ഇന്ത്യയും കാനഡയും തമ്മിൽ ഒപ്പിട്ട പുതിയ യുറേനിയം വിതരണ കരാർ പ്രാദേശിക സമാധാനത്തെയും ആഗോള ആണവ വ്യാപന നിരോധന നിയമങ്ങളെയും ബാധിക്കുമെന്ന് പാകിസ്താൻ മുന്നറിയിപ്പ് നൽകി.

കാനഡ പ്രധാനമന്ത്രി മാർക്ക് കാർണിയുടെ ഇന്ത്യൻ സന്ദർശനത്തിനിടെയാണ് 2.6 ബില്യൺ കനേഡിയൻ ഡോളറിന്റെ യുറേനിയം കരാർ പ്രഖ്യാപിച്ചത്. എന്നാൽ, ഇന്ത്യക്ക് ഇത്തരത്തിൽ പ്രത്യേക പരിഗണന നൽകുന്നത് മേഖലയിലെ സൈനിക സന്തുലിതാവസ്ഥയെ തകർക്കുമെന്ന് പാകിസ്താൻ വിദേശകാര്യ മന്ത്രാലയം പ്രസ്താവനയിൽ പറഞ്ഞു.

വിദേശത്തുനിന്ന് യുറേനിയം ലഭിക്കുന്നതോടെ, ഇന്ത്യക്ക് സ്വന്തം രാജ്യത്തെ യുറേനിയം ശേഖരം ആണവായുധ നിർമ്മാണത്തിനായി വകമാറ്റി ഉപയോഗിക്കാൻ സാധിക്കുമെന്ന് പാകിസ്താൻ ആരോപിക്കുന്നു.

1974-ൽ ഇന്ത്യ നടത്തിയ ആണവ പരീക്ഷണം കാനഡ നൽകിയ റിയാക്ടറിലെ പ്ലൂട്ടോണിയം ഉപയോഗിച്ചായിരുന്നുവെന്ന് പാകിസ്താൻ വിദേശകാര്യ വക്താവ് താഹിർ അന്ദ്രാബി ചൂണ്ടിക്കാട്ടി. അന്ന് ഇന്ത്യ നടത്തിയ നീക്കമാണ് ന്യൂക്ലിയർ സപ്ലയേഴ്സ് ഗ്രൂപ്പ് (NSG) രൂപീകരിക്കാൻ ലോകരാജ്യങ്ങളെ പ്രേരിപ്പിച്ചത്. ഇന്ത്യയുടെ എല്ലാ ആണവ നിലയങ്ങളും അന്താരാഷ്ട്ര ആണവോർജ്ജ ഏജൻസിയുടെ (IAEA) നിരീക്ഷണത്തിലല്ലെന്നും, പുതിയ കരാറിലും ഇതിനെക്കുറിച്ച് വ്യക്തതയില്ലെന്നും പാകിസ്താൻ കുറ്റപ്പെടുത്തി.

പാകിസ്താന്റെ എതിർപ്പുകൾക്കിടയിലും ഇന്ത്യയും കാനഡയും തമ്മിലുള്ള ബന്ധം കൂടുതൽ ദൃഢമാവുകയാണ്. 2030-ഓടെ ഇരുരാജ്യങ്ങളും തമ്മിലുള്ള വ്യാപാരം 50 ബില്യൺ ഡോളറായി ഉയർത്താനാണ് ലക്ഷ്യമിടുന്നത്. നിലവിലെ യുറേനിയം കരാർ ഇന്ത്യയുടെ ഊർജ്ജ ആവശ്യങ്ങൾക്ക് അത്യന്താപേക്ഷിതമാണെന്ന് പ്രധാനമന്ത്രി നരേന്ദ്ര മോദി വിശേഷിപ്പിച്ചു. ശുദ്ധമായ ഊർജ്ജം കണ്ടെത്താനുള്ള ഇന്ത്യയുടെ ശ്രമങ്ങൾക്ക് കാനഡ പൂർണ്ണ പിന്തുണ നൽകുമെന്ന് മാർക്ക് കാർണിയും വ്യക്തമാക്കി

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്