോബി ജോസഫ്  കാർമ്മികത്വം വഹിക്കും. ഇടവകയിലെ സ്‌കൂൾ, കോളേജ് കുട്ടികളെയും, യുവജനങ്ങളേയും അന്നേ  ദിവസം പ്രത്യേകം ആശീർവദിക്കുന്നതാണ്. യുവജനങ്ങളുടെ നേതൃത്വത്തിൽ ഇംഗ്ലീഷിൽ ആയിരിക്കും തിരുക്കർമ്മങ്ങൾ. മൂന്നാം വാർഡുകാരാണ് അന്നേ ദിവസത്തെ ചടങ്ങുകൾക്കു നേതൃത്വം നൽകുന്നത്.

ജൂൺ 28 ശനിയാഴ്ച രാവിലെ 9 മണിക്കു വിശുദ്ധ കുർബാനയും, പതിവുപോലെ നിത്യസഹായ മാതാവിന്റെ നൊവേനയും, തുടർന്നു തോമാ ശ്ലീഹായുടെ നൊവേനയും ഉണ്ടായിരിക്കും. തിരുക്കർമ്മങ്ങൾക്ക് ബുഖാനൻ സെന്റ് ജോസഫ് സിറോ മലബാർ കത്തോലിക്ക മിഷൻ ഡയറക്ടർ റവ. ഫാ. റോയിസൺ മേനോലിക്കൽ മുഖ്യ കാർമ്മികത്വം വഹിക്കും. ഇടവകയിലെ അൾത്താര ശുശ്രുഷികളേയും ഗായക സംഘത്തേയും അന്നേ ദിവസം പ്രത്യേകം ആശീർവദിക്കുന്നതാണ്. നാലാം  വാർഡുകാരാണ് ഈ ദിവസത്തെ ചടങ്ങുകൾക്കു നേതൃത്വം നൽകുന്നത്.

ജൂൺ 29-ാംതീയതി ഞായറാഴ്ചയാണ് തിരുന്നാൾ കൊടിയേറ്റവും പ്രസുദേന്തി വാഴ്ച്ചയും. ഇടവകയിലെ വിമൻസ് ഫോറം മെമ്പേഴ്‌സാണ് ഇക്കൊല്ലത്തെ പ്രസുദേന്തിമാർ. രാവിലെ 9:30നു ആഘോഷമായ വിശുദ്ധ കുർബാനക്കും തുടർന്ന് നൊവേനക്കും ഇടവക വികാരി റവ. ഫാ. കുര്യാക്കോസ് വടാന കാർമ്മികത്വം വഹിക്കും. ഇടവകയിലെ രണ്ടു വയസിൽ താഴെ പ്രായമുള്ള കുട്ടികളെ അന്നേ ദിവസം പ്രത്യേകം ആശീർവദിക്കുന്നതാണ്. അഞ്ചാം വാർഡുകാരാണ് ഞായറാഴ്ചത്തെ ചടങ്ങുകൾക്കു നേതൃത്വം നൽകുന്നത്.

ജൂൺ 30 തിങ്കളാഴ്ച വൈകുന്നേരം 7 മണിക്കുള്ള വിശുദ്ധ കുർബാനക്കും, നൊവേനക്കും നോർവാക്ക് 'ഔർ ലേഡി ഓഫ് അസംപ്ഷൻ' സിറോ മലബാർ കാത്തലിക് മിഷൻ ഡയറക്ടർ റവ. ഫാ.  ജെയിംസ് വട്ടക്കുന്നേൽ കാർമ്മികത്വം വഹിക്കും. ഇടവകയിലെ കുടുംബനാഥൻമാരെ അന്നേദിവസം  പ്രത്യേകം ആശീർവദിക്കുന്നതാണ്. ആറാം വാർഡുകാരാണ് ചടങ്ങുകൾക്കു നേതൃത്വം നൽകുന്നത്.

ജൂലൈ ഒന്ന് ചൊവ്വാഴ്ച  വൈകുന്നേരം 7 മണിക്കുള്ള വിശുദ്ധ കുർബാനക്കും, നൊവേനക്കും റോക്ലാൻഡ് ഹോളി ഫാമിലി സീറോ മലബാർ കത്തോലിക്കാ ഇടവക വികാരി റവ. ഫാ. സ്റ്റീഫൻ കണിപ്പിള്ളിൽ കാർമ്മികത്വം വഹിക്കും. ഇടവകയിലെ എല്ലാ പ്രൈമറി, മിഡിൽ സ്‌കൂൾ  വിദ്യാർത്ഥികളേയും അന്നേ ദിവസം പ്രത്യേകം ആശീർവദിക്കുന്നതാണ്. ഏഴാം വാർഡുകാരാണ് അന്നേ ദിവസത്തെ ചടങ്ങുകൾക്കു നേതൃത്വം നൽകുന്നത്.

ജൂലൈ രണ്ടാം തീയതി ബുധനാഴ്ച വൈകുന്നേരം 7 മണിക്കുള്ള വിശുദ്ധ കുർബാനക്കും, നൊവേനക്കും ബ്രൂക്ലിൻ സെന്റ് തോമസ് സീറോ മലബാർ സീറോ മലബാർ മിഷൻ ഡയറക്ടർ റവ. ഫാ. ജോണി ചെങ്ങളാൻ മുഖ്യ കാർമ്മികത്വം വഹിക്കും. ഇടവകയിലെ രണ്ടു വയസിനും നാല് വയസിനും ഇടയിൽ പ്രായമുള്ള കുട്ടികളെ അന്നേ ദിവസം പ്രത്യേകം ആശീർവദിക്കുന്നതാണ്. എട്ടാം വാർഡുകാരാണ് ഈ ദിവസത്തെ ചടങ്ങുകൾക്കു നേതൃത്വം നൽകുന്നത്.

ദുക്രാന തിരുന്നാൾ ദിവസമായ ജൂലൈ മൂന്നാം തീയതി വ്യാഴാഴ്ച വൈകുന്നേരം 7 മണിക്കുള്ള  ആഘോഷമായ റാസ കുർബാനക്കും, തുടർന്നുള്ള നൊവേനക്കും റവ. ഫാ. ടോം മാളിയേക്കൽ മുഖ്യ കാർമ്മികനാകും. അന്നേദിവസം ഇടവകയിലെ എല്ലാ 'തോമസ്' നാമധാരികളേയും കൂടാതെ പ്രസുദേന്തിമാരേയും പ്രത്യേകം ആശീർവദിക്കുന്നതാണ്. ഒമ്പതാം വാർഡുകാരാണ് അന്നേ ദിവസത്തെ ചടങ്ങുകൾക്കു നേതൃത്വം നൽകുന്നത്.

പ്രധാന തിരുന്നാൾ ദിവസമായ ജൂലൈ നാലാം തീയതി വെള്ളിയാഴ്ച രാവിലെ 9:30നു ആഘോഷമായ തിരുന്നാൾ കുർബാനക്കു റവ. ഫാ. ജോസഫ് പൂവേലിയിൽ മുഖ്യ കാർമ്മികത്വം വഹിക്കും. കുർബാനയ്ക്കു ശേഷം വാദ്യ മേളങ്ങളുടേയും മുത്തുകുടകളുടേയും അകമ്പടിയോടുകൂടി വിശുദ്ധരുടെ തിരുസ്വരൂപങ്ങൾ വഹിച്ചുകൊണ്ട് ബ്രോങ്ക്‌സ് തെരുവീഥികളിലൂടെ ആഘോഷമായ പ്രദക്ഷിണം. തുടർന്ന് ദേവാലയത്തിൽ വിശുദ്ധ തോമാ ശ്ലീഹായുടെ തിരുശേഷിപ്പ് വണങ്ങുന്നതിനും, അടിമസമർപ്പണത്തിനുമുള്ള അവസരവും ഉണ്ടായിരിക്കും.

ജൂലൈ 5-ാം തീയതി ശനിയാഴ്ച മരിച്ചവരുടെ ഓർമ്മയാചരണം: ഈ ലോക ജീവിതത്തിനു ശേഷം സ്വർഗ്ഗ മഹത്വത്തിൽ ചേർന്നവരായ ഇടവകാംഗങ്ങളുടെ അനുസ്മരണം. രാവിലെ 9 മണിക്കുള്ള വിശുദ്ധ കുർബാനക്കു ശേഷം 11:30 നു സെമിത്തേരി സന്ദർശനവും ഒപ്പീസും, പ്രാർഥനകളും ഉണ്ടാകും. തിരുക്കർമ്മങ്ങൾക്ക് ഇടവക വികാരി റവ. ഫാ. കുര്യാക്കോസ് വടാന കാർമ്മികത്വം വഹിക്കും. 

അന്നേദിവസം വൈകുന്നേരം 5 മണിക്ക് 'പ്രസുദേന്തി നൈറ്റ്': കുട്ടികളും മുതിർന്നവരും അവതരിപ്പിക്കുന്ന വിവിധ കലാപരിപാടികൾ. തദവസരത്തിൽ ഇടവകയിൽ നിന്നും ഇക്കൊല്ലം ഗ്രാജുവേറ്റു ചെയ്ത സ്‌കൂൾ കോളേജ് വിദ്യാർത്ഥികളെ എസ്.എം.സി.സിയുടെ നേതൃത്വത്തിൽ അനുമോദിക്കുന്നതാണ്. ചടങ്ങുകൾക്ക് റവ. ഫാ. മാത്യു മണിമലത്തറപ്പിൽ മുഖ്യാതിഥി ആയിരിക്കും. ജൂലൈ 6-ാം തീയതി ഞായറാഴ്ച 10 മണിക്ക് വിശുദ്ധ കുർബാന. തുടർന്ന് തിരുന്നാൾ കൊടിയിറക്കം. 

നമ്മുടെ പിതാവായ മാർതോമാ ശ്ലീഹായുടെ തിരുനാളിൽ പങ്കെടുത്തു അനുഗ്രഹം പ്രാപിക്കാൻ എല്ലാ വിശ്വാസികളേയും ബ്രോങ്ക്‌സ് ഇടവകയിലേക്കു വികാരി റവ. ഫാ. കുര്യാക്കോസ് വടാനയും കൈക്കാരമ്മാരായ മാത്യു അടാട്ട്, ഡെന്നി കല്ലുകളം, ഷൈജു കളത്തിൽ എന്നിവരും, വിമൻസ് ഫോറം അംഗങ്ങളും സ്വാഗതം ചെയ്യുന്നു.

Church Address  :  810 E, 221 St, Bronx, NY 10467

ഷോളി കുമ്പിളുവേലി

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്