ഉക്രൈൻ തലസ്ഥാനമായ കീവിനെ ലക്‌ഷ്യം വെച്ച് റഷ്യ നടത്തിയ ഭീകരമായ ഡ്രോൺ ആക്രമണത്തിൽ 27 പേർക്ക് ദാരുണാന്ത്യം. നാല്പത്തിരണ്ടോളം ആളുകൾക്ക് കനത്ത പരിക്കേറ്റതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു.

കീവിലെ ബുച്ച ജില്ലയിലെ മില ഗ്രാമത്തിലുള്ള ഒരു വലിയ സംഭരണ കേന്ദ്രത്തിലാണ് റഷ്യൻ ഡ്രോൺ പതിച്ചത്. ഡ്രോൺ പതിച്ചതിനെ തുടർന്ന് സംഭരണശാലയിലുണ്ടായിരുന്ന ടൺ കണക്കിന് സ്ഫോടകവസ്തുക്കൾ ഒന്നൊന്നായി പൊട്ടിത്തെറിക്കുകയായിരുന്നു.

ഈ വൻ സ്ഫോടനത്തിന്റെ ആഘാതത്തിൽ സമീപത്തുണ്ടായിരുന്ന അൻപതിലധികം വീടുകളും കെട്ടിടങ്ങളും നിമിഷനേരം കൊണ്ട് തകർന്നുതരിപ്പണമായി. പ്രായമായവർക്കും ഭിന്നശേഷിക്കാർക്കും വേണ്ടിയുള്ള ഒരു സംരക്ഷണ കേന്ദ്രത്തിനും സ്ഫോടനത്തിൽ കനത്ത നാശനഷ്ടമുണ്ടായിട്ടുണ്ട്.

ദുരന്തത്തിൽ പ്രാദേശിക കമ്മ്യൂണിറ്റി തലവനായ താരാസ് ദിദിച്ച് ഉൾപ്പെടെയുള്ളവർ കൊല്ലപ്പെട്ടു. സംഭവസ്ഥലത്ത് ആദ്യമെത്തി രക്ഷാപ്രവർത്തനങ്ങൾക്ക് നേതൃത്വം നൽകുന്നതിനിടെയാണ് ഇയാൾക്ക് ജീവൻ നഷ്ടമായത്.

സ്ഫോടനത്തെ തുടർന്ന് പ്രദേശത്ത് വൻ തീപിടുത്തമാണ് ഉണ്ടായിട്ടുള്ളത്. മുന്നൂറിലധികം രക്ഷാപ്രവർത്തകർ മണിക്കൂറുകളോളമായി പ്രദേശത്ത് തീ അണയ്ക്കാനും അവശിഷ്ടങ്ങൾക്കിടയിൽ കുടുങ്ങിയവരെ പുറത്തെടുക്കാനും ശ്രമിച്ചുവരുന്നു.

കുട്ടികളടക്കം മുന്നൂറ്റിയെൺപതിലധികം ആളുകളെ പ്രദേശത്ത് നിന്ന് സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചിട്ടുണ്ട്. പരിക്കേറ്റവരെ സമീപത്തെ ആശുപത്രികളിൽ പ്രവേശിപ്പിച്ചു, ഇതിൽ പലരുടെയും നില അതീവ ഗുരുതരമായി തുടരുകയാണ്.

അതേസമയം വൻ ജനവാസ മേഖലയോട് ചേർന്ന് ആയുധങ്ങളും സ്ഫോടകവസ്തുക്കളും സൂക്ഷിച്ചതിനെതിരെ ഉക്രൈൻ ഭരണകൂടത്തിനെതിരെ രൂക്ഷവിമർശനം ഉയർന്നിട്ടുണ്ട്. ജനവാസ കേന്ദ്രങ്ങൾക്ക് സമീപം സ്ഫോടകവസ്തുക്കൾ സൂക്ഷിക്കാൻ പാടില്ലെന്ന കർശന നിയമങ്ങൾ ലംഘിക്കപ്പെട്ടതിൽ അന്വേഷണം ആരംഭിച്ചതായി പ്രസിഡന്റ് വോളോഡിമിർ സെലെൻസ്കി അറിയിച്ചു.

മനുഷ്യജീവന് യാതൊരു വിലയും കൽപ്പിക്കാതെ നിയമങ്ങൾ കാറ്റിൽപ്പറത്തി അപകടകരമായ രീതിയിൽ ആയുധശേഖരം നടത്തിയ ഉദ്യോഗസ്ഥർക്ക് എതിരെ കടുത്ത നടപടി സ്വീകരിക്കുമെന്ന് ഭരണകൂടം വ്യക്തമാക്കി. സംഭവത്തിൽ ഉദ്യോഗസ്ഥരുടെ ഭാഗത്തുനിന്ന് ഗുരുതരമായ വീഴ്ച സംഭവിച്ചതായി ചൂണ്ടിക്കാട്ടി ക്രിമിനൽ കേസെടുത്തിട്ടുണ്ട്.

കഴിഞ്ഞ ഏതാനും ദിവസങ്ങളായി തലസ്ഥാനമായ കീവിലും സമീപ പ്രദേശങ്ങളിലും റഷ്യ തങ്ങളുടെ വ്യോമാക്രമണങ്ങൾ കടുപ്പിച്ചിരിക്കുകയാണ്. വ്യോമാക്രമണ മുന്നറിയിപ്പ് നൽകുന്ന സൈറണുകൾ തുടർച്ചയായി മുഴങ്ങുന്നത് ഉക്രൈനിലെ സാധാരണ ജനങ്ങളുടെ ജീവിതം കടുത്ത ഭീതിയിലാഴ്ത്തിയിട്ടുണ്ട്.

റഷ്യയുടെ കനത്ത ആക്രമണങ്ങൾ കാരണം കീവിലെ വാണിജ്യ ഗതാഗത മേഖലകളും പ്രാദേശിക വ്യവസായങ്ങളും പൂർണ്ണമായും സ്തംഭിച്ച അവസ്ഥയിലാണ്. രാജ്യത്തിന്റെ വിവിധ ഭാഗങ്ങളിൽ വൈദ്യുതി, കുടിവെള്ള വിതരണ സംവിധാനങ്ങളും ഭാഗികമായി ത തടസ്സപ്പെട്ടിട്ടുണ്ട്.

തുടർച്ചയായ പ്രഹരങ്ങൾ ഉക്രൈൻ സമ്പദ്‌വ്യവസ്ഥയെ വലിയ തോതിലാണ് ബാധിക്കുന്നത്. തകർന്ന അടിസ്ഥാന സൗകര്യങ്ങൾ പുനഃസ്ഥാപിക്കാൻ മാസങ്ങൾ വേണ്ടിവരുമെന്നാണ് വിലയിരുത്തപ്പെടുന്നത്.

വരും ദിവസങ്ങളിലും റഷ്യൻ നിരയിൽ നിന്ന് ആക്രമണങ്ങൾ കടുക്കാൻ സാധ്യതയുണ്ടെന്ന് ഉക്രൈൻ സൈനിക വൃത്തങ്ങൾ മുന്നറിയിപ്പ് നൽകിയിട്ടുണ്ട്. ജനങ്ങൾ സുരക്ഷിതമായ ഭൂഗർഭ കേന്ദ്രങ്ങളിലേക്ക് മാറണമെന്ന് പ്രാദേശിക ഭരണകൂടങ്ങൾ നിർദ്ദേശം നൽകി.

വലിയ വിനാശത്തിന് കാരണമായ സ്ഫോടനത്തിൽ മരിച്ചവരുടെ എണ്ണം ഇനിയും ഉയരാൻ സാധ്യതയുണ്ടെന്നാണ് രക്ഷാപ്രവർത്തകർ നൽകുന്ന സൂചന. തികച്ചും ദാരുണമായ ഈ സംഭവത്തിൽ ആഗോള തലത്തിലും പ്രതിഷേധം ശക്തമാകുന്നുണ്ട്.

English Summary: At least 27 people were killed and 42 others injured after a Russian drone attack hit a storage facility near Kyiv in Ukraine triggering massive explosions. The strikes in the Bucha district damaged around 50 residential buildings and forced the evacuation of over 380 residents. Ukrainian President Volodymyr Zelenskyy has ordered a criminal investigation into official negligence for storing ammunition near residential areas.

Tags: Malayalam News, News Malayalam, Latest Malayalam News, Vachakam News, World News Malayalam, Russia Ukraine War News, Ukraine News Malayalam, Kyiv Drone Attack

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്