തെക്കുപടിഞ്ഞാറൻ ബംഗാൾ ഉൾക്കടലിൽ രൂപപ്പെട്ട ദിത്വാ ചുഴലിക്കാറ്റ് തമിഴ്‌നാട്-പുതുച്ചേരി തീരത്തേക്ക് നീങ്ങുന്ന സാഹചര്യത്തിൽ സംസ്ഥാനത്ത് കനത്ത ജാഗ്രത. ചുഴലിക്കാറ്റിന്റെ സ്വാധീനം കാരണം തമിഴ്നാട്ടിലും പുതുച്ചേരിയിലും ശക്തമായ മഴയും കാറ്റും തുടരുകയാണ്. ചുഴലിക്കാറ്റ് കരയിൽ പ്രവേശിക്കാൻ സാധ്യതയില്ലെങ്കിലും, തീരദേശത്തിന് അടുത്തുകൂടി വടക്കോട്ടാണ് നീങ്ങുന്നത്. ഇത് കനത്ത മഴയ്ക്ക് ഇടയാക്കുമെന്നാണ് കാലാവസ്ഥാ നിരീക്ഷണ കേന്ദ്രം (IMD) മുന്നറിയിപ്പ് നൽകുന്നത്.

വടക്കൻ തമിഴ്നാട്ടിലെയും പുതുച്ചേരിയിലെയും തീരദേശ ജില്ലകളിൽ റെഡ് അലർട്ട് ഉൾപ്പെടെയുള്ള മുന്നറിയിപ്പുകൾ നൽകിയിട്ടുണ്ട്. ചെന്നൈ, തിരുവള്ളൂർ, ചെങ്കൽപേട്ട്, കാഞ്ചീപുരം തുടങ്ങിയ ജില്ലകളിൽ ഇന്ന് തീവ്രമഴയ്ക്ക് സാധ്യതയുണ്ട്. മുൻകരുതലിന്റെ ഭാഗമായി ചെന്നൈ ഉൾപ്പെടെ നിരവധി ജില്ലകളിലെ വിദ്യാഭ്യാസ സ്ഥാപനങ്ങൾക്ക് അവധി പ്രഖ്യാപിച്ചിട്ടുണ്ട്.

ദിത്വാ ചുഴലിക്കാറ്റിനെ തുടർന്ന് ചെന്നൈ അന്താരാഷ്ട്ര വിമാനത്താവളത്തിൽ നിന്നുള്ള 50-ൽ അധികം വിമാന സർവീസുകൾ റദ്ദാക്കുകയോ വഴിതിരിച്ചുവിടുകയോ ചെയ്തിട്ടുണ്ട്. തൂത്തുക്കുടി, മധുര, ട്രിച്ചി പോലുള്ള ദക്ഷിണ-മധ്യ ജില്ലകളിലേക്കുള്ള ആഭ്യന്തര സർവീസുകളെയാണ് ഇത് പ്രധാനമായും ബാധിച്ചത്. റെയിൽവേ ഗതാഗതത്തിനും ചില തടസ്സങ്ങൾ നേരിട്ടിട്ടുണ്ട്.

നാഗപട്ടണം, കടലൂർ, മായവാരം ഉൾപ്പെടെയുള്ള ഡെൽറ്റാ ജില്ലകളിലാണ് മഴ കൂടുതൽ നാശനഷ്ടങ്ങൾ ഉണ്ടാക്കിയത്. മഴക്കെടുതിയിൽ തമിഴ്നാട്ടിൽ മൂന്ന് പേർ മരിച്ചതായും കൃഷിസ്ഥലങ്ങളിൽ വെള്ളം കയറി വ്യാപകമായി വിളനാശമുണ്ടായതായും റവന്യൂ വകുപ്പ് മന്ത്രി അറിയിച്ചു. ദുരിതാശ്വാസ പ്രവർത്തനങ്ങൾക്കായി എൻഡിആർഎഫ്, എസ്ഡിആർഎഫ് സംഘങ്ങളെ വിവിധ ജില്ലകളിൽ വിന്യസിക്കുകയും 6000-ത്തോളം ദുരിതാശ്വാസ ക്യാമ്പുകൾ തുറക്കുകയും ചെയ്തിട്ടുണ്ട്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്